သျှမ်းပြည်တောင်ပိုင်း ဆီဆိုင်မြို့နယ် ပအိုဝ်းပြည်သူ့စစ် (PNO) သည် ဒေသခံ (၆၀၀၀) ကျော်ကို အကြောင်းပြချက်မရှိဘဲ မောင်းထုတ်ခံရသဖြင့် နေရာထိုင်ခင်းခက်ခဲမှု ကြုံနေရကြောင်း သတင်းရရှိသည်။
ပြီးခဲ့သည့် ဇွန်လ (၆) ရက်မှစပြီး ဇွန်လ (၁၅) ရက်အတွင်း ဆီဆိုင်မြို့နယ် ကျေးရွာအုပ်စု နှစ်စုမှ ဒေသခံ (၆,၀၀၀) ကျော်ကို PNO မှ အကြောင်းပြချက်မရှိဘဲ ပြောင်းရွှေ့ခိုင်းခဲ့သည်။
သို့သော် လက်ရှိအချိန်ကာလသည် စိုက်ပျိုးရေးချိန်ဖြစ်သောကြောင့် စိုက်ပျိုးရေးလုပ်ခွင့်ပေးရန် PNO ကို တောင်းပန်ခဲ့ပြီး ယမန်နေ့ (ဇွန် ၃၀) ရက်သည် သတ်မှတ်ရက်ကျော်လွန်ခဲ့သဖြင့် ထွက်ပြေးခဲ့ရသည်။
ထိုထွက်ပြေးလာရသည့် ပြည်သူ (၆,၀၀၀) ကျော်သည် ဆီဆိုင်မြို့ပေါ် ဘုရားဖြူကျေးရွာ၊ မွေတော်ဘုရားအနီးနှင့် စခေါ်ခွန်ကျေးရွာရှိ ပြောင်းပွဲရုံအနီးတွင် နေထိုင်နေရကြောင်း၊ ထိုသူများအတွက် နေရာထိုင်ခင်းများ မလောက်ငှမှု ကြုံနေရကြောင်းလည်း တိမ်းရှောင်လာသူများကို သွားရောက်ကူညီပေးနေသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။
“သူတို့တွေက တနေရာတည်းမှာ စုနေကြတာမဟုတ်ဘူး။ အချို့ ပိုက်ဆံရှိတဲ့သူဆိုရင် ငှားရမ်းနေကြတယ်။ မရှိတဲ့သူဆိုရင် ကျနော်တို့လုပ်ထားပေးတဲ့ ဇရပ်တွေမှာ နေကြတယ်။ ဆီဆိုင်မြို့ပေါ်ဆိုရင် လူပြည့်နေပြီ။ နေရာထိုင်ခင်း မလောက်ငှဘူး” ဟု ၎င်းအမျိုးသားက ဆိုသည်။
PNO မှ မောင်းထုတ်ခြင်းကိုခံရသည့် ကျေးရွာအုပ်စုနှစ်စုသည် နောင်ကျောကျေးရွာအုပ်စုထဲမှ ကောင်ထိုကျေးရွာ၊ စလောင်းထောင်ကျေးရွာ၊ နောင်ဘိုကျေးရွာနှင့် နောင်ထော်ကျေးရွာအုပ်စုထဲမှ တပူထိုးကျေးရွာ၊ လွယ်ငွန်းကျေးရွာ၊ ပင်စက်ကျေးရွာ၊ တောင်ရှေ့ကျေးရွာ ဒေသခံများဖြစ်ကြသည်။
လက်ရှိအချိန်သည် မိုးရာသီဖြစ်သည့်အလျောက် ထွက်ပြေးလာသည့် ပြည်သူ (၆,၀၀၀) ကျော်အတွက် နေရာထိုင်ခင်းနှင့် စားနပ်ရိက္ခာအတွက် အခက်အခဲများ ကြုံတွေ့နေရကြောင်း ၎င်းကဆက်ပြောသည်။
