ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA) ထိပ်ပိုင်းခေါင်းဆောင်များက သျှမ်းမြောက်ဒေသရှိ အောက်ခြေတပ်ဖွဲ့ဝင် (၄,၀၀၀) ကျော်ကို တွေ့ဆုံမှုပြုလုပ်ခဲ့ကြောင်း SSPP info က ထုတ်ပြန်ခဲ့သည်။
ထိုထုတ်ပြန်ချက်တွင် ဗဟိုဌာနချုပ် ထိပ်ပိုင်းခေါင်းဆောင်များသည် ပြီးခဲ့သည် သြဂုတ်လ နှောင်းပိုင်းမှ စက်တင်ဘာ နှောင်းပိုင်းအထိ သျှမ်းမြောက်ဒေသရှိ တပ်ဖွဲ့ဝင်များနှင့် တွေ့ဆုံခဲ့ကြောင်းရေးသားထားသည်။
သို့သော်လည်း ပြီးခဲ့သည့် စက်တင်ဘာ ၂၇ ရက်တွင် ကျောက်မဲမြို့နယ် တော့ဆန်ကျေးရွာအုပ်စုအတွင်း SSPP နှင့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) အောက်ခြေတပ်ဖွဲ့ဝင်များ စကားများရာမှ သေနတ်ပစ်ခတ်မှုဖြစ်ပွားကာ TNLA ဘက်မှ တပ်သား ၂ ဉီး သေဆုံးခဲ့ကြောင်းနောက်ပိုင်း (အောက်တိုဘာ ၂) ရက်မှာ ထုတ်ပြန်လာသည်။
အဆိုပါ ထိပ်ပိုင်းခေါင်းဆောင်ဖြစ်သည့် ဒုတိယ စစ်ဉီးစီးချုပ် (၁) ဒုဗိုလ်ချုပ်ကြီး စဝ်ငေါင်းဖ၊ ဒုစစ်ဉီးစီးချုပ် (၂) ဒုဗိုလ်ချုပ်ကြီး စဝ်ပင်းမိန်းတို့က ဉီးဆောင်ပြီး သျှမ်းပြည်မြောက်ပိုင်း ကျောက်မဲ၊ သီပေါ၊ နမ္မတူ၊ မူဆယ်နှင့်နမ့်ခမ်းဘက်ရှိ SSPP တပ်ဖွဲ့ဝင်များကို သွားရောက်တွေ့ဆုံခဲ့ကြောင်း ရေးသားထားသည်။
ထိုတွေ့ဆုံမှုတွင် လုံခြုံရေးနှင့် ကာကွယ်ရေး၊ အမျိုးသားရေး၊ တပ်နှင့် ပြည်သူအကြား စည်းလုံးညီညွတ်ရေး၊ လက်ရှိ ပြည်တွင်းနိုင်ငံရေးနှင့် စစ်ရေးအခြေအနေများကို ဆွေးနွေးခဲ့ကြောင်း သိရသည်။
ထို့ပြင် မြေပြင်တွင် တာဝန်ထမ်းနေသည့် အောက်ခြေတပ်ဖွဲ့ဝင်များကို စိတ်ဓာတ်အားပေးမြှင့်တင်ပေးခြင်း၊ သျှမ်းပြည်တပ်မတော်၏ မူဝါဒများနှင့် ရှေ့လုပ်ငန်းစဉ်များအချို့ကိုလည်း အောက်ခြေအဆင့်အထိ သဘောပေါက်နားလည်စေရန် ရှင်းလင်းပေးခြင်းနှင့် လိုအပ်သည့် လက်နက်ခဲယမ်းများနှင့် စစ်ရေးအသုံးအဆောင်စာရင်းများကို ပြုစုခြင်း စသည့်ကိစ္စရပ်များကို ဆွေးနွေးခဲ့ကြကြောင်း သိရသည်။
သျှမ်းသံတော်ဆင့်