ပအိုဝ်းအမျိုးသားလွတ်မြောက်ရေးအဖွဲ့ချုပ်/ ပအိုဝ်းအမျိုးသားလွတ်မြောက်ရေးတပ်မတော်

စတင်ဖွဲ့စည်းသည့်နေ့စွဲ – ၁၁ ဒီဇင်ဘာ ၁၉၄၉ (ပထမအကြိမ်)၊ ၇ – ၉ ဒီဇင်ဘာ ၂၀ဝ၉ (ဒုတိယအကြိမ်)

ရုံးချုပ် – မောက်မယ်မြို့နယ်၊ ကဒူးကြီးဒေသ၊ ရှမ်းပြည်နယ်တောင်ပိုင်း

လှုပ်ရှားရာ နယ်မြေ – ဆီဆိုင်၊ ဟိုပုန်း၊ နမ့်စန်၊ လင်းခေးနှင့် မောက်မယ်မြို့နယ်များ၊ ရှမ်းပြည်နယ်

ဥက္ကဌ – ဗိုလ်ချုပ်ခွန်သူရိန်

ဒုဥက္ကဌ – ခွန်ထွန်းတင်

အထွေထွေအတွင်းရေးမှူး – ခွန်အောင်မန်း

နိုင်ငံရေးအရ ပူပေါင်းအဖွဲ့ – ပအိုဝ်းအမျိုးသားဖက်ဒရယ်ကောင်စီ (PNFC)

Facebook – https://www.facebook.com/paohnationalliberationorganization

စစ်အာဏာသိမ်းကာလအတွင်း ၂၀၂၃ ခုနှစ် နှစ်ကုန်ပိုင်းအထိ PNLO အနေဖြင့် အာဏာသိမ်းစစ်အုပ်စုနှင့် ထိတွေ့ဆက်ဆံမှုရှိခဲ့သော်လည်း ၂၀၂၄ ခုနှစ် ဇန်နဝါရီလမှစတင်ကာ စစ်အုပ်စုနှင့် တိုက်ပွဲများ ဖြစ်ပွားခဲ့သည်။ စစ်အာဏာရှင်စနစ်ချုပ်ငြိမ်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် တိုက်ပွဲဝင်နေကြသည့် တိုင်းရင်းသားလက်နက်ကိုင်တော်လှန်ရေးအဖွဲ့ပေါင်းစုံနှင့် ပူးပေါင်းကာ စစ်အာဏာရှင်စနစ် အမြစ်ပြတ်ရေးအထိ ဆက်လက်ချီတက်သွားမည်ဖြစ်ကြောင်း PNLO က ကြေညာခဲ့သည်။၂၀၂၄ ခုနှစ် ဇန်နဝါရီလ ၂၈ ရက်တွင် ၎င်းတို့လှုပ်ရှားရာ ဆီဆိုင်မြို့ပင် သိမ်းပိုက်ထိန်းချုပ်နိုင်ခဲ့သည်အထိ PNLO နှင့် မဟာမိတ်ပူးပေါင်းတပ်ဖွဲ့များ၏ စစ်ရေးအရှိန်သည် အားကောင်းခဲ့ပါသည်။

ဦးသိန်းစိန်အစိုးရလက်ထက်အတွင်း ၎င်းတို့ကိုယ်တိုင်လက်မှတ်ရေးထိုးထားသည့် တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) သည် ၂၀၂၁ ခုနှစ်၊ စစ်အာဏာသိမ်းမှုကြောင့် စာချုပ်၏ အနှစ်သာရ၊ အခြေခံမူများနှင့် ရည်မှန်းချက်များ ပျက်ဆီးသွားခဲ့ပြီး NCA အကောင်အထည်ဖော်မှုလုပ်ငန်းစဉ်လည်း ရပ်ဆိုင်းကာ စက္ကူစုတ်အဖြစ် ရောက်ရှိသွားပြီဖြစ်ကြောင်း ၂၀၂၅ ခုနှစ် အောက်တိုဘာလ ၁၃ ရက်နေ့တွင် KNU၊ CNF၊ NMSP(AD)၊ LDU ၊ ABSDF တို့နှင့်အတူ PNLO က ပူးတွဲသဘောထားထုတ်ပြန်ခဲ့သည်။ စစ်အုပ်စု၏ NCA အမည်ခံသော ဟန်ပြလုပ်ငန်းစဉ်များသည်လည်း နိုင်ငံ့အကျပ်အတည်း၊ ပြည်သူလူထု၏ ဆင်းရဲဒုက္ခများကို ဖြေရှင်းပေးနိုင်မည်မဟုတ်ဘဲ ပဋိပက္ခများသည် ပိုမိုရှည်ကြစေလိမ့်မည်ဟု ဆိုထားပါသည်။

