တိုင်းရင်းသားလက်နက်ကိုင်တော်လှန်ရေးအဖွဲ့အစည်း (၇) ဖွဲ့၏ မဟာမိတ်အဖွဲ့ (7 EAO Alliance)

ရုံးချုပ် – ချင်းမိုင်

အဖွဲ့ခေါင်းဆောင် – ဗိုလ်ချုပ်ကြီး ယွက်စစ် (RCSS)

ဒုတိယအဖွဲ့ခေါင်းဆောင် – နိုင်အောင်မင်း (NMSP)

အထွေထွေအတွင်းအရေးမှူး – ဗိုလ်မှူးကြီးစိုင်းငင်း (RCSS)

တွဲဖက်အထွေထွေအတွင်းရေးမှူး – ဗိုလ်မှူးကြီးစောကျော်ညွန့် (KPC)

စေ့စပ်ညှိနှိုင်းရေးမှူး – ဦးမျိုးဝင်း

ကိုယ်စားပြုအဖွဲ့ – RSSS/SSA၊ NMSP၊ KPC၊ DKBA၊ LDU၊ ALP၊ PNLO

Facebook – https://www.facebook.com/ncasignatoryeaoofficial

တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) အရ ဖြစ်တည်လာသည့် ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) ၏ အခန်းကဏ္ဍ တခန်းရပ်သွားပြီးနောက် နွေဦးတော်လှန်ရေးအင်အားစုများဘက်တွင် ပါဝင်လာခြင်းမရှိသည့် တိုင်းရင်းသားလက်နက်ကိုင်အဖွဲ့များက (7 EA) ကို ပြန်လည်စုဖွဲ့ထားခြင်းဖြစ်သော်လည်း 7EA ၏ ဖြစ်တည်မှုနှင့် 7EA အတွင်း ပါဝင်နေသည့် အဖွဲ့အစည်းများ၏ ဖြစ်တည်မှုသည် မေးခွန်းထုတ်စရာအချို့ရှိနေပါသည်။ အထူးသဖြင့် 7EA ထဲမှ LDU၊ ALP နှင့် PNLO တို့သည် ၎င်းတို့၏ အဖွဲ့အစည်းတွင်း ကွဲအက်ပြိုပျက်ကာ မူလအဖွဲ့မှ ခွဲထွက်ထားသည့် အစုအဖွဲ့များဖြစ်နေသည်ကို တွေ့ရသည်။ အာဏာသိမ်းစစ်အုပ်ကမူ 7EA ကို အသိအမှတ်ပြုထားပြီး 7EA အတွင်းရှိ တစ်ဖွဲ့ချင်းစီသော်လည်း အုပ်စုလိုက်သော်လည်းကောင်း ထိတွေ့ဆက်ဆံလျက်ရှိပါသည်။

7EA အနေဖြင့် NCA ကို ဆက်လက်ကိုင်စွဲထားဆဲဖြစ်သော်လည်း ၂၀၂၅ ခုနှစ် ဧပြီလ ၂၉ ရက်မှ ၃၀ ရက်နေ့အထိ ပြလုပ်ခဲ့သည့် (၄/၂၀၂၅) ဦးဆောင်အစည်းအဝေးအတွင်း လက်ရှိကြုံတွေ့နေရသည့် နိုင်ငံရေးအကြပ်အတည်းကို ကျော်လွှားနိုင်ရေးအတွက် ၎င်းတို့ချမှတ်ထားသည့် ဖက်ဒရယ်ဒီမိုကရေစီအသွင်ကူးပြောင်းရေးအစီအစဉ်ကို ပြန်လည်သုံးသပ်ကာ “ပဋိပက္ခတွင် ပါဝင်သူအဖွဲ့များအားလုံးသည် တနိုင်ငံလုံးအတိုင်းအတာဖြင့် ကြိုတင်စည်းကမ်း သတ်မှတ်ချက်မရှိဘဲ အပစ်ရပ်ကြေညာရန်၊ သက်ဆိုင်သူများအကြား ဖက်ဒရယ်ဒီမိုကရေစီပြည်ထောင်စု တည်‌‌ဆောက်ရေးဆိုင်ရာ ကတိကဝတ်ပြုရန်၊ ဖက်ဒရယ်ဒီမိုကရေစီ အသွင်ကူးပြောင်းရေး အစိုးရဖွဲ့စည်းရန်၊ ဖက်ဒရယ်ဒီမိုကရေစီပြည်ထောင်စု ဖွဲ့စည်းပုံအခြေခံဥပဒေ ရေးဆွဲရန်၊ ဖက်ဒရယ်ဒီမိုကရေစီ ဖွဲ့စည်းပုံအခြေခံဥပဒေနှင့်အညီ ရွေးကောက်ပွဲကျင်းပရန်” ဟူသော အဆိုပြုချက် (၅) ချက်ကို ချမှတ်ခဲ့သည်။

