အင်တာဗျူး

“ကျွန်တော်တို့ဘက်ကလည်း အရမ်းထိန်းချုပ်တာမျိုးမဟုတ်ဘဲ ကျောင်းကော်မတီတွေ၊ ဒေသခံတွေ လိုလားတဲ့ ကျောင်းကို ဖွင့်လှစ်ထားခိုင်းပါတယ်။ ကလေးတွေရဲ့ ပညာရေးနဲ့သက်ဆိုင်တာဖြစ်တဲ့အတွက် ပြည်သူလူထု မကြိုက်တဲ့ မလိုလားတဲ့အရာတွေကိုတော့ လိုက်မလုပ်ပါဘူး။ ဒေသခံတွေလိုလားတယ်ဆိုရင်တော့ ကျွန်တော်တို့ KIO က ကျောင်းဖွင့်ပေးတယ်” KIO ပညာရေးဌာန ဒု-တာဝန်ခံ ဆရာကြီးမလန်ဘရန်တောင်

“…..အင်တာနက်လိုင်းအသုံးပြုမရလို့ နစ်နာနေရတဲ့လူတွေက တော်တော်များများရှိတယ်။ အဲဒါကြောင့် ဖုန်းလိုင်း မရသေးတဲ့၊ အင်တာနက်မရသေးတဲ့နေရာမျိုးမှာ အစိုးရက ငွေလွှဲငွေထုတ် အဆင်ပြေအောင်လုပ်ပေးမယ်ဆိုရင် တော့ ပိုပြီးတော့ကောင်းမယ်လို့ အကြံပြုချင်တယ်” တောင်ကုတ်မြို့ခံပရဟိတစေတနာ့ဝန်ထမ်း ကိုညီလင်းဇော်

“ပြည်သူတွေကို လူသားဒိုင်းအဖြစ်အသုံးပြုတာ၊ ရှေ့ကနေမိုင်းရှင်းခိုင်းတာ၊ ပေါ်တာဆွဲတာတွေက ဆိုးရွားတဲ့ ချိုးဖောက်မှုတွေပါ။ ဒါ့အပြင် စစ်မှုထမ်းဥပဒေကို အကြောင်းပြပြီး လူငယ်တွေကိုမတရားဖမ်းဆီးတာ၊ စစ်သင်တန်းမတက်ချင်ရင် ငွေညှစ်တောင်းတာ၊ ပြန်ပေးဆွဲသလို ဖြစ်နေတဲ့ Kidnapping ပုံစံတွေပါ ကျူးလွန် လာတာတွေ့ရပါတယ်” နိုင်အဲမွန်/ ဒါရိုက်တာ – မွန်ပြည်လူ့အခွင့်အရေးဖောင်ဒေးရှင်း (HURFOM)

“အကြမ်းဖက်စစ်ကောင်စီက အတုအယောင်ရွေးကောက်ပွဲပြုလုပ်ဖို့ ပြင်ဆင်နေချိန်ဖြစ်တယ်။ ဒါကြောင့် ကျနော်တို့ပြည်သူတွေ ဒီတော်လှန်ရေးမှာ နိုင်ရာဝန်ကိုထမ်းပြီး တော်လှန်ဖို့လိုတယ်။ ဒီတော်လှန်ရေး အင်အားစုနဲ့ ကျနော်တို့ပြည်သူတွေ ဒီအားတွေစုမိသွားပီဆိုရင် အောင်ပွဲက အမြန်ဆုံးရရှိလိမ့်မယ်လို့ ယုံကြည်တယ်” မိုင်းနိုင်ဂေါင်ဇာရ် / TPCC အတွင်းရေးမှူး