“မိုးရာသီဖြစ်တော့ သွားရေးလာရေး ခက်ခဲတာပေါ့။ နေထိုင်ဖို့အတွက်က နေရာမလောက်ဘူးလေ။ မိုးတွင်းဆိုတော့ တဲလည်း မလုံဘူး။ ခြင်ထောင်တွေ လိုအပ်နေတာလည်း ရှိတယ်။ တချို့လူတွေက လမ်းမကောင်းတော့ လမ်းတဝက်မှာ ခံနေတဲ့သူလည်းရှိတယ်။ စားစရာတွေ အဓိကလိုတာပေါ့” ဟု ကူညီနေသည့် အမျိုးသားက ထပ်လောင်းပြောသည်။
ဆက်လက်ပြီး နေရပ်ရွှေ့ပြောင်း ရှောင်တိမ်းနေကြသူများမှာ အမျိုးသမီး၊ ကလေးများနှင့် အသက်ကြီးသည့်သူ အများအပြားပါရှိပြီး အမျိုးသားများနှင့်အတူ ရောနှောနေထိုင်ရသဖြင့် အခက်အခဲဖြစ်နေကြောင်းလည်း ထွက်ပြေးတိမ်းရှောင်လာသည့် အမျိုးသမီးတစ်ဉီးက သျှမ်းသံတော်ဆင့်ကို ပြောသည်။
“အမျိုးသမီးနဲ့ ကလေးငယ်တွေ တော်တော်များတယ်။ နောက် အခုက အားလုံးရောနှောနေရတော့ နေထိုင်ရတာ အဆင်မပြေဘူး။ ကျမတို့ကိုလည်း ဘာမှမပြောဘဲနဲ့ ရွာကနေ ဒီနေ့အပြီးထွက်ဆိုပြီး ထွက်လာရတာ။ တိုက်ပွဲဖြစ်မှာကြောက်လို့လား။ ဒါမှမဟုတ် PDF တွေ အရပ်သားဝတ်စုံနဲ့ ရွာထဲဝင်နေမှာကြောက်လို့လား မသိပါဘူး” ဟု ၎င်းအမျိုးသမီးက ပြောသည်။
ထို့ပြင် ယခု ထွက်ပြေးတိမ်းရှောင်လာကြသည့် ကျေးရွာများသည် စိုက်ပျိုးရေးလုပ်ငန်းကို အဓိက လုပ်ကိုင်ကြသည့် ဒေသဖြစ်ကာ မိုးရာသီကာလသည် စိုက်ပျိုးချိန်ဖြစ်သော်လည်း စိုက်ခင်းများကို ဆေးဖြန်းရန်အတွက် အချို့အမျိုးသား ကျန်ရှိသကဲ့သို့ အချို့လည်း စိုက်ခင်းကိုပစ်ပြီး ထွက်ပြေးလာရကြောင်း သိရသည်။
“အမျိုးသားတချို့ကတော့ ဆေးဖြန်းဖို့ ကျန်ခဲ့တယ်။ အချို့ကလည်း စိုက်ခင်းကို ပစ်ပြီးထွက်လာကြတယ်။ PNO က ပြောင်းဆိုတော့လည်း အလုပ်တွေအကုန်ပစ်ပြီး ပြောင်းလာကြရတာ။ မဲမဲမြင် ရမ်းပစ်ခံရမှာကြောက်လို့” ဟု ၎င်း ထွက်ပြေးတိမ်းရှောင်လာသည့် အမျိုးသားက ဆိုသည်။
လက်ရှိ PNO မှ အကြောင်းပြချက်မရှိဘဲ မောင်းထုတ်လိုက်သည့် ဆီဆိုင်မြို့နယ် ဒေသခံ (၆,၀၀၀) ကျော်ထဲမှ အချို့သူများသည် ဝမ်းပျက်ဝမ်းလျောရောဂါ၊ ငှက်ဖျားရောဂါနှင့် အူရောင်ငန်းဖျားရောဂါများ ဖြစ်ပွားနေကြပြီး ဆေးရုံတက်ကုသနေရကြကြောင်း သိရသည်။
သျှမ်းသံတော်ဆင့်
