အမျိုးသားဒီမိုကရက်တစ်မဟာမိတ်တပ်မတော် (မိုင်းလားအဖွဲ့)

စတင်ဖွဲ့စည်းသည့်နေ့စွဲ – ၁၉၈၉

ရုံးချုပ် – မိုင်းလား၊ ရှမ်းပြည်နယ်အရှေ့ပိုင်း

လှုပ်ရှားရာနယ်မြေ – မိုင်းလား၊ ရှမ်းပြည်နယ် (အထူးဒေသ ၄)

ဥက္ကဌ – ဦးထိန်လင်း

ဒုဥက္ကဌ – ဦးစန်ပေ့၊ ဦးဆန်လူ

အထွေထွေအတွင်းရေးမှူး – ဦးကြည်မြင့်

နိုင်ငံရေးအရ ပူးပေါင်းအဖွဲ့ – ပြည်ထောင်စုနိုင်ငံရေးဆွေးနွေးမှုညှိနှိုင်းရေးကော်မတီ (FPNCC) အဖွဲ့ဝင်

Facebook – https://www.facebook.com/monglanewscna1976

Website – http://www.4tzx.com/

အာဏာသိမ်းစစ်အုပ်စုနှင့် အလွတ်သဘောတွေ့ဆုံဆွေးနွေးမှုများရှိနေသည့် NDAA-ESS အနေဖြင့် ၎င်းတို့၏ ရှမ်းပြည်နယ်အရှေ့ပိုင်း အထူးဒေသ (၄) ကို ကိုယ်ပိုင်အုပ်ချုပ်ခွင့်ရအဖြစ် သတ်မှတ်ပေးရန် တောင်းဆိုထားသည်။ အထူးဒေသ (၄) အနေဖြင့် ဥက္ကဌအသစ်ဖြစ်လာသူ ဦးထိန်လင်း၏ ဦးဆောင်မှုအောက်တွင် အဆင့်မြင့် ကိုယ်ပိုင်အုပ်ခွင့်ရရှိရေးဟူသည့် နိုင်ငံရေးရည်မှန်းချက်အတွက် ကြိုးပမ်းဆောင်ရွက်ရင်း၊ တည်ငြိမ်သည့် ဖွံ့ဖြိုးတိုးတက်မှု၊ သဟဇာတဖြစ်မှု၊ သာယာလှပသော လူမှုပတ်ဝန်းကျင်ဖြစ်တည်မှု စသည့်  အရှိန်အဟုန်ကောင်းများကို ဆက်လက်ထိန်းသိမ်းသွားမည်ဟု ဆိုထားပါသည်။

ရှမ်းမြောက်ဒေသအတွင်း ညီနောင်မဟာမိတ် (၃) ဖွဲ့၏ “၁၀၂၇ စစ်ဆင်ရေး” ပေါ်ပေါက်လာချိန်တွင်တော့ ဘက်မလိုက်သည့် နိုင်ငံရေးရပ်တည်ချက်အတိုင်း မည်သည့်ပဋိပက္ခတွင်မျှ ပါဝင်ခြင်း၊ စွက်ဖက်ခြင်းမျိုး ပြုမည်မဟုတ်ကြောင်း၊ နယ်စပ်ဒေသ တည်ငြိမ်အေးချမ်းရေးအတွက် ဆက်လက်ထိန်းသိမ်းသွားမည်ဖြစ်ကြောင်း NDAA – ESS က သဘောထားထုတ်ပြန်ခဲ့သည်။ တရုတ်အစိုးရ ကြားဝင်စေ့စပ်မှုဖြင့်ပြုလုပ်သော စစ်အုပ်စုနှင့် ညီနောင်မဟာမိတ် (၃) ဖွဲ့အကြား တွေ့ဆုံဆွေးနွေးပွဲများကိုတော့ မိုင်းလားမြို့ပေါ်တွင် NDAA က စီစဉ်ပေးခဲ့ဖူးပါသည်။

အာဏာသိမ်းစစ်အုပ်စုကမူ ၂၀၂၅ ခုနှစ် သြဂုတ်လ ၁ ရက်မှစတင်ပြီး NDAA-ESS ထိန်းချုပ်အခြေစိုက်ရာ မိုင်းလားမြို့နယ်အား စစ်အုပ်ချုပ်ရေးကျင့်သုံးမည့်မြို့နယ်အဖြစ် ကြေညာခဲ့သည်။ သြဂုတ်လ ၇ ရက်နေ့၊ NDAA-ESS နှင့် စစ်အုပ်စု၏ ရှမ်းပြည်နယ်ဝန်ကြီးချုပ်၊ တြိဂံတိုင်းစစ်ဌာနချုပ် တိုင်းမှူးတို့ ဦးဆောင်သည့် ကိုယ်စားလှယ်အဖွဲ့တို့ တွေ့ဆုံရာတွင်တော့ မိုင်းလားမြို့နယ်အား စစ်အုပ်ချုပ်ရေးကြေညာမှုသည် သင့်လျော်မှုမရှိကြောင်း NDAA အထွေထွေအတွင်းရေးမှူး ဦးကြည်မြင့်က ပြောဆိုခဲ့ပါသည်။

၂၀၂၆ ခုနှစ် သြဂုတ်လ ၁၀ ရက်၊ နေပြည်တော်တွင် အာဏာသိမ်းစစ်အုပ်စု၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် NDAA အကြား တွေ့ဆုံစဉ်အတွင်း ကျိုင်းတုံ-မိုင်းလား လမ်းမကြီးပြုပြင်ရေး၊ မိုင်းယု-ကျိုင်းယန်းတံတား ပုံမှန်ပြန်ဖြတ်သန်းသွားလာနိုင်ရေး၊ နယ်စပ်ဒေသ ပညာရေး၊ ကျန်းမာရေး၊ ဒေသဖွံ့ဖြိုးရေး၊ ဒေသတည်ဆောက်ရေး၊ စိုက်ပျိုးရေးအတွက် မူဝါဒပိုင်း ပံ့ပိုးမှုများအား စစ်အုပ်စုအနေဖြင့် ကူညီပေးဖို့ အပြန်အလှန်ဆွေးနွေးခဲ့ကြောင်း သိရသည်။

အာဏာသိမ်းစစ်အုပ်စု၏ အတုအယောင်ရွေးကောက်ပွဲမှတဆင့် ပြောင်းလဲလာသော အာဏာသိမ်းစစ်ခေါင်းဆော် ဗိုလ်ချုပ်မှူးကြီး (ငြိမ်း) မင်းအောင်လှိုင် အသွင်ပြောင်းအစိုးရအဖွဲ့ကို NDAA က ကြိုဆိုထားပြီး စစ်အုပ်စု ရည်မှန်းထားသော NCA Plus (+) အစီအစဉ်တွင် NDAA ပါဝင်လာမလား စောင့်ကြည့်ရမည်ဖြစ်သည်။
Reference: မြန်မာ့ငြိမ်းချမ်းရေး လုပ်ငန်းစဉ်ကို ပုံဖော်ခြင်း – လမ်းညွှန်အကိုးအကား ၂၀၂၅– ၂၀၂၆