|
|
|
စတင်ဖွဲ့စည်းသည့် နေ့စွဲ – ၈ နိုဝင်ဘာ ၂၀၁၀ ရုံးချုပ် – ကရင်ပြည်နယ် မြဝတီမြို့နယ်၊ ဆုံစည်းမြိုင်ကျေးရွာ လှုပ်ရှားရာနယ်မြေ – ကရင်ပြည်နယ် လှိုင်းဘွဲ့၊ ကော့ကရိတ်နှင့် မြဝတီမြို့နယ်၊ ကြာအင်းဆိပ်ကြီး – ဘုရားသုံးဆူတောင်ကြား စစ်ဦးစီးချုပ် – ဗိုလ်ချုပ်ကြီး စောရွှေဝ ဒုတိယ စစ်ဦးစီးချုပ် – ဒုတိယဗိုလ်ချုပ်ကြီးစောဘငြိမ်းအောင် နိုင်ငံရေးအရ ပူးပေါင်းပါဝင်မှု – 7 EAO Alliance အဖွဲ့ဝင် Facebook – https://www.facebook.com/klohhtoobor/ DKBA အနေဖြင့် ဒေသဖွံ့ဖြိုးရေးနှင့် နယ်မြေငြိမ်းချမ်းရေးအတွက် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို ဆက်လက်စွဲကိုင်ထားသော်လည်း ၎င်းတို့ထိန်းချုပ်လှုပ်ရှားရာဒေသပတ်ဝန်းကျင်ရှိ စစ်ရေးပဋိပက္ခဖြစ်စဉ်များ၏ အဖျားခတ်ခံရခြင်း၊ စစ်ရေးပဋိပက္ခဖြစ်စဉ်များအတွင်း တိုက်ရိုက်မဟုတ်ဘဲ သွယ်ကာဝှိက်ကာ ပါဝင်ပတ်သက်မှုများ ရှိနေခဲ့ရပါသည်။ မူးယစ်ဆေးဝါးနှင့် လောင်းကစားလုပ်ငန်းများအား ဖြေရှင်းနှိမ်နင်းရေးသည် DKBA အတွက် စိန်ခေါ်မှုတရပ်ဖြစ်နေပါသည်။ NCA လမ်းကြောင်းအရ ငြိမ်းချမ်းရေးလုပ်ငန်းစဉ်များ ရပ်ဆိုင်းသွားခဲ့သည့် စစ်အာဏာသိမ်းကာလအတွင်း EAO Alliance တွင် အဖွဲ့ဝင်အဖြစ် ပါဝင်နေပြီး အာဏာသိမ်းစစ်အုပ်စုနှင့် တော်လှန်ရေးအင်အားစုများအကြား ဘက်မလိုက်မိစေရေး သတိထားချဉ်းကပ်နေသော်လည်း အာဏာသိမ်းစစ်အုပ်စု၏ လေကြောင်းတိုက်ခိုက်မှုများကို မရှောင်လွှဲနိုင်ခဲ့သလို ဒေသတွင်းတော်လှန်ရေးအင်အားစုများ၏ စောင့်ကြည့်ခြင်းကို ရင်ဆိုင်နေရပါသည်။ မြန်မာနိုင်ငံတဝှမ်း ဖြစ်ပျက်နေသည့် ပဋိပက္ခများ ဖြေရှင်းရေးအတွက် တွေ့ဆုံညှိနှိုင်းခြင်းနည်းကိုသာ ယုံကြည်ကြောင်းနှင့် အာဏာသိမ်းစစ်အုပ်စု၏ အတုအယောင်ရွေးကောက်ပွဲကျင်းပနိုင်ရေးအတွက် ၎င်းတို့ဒေသအတွင်း ဝန်းရံကူညီပေးမည်ဟု ၂၀၂၅ ခုနှစ် စက်တင်ဘာလ ၁၁ ရက်တွင် ထုတ်ပြန်ခဲ့သည်။ DKBA စစ်ဦးစီချုပ်ဟောင်း ဗိုလ်ချုပ်ကြီးစောစတီး၊ ဗိုလ်မှူးချုပ်စောစိန်ဝင်း၊ ဗိုလ်ချုပ်စောဆန်းအောင်နှင့် ဗိုလ်ချုပ်စိုင်းကျော်လှတို့ (၄) ဦးအား