တနင်္သာရီတိုင်းတွင် ပြီးခဲ့သည့်မေလအတွင်း စစ်ကောင်စီတပ်နှင့် လက်နက်ကိုင်တော်လှန်ရေးအင်အားစုများကြား တိုက်ပွဲများအပြင် စစ်ကောင်စီတပ်က ရေကြောင်းနှင့် လေကြောင်းပစ်ခတ်တိုက်ခိုက်မှုကြောင့် နေရပ်စွန့်ခွာထွက်ပြေးတိမ်းရှောင်ခဲ့ရသူ ၈၀,၀၀၀ ကျော်အထိရှိလာကြောင်း သိရသည်။
ပြီးခဲ့သည့် မေလအတွင်း စစ်ကောင်စီတပ်က ထားဝယ်ရေနက်ဆိပ်ကမ်းကို စစ်ကြောင်းထိုးဝင်ရောက်သည့်အပြင် ကျေးရွာများကို ပစ်မှတ်ထားတိုက်ခိုက်ခြင်း၊ အရပ်သားများကိုဖမ်းဆီးမှုကြောင့် နေရပ်စွန့်ခွာ ထွက်ပြေးတိမ်းရှောင်ခဲ့ရသူ ၈၀,၈၀၀ ကျော်အထိ တိုးလာခဲ့သည်ဟု ဒေသတွင်းသုတေသနအဖွဲ့ FE 5 Thanintharyi က ပြောသည်။
ထားဝယ်ခရိုင်အတွင်းရှိ ထားဝယ်၊ လောင်းလုံး၊ ရေဖြူနှင့် သရက်ချောင်းမြို့နယ်တို့တွင် နေရပ်စွန့်ခွာထွက်ပြေး တိမ်းရှောင်ရသူ အရပ်သားပြည်သူ အနည်းဆုံး ၄၁၈၀၀ ကျော်ရှိခဲ့သည်ဟု FE 5 Thanintharyi က ဆိုသည်။
မြိတ်ခရိုင်အတွင်းရှိ ပုလော၊ တနင်္သာရီ၊ မြိတ်နှင့် ကျွန်းစုမြို့နယ်တို့တွင်လည်း နှစ်ဖက်တိုက်ပွဲဖြစ်များအပြင် လက်နက်ကြီး ပစ်ခတ်တိုက်ခိုက်မှုကြောင့် နေရပ်စွန့်ခွာခဲ့ရသူ အနည်းဆုံး ၃၇၀၀၀ ကျော်ရှိခဲ့ကြောင်း သိရသည်။
ယင်းအပြင် ကော့သောင်းခရိုင် ဘုတ်ပြင်းမြို့နယ်တွင်လည်း စစ်ကောင်စီတပ်၏ စစ်ကြောင်းထိုးဝင်ရောက်မှုနှင့် လက်နက်ကြီးပစ်ခတ်မှုတို့ကြောင့် ပြည်သူ ၂၀၀၀ နီးပါး နေရပ်စွန့်ခွာခဲ့ရသည်ဟု FE 5 Thanintharyi က ဖော်ပြထားသည်။
တဖက်တွင်လည်း ထားဝယ်အရှေ့တောဒေသ၊ သရက်ချောင်းမြို့နယ် တောင်ပျောက်တိုက်နယ်၊ တနင်္သာရီနှင့် ပုလောမြို့နယ်တို့တွင် စစ်ကောင်စီဘက်က ဆန်၊ ရိက္ခာနှင့် ဆေးဝါးသယ်ယူခွင့်တို့ကို ကန့်သတ်ထားကြောင်း သိရသည်။
တနင်္သာရီတိုင်းအတွင်းရှိ စစ်ဘေးရှောင်များသည် ငှက်ဖျား၊ သွေးလွန်တုပ်ကွေး၊ ဝမ်းရောဂါနှင့် အရေပြားရောဂါတို့ အဖြစ်များနေပြီး ဆေးဝါးမလုံလောက်မှုကိုပါ ကြုံတွေ့နေရသည့်အပြင် ရက်ရှည် စစ်ဘေးရှောင်ရသဖြင့် မိုးရွာချိန်တွင် အမိုးအကာ မလုံလောက်မှုကြောင့် ပိုမိုဒုက္ခရောက်နေကြကြောင်း FE 5 Thanintharyi ၏ အစီရင်ခံစာ၌ ဖော်ပြထားပါတယ်။
ပြီးခဲ့သည့် ဧပြီလအတွင်းကလည်း တနင်္သာရီတိုင်းတွင် တိုက်ပွဲနှင့် လေကြောင်းတိုက်ခိုက်မှုတို့ကြောင့် နေရပ်စွန့်ခွာ ထွက်ပြေးတိမ်းရှောင်ခဲ့ရသူ ၇၅,၃၀၀ ကျော်အထိရှိခဲ့ကြောင်း သိရသည်။
သံလွင်တိုင်းမ် ပေးပို့သည်။