“ပုံမှန်တစ်ရက်ကို သုံးစီးတက်လာနိုင်တဲ့အနေအထားမျိုးမှာ တစ်စီးမှ မတက်နိုင်ဘဲ ရပ်နားထားတော့ နီးစပ်ရာ ကားနဲ့ပဲ ကျနော်တို့ လာသမျှအသင်း ရှိသမျှရွာကလူတွေကို ပတ်ပြီးတော့ ကြိုနေရတဲ့ အနေအထားမျိုး ရှိတဲ့အခါ နည်းနည်းတော့ကြန့်ကြာမှု ရှိတယ်ဗျ” ဘားအံမြို့မှလူမှုကယ်ဆယ်ရေးအဖွဲ့ဝင်တစ်ဦး

“အများစုတွေ့နေရတာက သွားလာရေးတွေပေါ့။ အင်မတန် တင်းကြပ်ထားတယ်။ တနေရာရာသွားရင် လိုင်စင် မရှိတာကို အကြောင်းပြပြီးစစ်ဆေးတာတွေရှိတယ်။ သူတို့စစ်ဆေးဂိတ်တွေကိုလည်း လုံခြုံရေးတင်းကြပ် လာတယ်။ မြို့အဝင်လမ်း အထွက်လမ်း၊ အဲ့ဒီတလျှောက်ဆို အများကြီးပဲ။ မြို့ပေါ်မှာဆိုလည်း အချိန်မရွေး အဓမ္မဖမ်းဆီးလို့ရနေတယ်” နိုင်အဲမွန် / ဒါရိုက်တာ – မွန်ပြည် လူ့အခွင့်အရေးဖောင်ဒေးရှင်း

“အဖမ်းခံရတဲ့ ကလေးတွေကြတော့ အခုအချိန်မှာ တချို့ဆိုရင် ဖမ်းဆီးပြီးတော့ စစ်သင်တန်းပို့လိုက်ပြီ။ ဆိုတော့ ဒီကလေးတွေကို အမြန်ဆုံး ပြန်လွှတ်ပေးစေချင်တယ်။ နောက်တခုက ရခိုင်ပြည်နယ်မှာရှိတဲ့ ချင်းမှမဟုတ်ဘူးပေါ့လေ၊ မည်သည့်လူမျိုးစုတွေကိုမှ အကြမ်းဖက်တဲ့နည်းလမ်းနဲ့ အတင်းအဓမ္မ တပ်သားစုဆောင်းခြင်းမျိုးကို မလုပ်ဖို့လိုတယ်” ဆလိုင်းခိုင်လ်ရို – ဗဟိုအလုပ်အမှုဆောင်/ ချင်းနိုင်ငံရေး ဦးဆောင်ကော်မတီ (CPSC)

“တိုက်ပွဲတော့ တခြားမဖြစ်တော့ဘူး။ ကြိုတင်ပြီး အကုန်ဖွင့်ပေးလိုက်တာ။ ကျနော်တို့ သိထားကြတာက KIA နဲ့ စစ်တပ်ညှိလိုက်ကြတယ်လို့ ကြားပါတယ်။ အဲဒါကြောင့် လမ်းဖွင့်ပေးလိုက်တယ်။ ဘာတိုက်ပွဲမှ မရှိတော့ပါဘူး။ လမ်းကြောင်းမှာပိတ်ဆို့ထားတဲ့ ရဲဘော်တွေတောင် အကုန်ပြန်ဆုတ်သွားတယ်” ဖားကန့်ဒေသခံတစ်ဦး

“ကျွန်တော်တို့ပလက်ဝဒေသခံတွေအနေနဲ့ နောက်ထပ် လူ့အခွင့်အရေးချိုးဖောက်မခံရတော့ဖို့ လိုအပ်တယ်။ ကျွန်တော်တို့ဒေသအတွင်းက လက်နက်ကိုင်အဖွဲ့အစည်းတွေကို မျက်ခြေမပျက်စောင့်ကြည့်ဖို့လိုသလို အမှန်ကို အမှန်အတိုင်း ပြောရဲကြဖို့လဲလိုအပ်တယ်ဆိုတာ ကျွန်တော်ပြောချင်ပါတယ်” သိက္ခာတော်ရဆရာ ဦးလိုဒိန်း

← Previous 1 … 10 11 12 13 14 … 86 Next →