|
|
|
စတင်ဖွဲ့စည်းသည့် နေ့စွဲ – ၂၄ ဧပြီ ၁၉၆၄၊ ၁၆ သြဂုတ် ၁၉၇၁ ရုံးချုပ် – ဝမ်ဟိုင်း၊ ကျေးသီးမြို့နယ်၊ ရှမ်းပြည်နယ်မြောက်ပိုင်း လှုပ်ရှားရာနယ်မြေ – သျှမ်းပြည်တောင်ပိုင်း လင်းခေး၊ မိုင်းရှူး၊ ကျေးသီး၊ မိုင်းကိုင်၊ လဲချား၊ ပင်လုံ၊ လွိုင်လင်၊ ဟိုပုံးနှင့် ရပ်စောက်မြို့နယ်များ၊ သျှမ်းပြည်မြောက်ပိုင်း မိုင်းရယ်၊ တန့်ယန်း၊ လားရှိုး၊ သီပေါ၊ ကျောက်မဲ၊ နောင်ချို၊ မိုးမိတ်၊ နမ္မတူ၊ နမ့်ဆန်၊ မန်တုံ၊ သိန္နီ၊ ကွတ်ခိုင်၊ မူဆယ်နှင့် နမ့်ခမ်းမြို့နယ်များ ဥက္ကဌ – ဗိုလ်ချုပ်ကြီး စဝ်ပန်ဖ ဒုဥက္ကဌ – ဒုတိယဗိုလ်ချုပ်ကြီး စဝ်ခွန်ဆိုင် အထွေထွေ အတွင်းရေးမှူး – ဗိုလ်မှူးကြီး ကျော်လှ နိုင်ငံရေးအရ ပူးပေါင်းပါဝင်မှု – ပြည်ထောင်စုနိုင်ငံရေးဆွေးနွေးမှုညှိနှိုင်းရေးကော်မတီ (FPNCC) အဖွဲ့ဝင် Facebook – https://www.facebook.com/ssppinfo Website – https://ssppssa.org/ ၂၀၂၅ ခုနှစ် ဇူလိုင်လ ၂၃ ရက်မှ ၂၈ ရက်အထိ ကျင်းပသော SSPP/SSA ၏ (၆) ပတ် ဗဟိုကော်မတီအစည်းအဝေးအတွင်း နိုင်ငံရေး၊ စစ်ရေးအခြေအနေများအပါအဝင် ၎င်းတို့၏ ထိန်းချုပ်နယ်မြေများအတွင်းရှိ အုပ်ချုပ်ရေးအခြေအနေများကို အလေးထားသုံးသပ်ခဲ့ကြသည်ဟု ဆိုပါသည်။ ငြိမ်းချမ်းစွာအတူယှဉ်တွဲနေထိုင်ရေးမူကို စွဲကိုင်ကာ အပြန်အလှန်လေးစားအသိအမှတ်ပြုခြင်း၊ အပြန်အလှန်ရိုင်းပင်ကူညီခြင်းဖြင့် တိုင်းရင်းသားစည်းလုံးညီညွတ်မှု တည်ဆောက်ရေးကို ကြိုးပမ်းသွားမည်ဟု အစည်းအဝေးအပြီးတွင် ထုတ်ပြန်ခဲ့ပါသည်။ စစ်ရေးအရဖြစ်စေ နိုင်ငံရေးအရဖြစ်စေ အဖွဲ့တစ်ဖွဲ့၊ လူမျိုးတစ်မျိုး၊ ဒေသတစ်ခုတည်းအတွက် ကွက်ကြည့်ရေးဝါဒကို ရှောင်ကြဉ်ပြီး လူမျိုးအားလုံး၊ ဒေသအားလုံး လွှမ်းခြုံသည့် ဆောင်ရွက်ချက်ဖြင့်သာ ရေရှည်စုပေါင်းနေထိုင်နိုင်မည်ဟု SSPP/SSA က ယုံကြည်ထားသည်။ ထို့ပြင် ၂၀၂၅ ခုနှစ် နိုဝင်ဘာလ ၁၃ ရက်တွင် ပြုလုပ်သော SSPP/SSA ၏ ပဉ္စမမြောက် ပါတီကွန်ဂရက်အစည်းအဝေးကလည်း “တန်းတူရေးနှင့် ကိုယ်ပိုင်ပြဌာန်းခွင့်ကို အာမခံသည့် စစ်မှန်သော ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေးအတွက် နိုင်ငံရေးရည်မှန်းချက်နှင့် နိုင်ငံရေးရပ်တည်ချက်ချင်းတူညီသော ပါတီ၊ အဖွဲ့အစည်းများနှင့် ပူးပေါင်းဆောင်ရွက်သွားမည်ဖြစ်ကြောင်း ထုတ်ပြန်ခဲ့ပါသည်။ ၂၀၂၅ ခုနှစ် နိုဝင်ဘာလ ၂၉ ရက်နေ့၊ ကျောက်မဲမြို့နယ် ပုံဝိုးကျေးရွာအုပ်စု တောတွင်းတနေရာရှိ SSPP/SSA တပ်စခန်းများအနီး အာဏာသိမ်းစစ်တပ်ဘက်မှ မြေပြင်စစ်ကြောင်းထိုးဝင်ရောက်လာသဖြင့် နှစ်ဖက်ထိတွေ့တိုက်ပွဲဖြစ်ပွားခဲ့သည်။ ၂၀၂၆ ခုနှစ် ဇန်နဝါရီလ (၉) ရက်နေ့ နံနက်ပိုင်းမှ ညပိုင်းအချိန်အထိ၊ SSPP/SSA ထိန်းချုပ်လှုပ်ရှားရာ သီပေါမြို့နယ် နမ့်ကုံ၊ ဟိုင်းဆိုင်နှင့် နားပျန်ကျေးရွာများအနီး အာဏာသိမ်းစစ်တပ်မှ လေကြောင်းမှတဆင့် အကြိမ်ကြိမ် ဗုံးကြဲတိုက်ခိုက်ခဲ့ပါသည်။ ဒေသခံပြည်သူများ မထိခိုက်စေရေးအပါအဝင် ဒေသတည်ငြိမ်းရေး၊ လက်ရှိငြိမ်းချမ်းရေးမထိခိုက်စေရေး၊ မလိုလားအပ်သောအကျိုးသက်ရောက်မှုများ မဖြစ်ပေါ်စေရေးအတွက် အာဏာသိမ်းစစ်တပ်အနေဖြင့် အထူးသတိထားဆောင်ရွက်ရန် လိုအပ်ကြောင်း SSPP က ထုတ်ပြန်ခဲ့သည်။ အခြားတဖက်တွင်းလည်း လှုပ်ရှားရာနယ်မြေထိစပ်မှုနှင့် နယ်မြေပိုင်ဆိုင်မှုအငြင်းပွားမှုများကို အကြောင်းပြုပြီး SSPP/SSA နှင့် PSLF/TNLA အကြားတွင်သော်လည်းကောင်း၊ SSPP/SSA နှင့် MNDAA အကြားတွင်သော်လည်းကောင်း စစ်ရေးအရ ထိတွေ့တိုက်ပွဲများဖြစ်ပွားခဲ့သလို နှစ်ဖက်တွေ့ဆွေးညှိနှိုင်းဖြေရှင်းနေရသည်ကို တွေ့ရပါသည်။ ၂၀၂၆ ခုနှစ်၏ SSPP ပထမ (၆) လပတ် မျက်နှာစုံညီအစည်းအဝေးအပြီးတော့ နယ်မြေတည်ငြိမ်းအေးချမ်းရေးနှင့် ပြည်သူ့လုံခြုံမှုရရှိစေရေးအတွက် ဆက်စပ်သော အဖွဲ့အစည်းများနှင့် ထိတွေ့ဆက်ဆံကာ ပြည်ထောင်စုအတွင်းရှိ နိုင်ငံရေးပြဿနာများကို နိုင်ငံရေးနည်းလမ်းဖြင့် အဖြေရှာဖြေရှင်းသွားမည်ဖြစ်ကြောင်း ချမှတ်ခဲ့သလို အာဏာသိမ်းစစ်အုပ်စုနှင့်လည်း ထိတွေ့ဆက်ဆံကာ တွေ့ဆုံဆွေးနွေးမှုများ လုပ်ဆောင်လျက်ရှိပါသည်။ |
သျှမ်းပြည်တိုးတက်ရေးပါတီ
By MPM
26 အောက်တိုဘာ, 2026
👁 567
