ကရင်နီပြည်၊ ဖရူဆိုမြို့နယ်အတွင်းရှိ တောင်ယာခင်းတခုအတွင်း နိုဝင်ဘာလ ၁၆ ရက်၊ မွန်းလွှဲ ၁၂ နာရီခွဲ ဝန်းကျင်မှာ အာဏာသိမ်းသိမ်းစစ်တပ်က ဒရုန်းတစီးနဲ့ တိုက်ခိုက်ခဲ့လို့ မြေပဲသိမ်းယူနေတဲ့ စစ်ဘေးရှောင်တွေထဲက အသက် ၂၉ နှစ် အရွယ် အမျိုးသမီးတဦးက ပေါင်နဲ့ ညာဖက်ရင်ဘတ်ထိမှန်လို့ ဒဏ်ရာပြင်းထန်တယ်လို့ စစ်ဘေးရှောင်တွေဆီကနေ သိရှိရပါတယ်။
“ပထမ လာတဲ့အခေါက်မှာပဲ တောင်ယာခင်းမှာ မြေပဲသိမ်းနေတာ ကြဲချတာ၊ သူတို့ သုံးယောက်ရှိတယ်၊ အမျိုးသမီးတဦးတည်းပဲ ထိသွားတယ်ပေါ့နော်” လို့ မျက်မြင်သက်သေ စစ်ဘေးရှောင်တဦးက ပြောပါတယ်။
အဆိုပါ စစ်ဘေးရှောင်အမျိုးသမီးနဲ့အတူ တောင်ယာခင်းမှာ မြေပဲသိမ်းယူနေကြတာ သုံးဦးရှိပြီး အမျိုးသမီးတဦးကို ဒရုန်းဗုံးစမှန် ထိမှန်သွားတာ ဖြစ်ပါတယ်။
“သူ့ပေါင်ကတော့ ဖြောင်ထွက်သွားတယ်၊ ညာဘက် ရင်ဘတ်မှာတော့ ကျည်စက အထဲမှာ ကျန်ခဲ့လောက်တယ်” လို့ အဆိုပါ မျက်မြင်သက်သေ စစ်ဘေးရှောင်တဦးက ဆက်ပြောပါတယ်။
စစ်ဘေးရှောင်တွေဟာ စက်တင်ဘာလကနေစပြီး စိုက်ပျိုးထားတဲ့ သီးနှံတွေကို ပြန်လည်ရိတ်သိမ်းနေကြရတာပါ။
ဖရူဆိုမြို့နယ်အတွင်းမှာတော့ မြေပဲဟာ ဒုတိယအများဆုံး စိုက်ပျိုးတဲ့ သီးနှံဖြစ်ပြီး ဒေသခံနဲ့ စစ်ဘေးရှောင်တွေက စားဝတ်နေရေးအတွက် လုံခြုံရေးစိုးရိမ်မှုကြားကနေ တောင်ယာခင်းထဲကို မဖြစ်မနေ သွားရောက်ရိတ်သိမ်းကြတာ ဖြစ်ပါတယ်။
ယခုရက်ပိုင်းအတွင်း ဖရူဆို – ဘောလခဲ လမ်းမကြီးတလျှောက်မှာ အာဏာသိမ်းသိမ်းစစ်တပ်က စစ်ကြောင်းထိုးနေပြီး တော်လှန်ရေးတပ်ဖွဲ့တွေနဲ့ ထိတွေ့တိုက်ပွဲတွေ ရှိနေတယ်လို့ ဒေသခံတွေက ပြောပါတယ်။
ကန္တာရဝတီတိုင်း(မ်)