၂၀၂၅ ခုနှစ် မတ်လ ၁၃ ရက်၊ (၇၆) နှစ်မြောက် ပအိုဝ်းအမျိုးသားနေ့ပူးတွဲကြေညာချက်ကို ပအိုဝ်းအမျိုးသားဖက်ဒရယ်ကောင်စီ (PNFC) နှင့်အတူ ထုတ်ပြန်ခဲ့ပြီး စစ်အာဏာရှင်စနစ်ချုပ်ငြိမ်းရေး၊ ပြည်နယ်သစ်များပေါ်ထွန်းခွ့င်ရှိသော ဖက်ဒရယ်ပြည်ထောင်စုကို စုပေါင်းထူထောင်ရေး၊ ယနေ့ကာလ ခေတ်ပြောင်းစနစ်ပြောင်းတော်လှန်ရေးတွင် ဗမာအပါအဝင်တိုင်းရင်းသားအင်အားစုအားလုံးနှင့်အတူ တိုက်ပွဲဝင်ရေးအတွက် PNFC နှင့် PNLO/PNLA အကြား လက်တွဲရပ်တည်ရေး၍ ပူးပေါင်းဆောင်ရွက်သွားမည်ဟု ဆိုပါသည်။

PNFC သည် အခြားသောတော်လှန်ရေးအင်အားစုများနှင့်အတူ စစ်တပ်၏ နိုင်ငံရေးတွင် ပါဝင်နေခြင်းအား အဆုံးသတ်ရေးအပါအဝင် နိုင်ငံရေးဦးတည်ချက် (၆) ရပ်နှင့် အနာဂတ်ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးအတွက် “ပြည်နယ်အားကောင်းရေးမှ ပြည်ထောင်စုအားကောင်းရေး” ချဉ်းကပ်မှု (Button-up Federalism Approach) ကို ထောက်ခံဆော်သြခဲ့သော MEC တွင် အဖွဲ့ဝင်အဖြစ် ပူးပေါင်းပါဝင်လျက်ရှိပါသည်။

၂၀၂၆ ခုနှစ် မတ်လ ၃၀ ရက်တွင် ဖြစ်ထွန်းပေါ်ပေါက်လာသည့် SCEF သည် PNFC နှင့် PNLO/PNLA နှစ်ဖွဲ့စလုံးကို တပြိုင်တည်းတွေ့ဆုံဆွေးမှုပြုလုပ်ခဲ့သည်ကို ထောက်ရှုပါက PNLO/PNLA ၏ တော်လှန်ရေးအတွင်း ပါဝင်မှုနှင့် NCA အား ကျောခိုင်းနေခြင်းသည် ပိုမိုခိုင်မာအားကောင်းနိုင်ချေ ရှိလာပါသည်။ အခြားတဖက်တွင်တော့ PNLO (NCA-S) အမည်ဖြင့် ဖွဲ့စည်းကာ 7 EAO Alliance  အဖွဲ့ဝင်အဖြစ် ရပ်တည်နေပြီး အာဏာသိမ်းစစ်အုပ်စုနှင့်ပါ ထိတွေ့ဆက်ဆံနေသော ဗိုလ်မှူးကြီးခွန်ဥက္ကာနှင့်အဖွဲ့အား ကန့်ကွက်ရှုတ်ချခြင်းများ ပြုလုပ်နေရသည်ကို တွေ့ရသည်။
Reference: မြန်မာ့ငြိမ်းချမ်းရေး လုပ်ငန်းစဉ်ကို ပုံဖော်ခြင်း – လမ်းညွှန်အကိုးအကား ၂၀၂၅– ၂၀၂၆