သို့သော် အာဏာသိမ်းစစ်အုပ်စုက အဆိုပါအဆိုပြုချက် (၅) ချက်ကို အရေးတယူပြုမူခြင်းမရှိဘဲ လစ်လျူရှုထားသည်ဟု ဆိုပါသည်။ ^[1]

၂၀၂၆ ခုနှစ်၊ ဇွန်လ ၉ ရက်မှ ၁၀ ရက်အထိ (၂) ရက်တာပြုလုပ်ခဲ့သည့် အာဏာသိမ်းစစ်အုပ်စုလက်အောက်ခံ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် 7EA အကြား အလွတ်သဘောတွေ့ဆုံမှုတွင်တော့ ငြိမ်းချမ်းရေးလုပ်ငန်းစဉ်ကို လက်ရှိအခြေအနေများနှင့်အညီ ပြန်လည်ဖော်ဆောင်နိုင်ရေး၊ ငြိမ်းချမ်းရေးလုပ်ငန်းစဉ်တွင် ပါဝင်သင့်သောအဖွဲ့အစည်းများ ပါဝင်လာနိုင်စေရေးနှင့် ရေရှည်တည်တံ့သော ငြိမ်းချမ်းရေးတည်ဆောက်နိုင်ရေးအတွက် ရည်မှန်းပြီး ငြိမ်းချမ်းရေးလုပ်ငန်းစဉ်ကို ဆောင်ရွက်ရန်ဟူသော သဘောထားကိုသာ  7EA ၏ ဆွေးနွေးညှိနှိုင်းရေးအဖွဲ့ခေါင်းဆောင် ဗိုလ်မှူးကြီးစိုင်းငင်းက တင်ပြခဲ့သည်။ ၂၀၂၆ ခုနှစ် ဇူလိုင်လ ၂၀ ရက်နှင့် ၂၁ ရက်နေ့များတွင်တော့ ငြိမ်းချမ်းရေးလုပ်ငန်းစဉ်ဆိုင်ရာ ပြန်လည်သုံးသပ်ခြင်းဆွေးနွေးပွဲကို NSPNC နှင့် 7EA အကြား ပြုလုပ်ခဲ့သည်ကို တွေ့ရသည်။

ထို့ကြောင့် 7 EA အနေဖြင့် NCA ကို အခြေခံသော ငြိမ်းချမ်း‌ရေးလုပ်ငန်းစဉ်အား လက်ရှိအခြေအနေနှင့် ကိုက်ညီမှုမရှိတော့ကြောင်း နားလည်လက်ခံလာသည့်သဘောရှိသော်လည်း အာဏာသိမ်းစစ်အုပ်စုနှင့်သာ ထိတွေ့ဆက်ဆံရေးကို ရွေးချယ်ထားသည့်သဘော တွေ့ရှိရပါသည်။

^[1] အပစ်ရပ် တိုင်းရင်းသားလက်နက်ကိုင်အဖွဲ့အစည်း (၇) ဖွဲ့ (7 EAO Alliance) ၏ အဆိုပြုချက်တို့ကို စစ်ကောင်စီ အရေးမလုပ်ဟုဆို ၊ လွတ်လပ်သောမွန်သတင်းအေဂျင်စီ၊ ၂၀ မေ ၂၀၂၅

Reference: မြန်မာ့ငြိမ်းချမ်းရေး လုပ်ငန်းစဉ်ကို ပုံဖော်ခြင်း – လမ်းညွှန်အကိုးအကား ၂၀၂၅– ၂၀၂၆