ရခိုင်ပြည်နယ်၊ စစ်တွေမြို့ပေါ်ရှိ စာသင်ကျောင်း၊ ဝန်ထမ်းအိမ်ရာနှင့် ဘုန်းကြီးကျောင်းအနီးတို့သို့ စက်တင်ဘာလ ၈ ရက် နံနက်ပိုင်းတွင် လက်နက်ကြီးကျည် ငါးလုံး ကျရောက်ပေါက်ကွဲခဲ့ကြောင်း ဒေသခံများက မဇ္စျိမသို့ ပြောသည်။
ထိုနေ့ နံနက် ၁၀ နာရီကျော်အချိန်တွင် စစ်တွေမြို့ ဘောလုံးကွင်းရပ်ကွက်ရှိ အ.ထ.က (၄) ကျောင်းဝန်းအတွင်း တလုံး၊ အနောက်စံပြရပ်ကွက် ဝန်ကြီးအိမ်ရာအတွင်း နှစ်လုံး၊ ဘုန်းကြီးကျောင်းအနီး တလုံးနှင့် ထွေအုပ်ရုံးအနောက်ဘက် ဝန်ထမ်းအိမ်ရာအတွင်း တလုံး စုစုပေါင်း လက်နက်ကြီးကျည် ငါးလုံးဆက်တိုက် ကျရောက်ပေါက်ကွဲခဲ့ခြင်းဖြစ်သည်။
စစ်တွေမြို့ဒေသခံ အမျိုးသမီးတဦးက “နံနက်ပိုင်းမှာ လက်နက်ကြီးသံတွေ တောက်လျှောက်ကြားရပြီး ရပ်ကွက်ထဲကျလာတာ။ အ.ထ.က (၄) ကျောင်းထဲက ခရေပင်နားမှာ တလုံးကျတယ်။ ကလေးတွေ ထိခိုက်တာတော့ မကြားရသေးဘူး။ ဝန်ထမ်းအိမ်ရာနဲ့ ဘုန်းကြီးကျောင်းနားမှာပါကျတော့ လူတွေ အတော်လေး ထိတ်လန့်သွားကြတယ်” ဟု မဇ္စျိမသို့ပြောသည်။
လက်နက်ကြီးကျည်ကျရောက်ခဲ့သဖြင့် အ.ထ.က (၄) စာသင်ကျောင်းတွင် အရေးပေါ်အခြေအနေအဖြစ် ကျောင်းလွတ်ခဲ့ကြရပြီး အဆိုပါ လက်နက်ကြီးကျည်မှာ စစ်အုပ်စုတပ်နှင့် အာရက္ခတပ်တော် (AA) တို့အကြား အပြန်အလှန်ပစ်ခတ်မှုဖြစ်နေချိန်အတွင်း ကျရောက်ခဲ့ခြင်းဖြစ်သည်ဟု စစ်တွေမြို့ခံများကဆိုသည်။
“ဘယ်ကပစ်လို့ကျတာလဲ၊ ဘယ်အဖွဲ့ရဲ့ လက်နက်ကြီးကျည်လဲဆိုတာ ကျနော့်အနေနဲ့ မသိပါ။ သိတာကတော့ မြို့ပေါ်ကို လက်နက်ကြီးမကျခင်မှာ စစ်တွေတပ်ရင်းတွေက တောက်လျောက်ကို လက်နက်ကြီးတွေပစ်တာ၊ ဘယ်နေရာကိုပစ်လဲတော့ မသိဘူး။ AAဘက်ကလည်း ပြန်ပစ်တာမျိုးရှိတယ်” ဟု စစ်တွေမြို့ခံအမျိုးသားတဦးက မဇ္စျိမသို့ ပြောသည်။
ထို့အပြင် စစ်တွေနှင့် နယ်နိမိတ်ထိစပ်နေသည့် ပုဏ္ဏားကျွန်းမြို့မ အခြေခံပညာအထက်တန်းကျောင်း (မြို့မ) အတွင်းသို့လည်း ယမန်နေ့ မွန်းလွှဲပိုင်းက စစ်အုပ်စုတပ်က ပစ်ခတ်လိုက်သော လက်နက်ကြီးကျည် နှစ်လုံး ကျရောက်ပေါက်ကွဲခဲ့သဖြင့် ကျောင်းဆောင်သစ်တဆောင် လုံးဝ ပျက်စီးသွားခဲ့သည်။
ပုဏ္ဏားကျွန်းဒေသခံ အမျိုးသားတဦးက “မြို့မ အ.ထ.က ကျောင်းဝန်းထဲကို နှစ်လုံးကျတာ။ တလုံးက ကျောင်းဆောင်ကြီးအရှေ့မှာကျပြီး နောက်တလုံးက ကျောင်းဆောင်သစ်ပေါ်တည့်တည့်ကျတာဆိုတော့ ကျောင်းဆောင်က လုံးဝ ပျက်စီးသွားတယ်။ စစ်ရေးပစ်မှတ်မဟုတ်တဲ့ စာသင်ကျောင်းတွေကိုပါ ပစ်မှတ်ထားတိုက်ခိုက်နေတာ” ဟု မဇ္စျိမသို့ ပြောသည်။
ပြီးခဲ့သည့်စက်တင်ဘာလ ၃ ရက်နေ့မှစ၍ စစ်တွေ – ပုဏ္ဏားကျွန်း အစပ်နေရာတလျှောက် စစ်အုပ်စုတပ်နှင့် အာရက္ခတပ်တော် (AA) တို့အကြား ထိတွေ့တိုက်ပွဲများ ပြင်းထန်လာခဲ့ပြီးနောက် စစ်အုပ်စုဘက်မှ လက်နက်ကြီး၊ MLRS ဒုံးပစ်စနစ်များ၊ ဒရုန်းနှင့် လေကြောင်းတိုက်ခိုက်မှုများကို ပိုမိုတိုးမြှင့်လုပ်ဆောင်လာခဲ့ခြင်းဖြစ်သည်။
ယင်းနောက် စက်တင်ဘာလ ၄ ရက်နေ့ကလည်း ပုဏ္ဏားကျွန်းရှိ ရှေးဟောင်းသမိုင်းဝင် ဂူဝဘုရားအနီးကို လေကြောင်းနှင့် လက်နက်ကြီးများဖြင့် ပစ်ခတ်ခဲ့၍ ရဟန်းတာ ၅၀၀ ဆင်းတုတော်များ ပျက်စီးခဲ့ရသလို စက်တင်ဘာ ၇ ရက် နံနက်ပိုင်းတွင်လည်း ပုဏ္ဏားကျွန်းမြို့ကို လေကြောင်းမှ ဗုံးကြဲတိုက်ခိုက်ခဲ့သေးသည်။
လက်ရှိတွင် စစ်တွေနှင့် ပုဏ္ဏားကျွန်းနယ်စပ်၌ တိုက်ပွဲများ ပိုမိုပြင်းထန်လာနေသည့်အတွက် အရပ်သားပြည်သူများအနေဖြင့် လေကြောင်းနှင့် ရေကြောင်းရန်များကို အထူးစစ်ရေးသတိထားကြရန် ရက္ခိုင်အမျိုးသားအဖွဲ့ချုပ် (ULA) က သတိပေးနှိုးဆော်ထားသည်။
မဇ္ဈိမ