အိန္ဒိယနိုင်ငံမှာ လက်ရှိခိုလှုံနေတဲ့ မြန်မာနိုင်ငံသား ၈၅,၀၀၀ ခန့်ကို ၎င်းတို့ရဲ့ နေရပ်ဒေသတွေကို လုံခြုံစွာ ပြန်မသွားနိုင်တဲ့အချိန်ထိ အိန္ဒိယအစိုးရအနေဖြင့် အတင်းအဓမ္မ ပြန်လည်နှင်ထုတ်မှာမဟုတ်တဲ့ကြောင်း မနေ့ ဇူလိုင်လ ၂၆ ရက်နေ့က ကလေးမြို့ သိမ့်ဟိုတယ်ခန်းမတွင် ဖလမ်း၊ တီးတိန်က လူကြီးတချို့နဲ့ တွေ့ဆုံစဉ် အိန္ဒိယသံအမတ်ကြီး Abhay Thakur က ပြောကြားခဲ့တယ်လို့ သိရပါတယ်။
အိန္ဒိယသံအမတ်ကြီး Abhay Thakur ဟာ အိန္ဒိယ-မြန်မာ-ထိုင်း သုံးနိုင်ငံချိတ်ဆက်လမ်းမကြီးဆိုင်ရာ ကိစ္စရပ်များအတွက် ကလေးမြို့ သိမ့်ခန်းမတွင် မနေ့ ဇူလိုင်လ ၂၆ ရက်နေ့က တွေ့ဆုံဆွေးနွေးပွဲကျင်းပခဲ့အပြီး ချင်းပြည်နယ် ဖလမ်းမြို့၊ တီးတိန်မြို့ ဒေသဘက်က လူကြီးတချို့နဲ့ ခရစ်ယာန်ဓမ္မအမှုတော်ဆောင်တချို့နဲ့ ညနေ ၆ ခွဲကနေ ၈ နာရီအထိ တွေ့ဆုံဆွေးနွေးတာတွေလုပ်ခဲ့တယ်လို့ တွေ့ဆုံပွဲတွင် ပါဝင်သူတစ်ဦးက ပြောပါတယ်။
တွေ့ဆုံဆွေးနွေးပွဲတွင် ပါဝင်ခဲ့သူတစ်ဦးက “တွေ့ဆုံပွဲမှာ အိန္ဒိယသံအမတ်ကြီးက ချင်းပြည်နယ်မှာ တည်ငြိမ် အေးချမ်းမှု အမှန်တကယ်ရှိတဲ့အချိန် အိန္ဒိယနိုင်ငံအနေနဲ့ ပူးပေါင်းလုပ်ဆောင်စရာ လုပ်ငန်းများစွာရှိတဲ့ကြောင်းနဲ့ ချင်းပြည်သူတွေနဲ့ ဆက်လက်ပူးပေါင်းဆောင်ရွက်လိုကြောင်းတွေ နောက်ပြီး ကျနော်တို့ဘက်ကနေ စစ်ဘေးရှောင်တွေအတွက် လူသားချင်းစာနာထောက်ထားမှုအကူအညီတွေ ပံ့ပိုးပေးနိုင်ရေးတို့အတွက် တင်ပြတောင်းဆိုတာတွေ ရှိခဲ့တယ်” လို့ ပြောပါတယ်။
အိန္ဒိယသံအမတ်ကြီးနဲ့တွေ့ဆုံစဉ် ဖလမ်းနှင့် တီးတိန်ဒေသ ကိုယ်စားလှယ်များက ချင်းပြည်သူများရဲ့ လက်ရှိအခြေအနေ၊ စစ်ဘေးရှောင်ပြည်သူများရဲ့ အခက်အခဲများနှင့် ကလေးမြို့သို့ တိမ်းရှောင်နေကြရသည့် အခြေအနေများကို ရှင်းလင်းတင်ပြခဲ့ကြတဲ့အပြင် Dr. Run Bik က ဖလမ်းမြို့နယ်ဒေသရှိ ကျေးရွာ ၄၂ ရွာမှ အိမ်ထောင်စု ၂,၀၀၀ ခန့်သော စစ်ဘေးရှောင်ပြည်သူများအတွက် စိုက်ပျိုးရေးလုပ်ငန်းများ မဆောင်ရွက်နိုင်သည့် အခက်အခဲများကြောင့် လူသားချင်းစာနာထောက်ထားမှုအကူအညီများ ပံ့ပိုးပေးနိုင်ရေးကို တင်ပြတောင်းဆိုခဲ့တယ်လို့လည်း သိရပါတယ်။
Chin World