ရန်ကုန်မြို့ပေါ်တွင်ဆိုလည်း ဟုတ်သည်။ မြောင်းမြမြို့တွင်ဆိုလည်း ဟုတ်သည်။ မြန်မာပြည် မြောက်ဖျားပိုင်းက ပူတာအိုတွင်ဆိုလည်း ဟုတ်နေပြန်သည်။ မြဝတီနှင့် ဘားအံတွင်ဆိုလည်း ပုံစံတမျိုးဖြင့် စစ်ကျွန်ဇာတ်သွင်းရန် ကြိုးပမ်းလာနေသည်။ မြန်မာပြည်အလယ်ပိုင်းက မြင်းခြံမြို့တွင်ဆိုလည်း အိမ်ပေါ်အထိတက်ကာ ဆွဲခေါ်လာသည့် လူဖမ်းပွဲများ ရမ်းကားနေသည်ကို တွေ့ရသည်။
စစ်အာဏာသိမ်းကာလ ကြာမြင့်လာသည်နှင့်အမျှ နိုင်ငံတဝှမ်းစစ်မျက်နှာအစုံဖွင့်ခံနေရသည့် အာဏာသိမ်းစစ်တပ်သည် ၎င်းတို့တပ်သားအင်အားပြုန်းတီးမှုအား ပြန်လည်ဖာထေးနိုင်ဖို့အတွက် စစ်မှုထမ်းဥပဒေကို အသက်သွင်းကာ အသက် (၁၈) နှစ်မှ (၃၅) နှစ်အတွင်း လူငယ်များကို ပစ်မှတ်ထားခဲ့သည်။ သို့သော် လူငယ်များအနေဖြင့်လည်း နိုင်ငံခြားထွက်ခြင်း၊ လွတ်မြောက်နယ်မြေများသို့ ထွက်ပြေးတိမ်းရှောင်ခြင်း၊ ငွေကြေးဖြင့်ဖြေရှင်းခြင်း၊ လူစားထိုးခြင်း စသော နည်းလမ်းမျိုးစုံအသုံးပြုကာ အာဏာသိမ်းစစ်အုပ်စု၏ စစ်ကျွန်ပြုမခံရရေးအတွက် ရုန်းကန်ခဲ့ကြသည်။
ထို့ကြောင့် အာဏာသိမ်းစစ်အုပ်စုအနေဖြင့်လည်း ဥပဒေအရ စစ်မှုထမ်းဥပဒေပြင်ပမှ အတင်းအဓမ္မဖမ်းဆီးခြင်း၊ မက်လုံးပေးမြူဆွယ်စုဆောင်းခြင်း စသောနည်းလမ်းများဖြင့် ၎င်းတို့၏ စစ်မှုထမ်းသင်တန်း အပတ်စဉ် (၂၈) အထိ ရောက်ရှိကာ ခန့်မှန်းခြေစစ်မှုထမ်းတပ်သားသစ် သိန်းဂဏန်းအထိ ရရှိသွားခဲ့ပြီဖြစ်သည်။ (စစ်မှုထမ်းအပတ်စဉ်တစ်ခုလျှင် သင်တန်းသား (၅၀၀၀) သတ်မှတ်ထားသော်လည်း အာဏာသိမ်းစစ်အုပ်စုအနေဖြင့် သင်တန်းသားအရေအတွက်ကို ပြည်သူလူထုထံ အသိပေးခြင်းမရှိသေးပါ)
ယခုတပတ် BNI-Myanmar Peace Monitor ၏ သတင်းသုံးသပ်ချက်တွင် မြန်မာပြည်တဝှမ်း ပိုမိုဆိုးဝါးလာနေသော မြန်မာလူငယ်များအား စစ်ကျွန်ဇာတ်သွင်းမည့် လူဖမ်းပွဲများအကြောင်းနှင့် ဟန့်တားနိုင်မည့်နည်းလမ်းများအကြောင်းကို လက်လှမ်းမီသမျှ လေ့လာတင်ပြသွားပါမည်။
ပိုမိုဖတ်ရှုရန် ဒေါင်းလုပ်ကူးယူပါ>>>
