ကရင်နီပြည်၊ ဖရူဆိုမြို့နယ် အရှေ့ဘက်ခြမ်းရှိ ကျေးရွာတစ်ရွာအနီးကို စစ်အစိုးရတပ်က ဒရုန်းဗုံးကြဲလို့ မြေပဲစိုက်ပျိုးနေတဲ့ ဒေသခံအမျိုးသမီးတစ်ဦး ထိခိုက်ဒဏ်ရာရရှိခဲ့တယ်လို့ ဒေသခံတွေဆီကနေ သိရှိရပါတယ်။
ဒီကနေ့ ဩဂုတ်လ ၃ ရက်နေ့၊ နေ့လည်ခင်းအချိန်မှာ ဖြစ်ပွားခဲ့တာပါ။
“ထိခိုက်သွားသူကတော့ အသက် ၄၀ နီးပါးအရွယ် အမျိုးသမီးတစ်ဦးဖြစ်ပြီး သူ့ရဲ့နောက်ကျောနည်းနည်းရယ်၊ ခြေတလုံးပါပါ ထိခိုက်သွားတယ်” လို့ ကေးလျားမြို့နယ် တာဝန်ရှိသူတစ်ဦးက ကန္တာရဝတီတိုင်း(မ်) ကို ပြောပါတယ်။
ထိခိုက်သွားသူကတော့ အသက်အန္တရာယ် စိုးရိမ်စရာမရှိဘူးလို့ သိရပါတယ်။
စစ်အစိုးရတပ်ဟာ လက်ရှိမှာ ဖရူဆို – ဒီးမော့ဆို – ဘောလခဲ လမ်းမကြီးကို ထိန်းချုပ်ထားဆဲဖြစ်ပြီး စိုက်ပျိုးရေးပြုလုပ်နေကြတဲ့ ဖရူဆိုမြို့နယ်အတွင်းက ဒေသခံတွေကို ဒရုန်း၊ လက်နက်ကြီးတွေနဲ့ မကြာခဏ ပစ်ခတ်လေ့ရှိတယ်လို့ ဒေသခံတွေက ပြောပါတယ်။
ကန္တာရဝတီတိုင်း(မ်)