အမေရိကန်နိုင်ငံသားများကို ပစ်မှတ်ထားသော အွန်လိုင်းငွေလိမ်လုပ်ငန်းများတွင် ပါဝင်ပတ်သက်မှုဖြင့် ၂၀၂၅ ခုနှစ်၊ နိုဝင်ဘာလတွင် အမေရိကန်ဘဏ္ဍာရေးဝန်ကြီးဌာန (OFAC) က အရေးယူပိတ်ဆို့မှု လုပ်ဆောင်ခဲ့သည်။ ၂၀၂၆ ခုနှစ် ဇူလိုင်လ ၃၀ ရက်တွင်တော့ အဆိုပါ (၄) ဦးအပြင် ဗိုလ်မှူးကြီးစောအယ်လဲထူးနှင့် ဒီမိုကရေစီအကျိုးပြုကရင့်တပ်မတော် – DKBA အဖွဲ့ကို အရှေ့တောင်အာရှ အွန်လိုင်းငွေလိမ်လည်မှု (ကျားဖြန့်) လုပ်ငန်းများ လည်ပတ်မှုအပါအဝင် လူကုန်ကူးမှုနှင့် လူ့အခွင့်ရေးချိုးဖောက်မှုများတွင် တာဝန်ရှိသည်ဟုဆိုကာ ဥရောပသမဂ္ဂ (EU) က ဒဏ်ခတ်ပိတ်ဆို့အရေးယူလိုက်ကြောင်း တရားဝင်ကြေညာခဲ့သည်။ ထိုင်း-မြန်မာနယ်စပ်၊ မြဝတီမြို့နယ်အတွင်း ဒုစရိုက်လုပ်ငန်းများ၊ အဆောက်အအုံများ လည်ပတ်ရန် အကာအကွယ်ပေးခြင်း၊ အကြီးစားကျားဖြန့်စင်တာများကို ကူညီပံ့ပိုးပေးခြင်းတို့တွင် တာဝန်ရှိသည့်အပြင် ပိတ်မိနေသည့် လူကုန်ကူးခံရသူများကို အကြမ်းဖက်မှုအတွင်း ပါဝင်နေခြင်းကြောင့် အရေးယူခြင်းဖြစ်သည်ဟု EU က ဆိုသည်။ DKBA သည် ၎င်းတို့ထိန်းချုပ်နယ်မြေတည်ငြိမ်ရေးအတွက် တော်လှန်ရေးအင်အားစုများဘက်တွင် မရပ်တည်ဘဲ အာဏာသိမ်းစစ်အုပ်စုနှင့် ထိတွေ့ဆက်ဆံရေးဘက်ကို ရွေးချယ်ထားသည်ဟုဆိုနိုင်သော်လည်း အာဏာသိမ်းစစ်တပ်၏ လက်နက်ကြီးပစ်ခတ်ခံရမှုနှင့် လေကြောင်းတိုက်ခိုက်ခံရမှုများကို ကြုံတွေ့လေ့ရှိပါသည်။ မြဝတီတောင်ပိုင်းဒေသ DKBA ထိန်းချုပ်ဧရိယာအနီး အာဏာသိမ်းစစ်တပ်နှင့် တော်လှန်ရေးတပ်ဖွဲ့များအကြား တိုက်ပွဲများ ပြင်းထန်နေချိန်တွင် နယ်မြေတည်ငြိမ်ရေးအတွက် ပူးပေါင်းဆောင်ရွက်ပေးရန် DKBA ထံ စစ်အုပ်စုက တောင်းဆိုခဲ့ဖူးသည်။ အွန်လိုင်းငွေလိမ်လည်မှု (ကျားဖြန့်) လုပ်ငန်းများကို အကြောင်းပြုပြီး နိုင်ငံတကာအစိုးရများ၏ အရေးယူပိတ်ဆို့မှုများ ရင်ဆိုင်နေရသည့် DKBA အနေဖြင့် အာဏာသိမ်းစစ်အုပ်စု၏ အသုံးချခံမဖြစ်စေရေးအတွက်ပါ သတိဖြင့် ချဉ်းကပ်နေရသည့်အခြေအနေမျိုး ရောက်ရှိနေသည်ဟု ဆိုရပါမည်။ |
ဒီမိုကရေစီအကျိုးပြု ကရင့်တပ်မတော်
By MPM
26 အောက်တိုဘာ, 2026
👁 496
