ရခိုင်ပြည်အနှံ့အပြားတွင် ဗုံးကြဲမှုများအပေါ် အာရက္ခတပ်တော်က လက်တုံ့ပြန်မည်ဟု သတင်းထွက်ပေါ်လာပြီးနောက် အာဏာသိမ်းစစ်တပ်မှ ရခိုင်ပြည်မှ ကျောက်ဖြူနှင့် စစ်တွေတွင် တပ်အင်အားများကိုထပ်မံဖြည့်တင်းနေသည်ဟု သတင်းရရှိသည်။
“အခုတလော စကမ က ရခိုင်ပြည်က အရပ်သားနေရာတွေကို လေကြောင်းကနေ ပိုမို ပစ်မှတ်ထား တိုက်ခိုက်လာတယ်။ နေ့တိုင်းလိုလို ရခိုင်မှာ ဗုံးကြဲမှုတွေရှိနေတယ်။ ဒီအပေါ်မှာ AA ကလည်း လက်တုံ့ပြန်မယ်လို့ ပြောဆိုထားတဲ့ စကားတွေထွက်နေတော့ စိုးရိမ်ပြီး စစ်တွေနဲ့ ကျောက်ဖြူကို စစ်အင်အားတွေ အလုံးအရင်းနဲ့ အင်အားတွေဖြည့်တင်းနေတာကို တွေ့နေရပါတယ်” ဟု စစ်ရေးရင်းမြစ်တစ်ဦးက နိရဉ္စရာကို ပြောသည်။
အကြမ်းဖက်စစ်တပ်သည် စစ်တွေမြို့တွင်အင်အား ၂၀၀ ဝန်းကျင်ခန့်ကို ဇူလိုင် ၂၁ ရက်နေ့ကရေကြောင်းမှဖြည့်တင်းခဲ့သလိုနေရာအချို့တွင်လည်းခံကတုတ်များ၊ ပစ်ကျင်းများကို တိုးချဲ့ တည်ဆောက်ခဲ့သည်ဟု ၎င်းက ဆက်လက်ပြောဆိုသည်။
“အကြမ်းဖက်စစ်တပ်က စစ်တွေမြို့နယ် အမြင့်ကျွန်း၊ ရေချမ်းပြင်၊ ရွှေမင်းဂံ၊ ကျားမသောက် စတဲ့ကျေးရွာတွေမှာ ကာကင်းတွေ၊ ကတုတ်ကျင်းတွေ တိုးချဲ့တည်ဆောက်နေတယ်။ တည်ဆောက်တဲ့နေရာတွေမှာလည်း စခန်းစခန်းသစ်တွေ နေရာချဲ့ပြီးထပ်မံပြုလုပ်နေတာကိုတွေ့ရတယ်။ သူတို့က ထိုးစစ်ထက် ခံစစ်ကိုပြင်နေတာကို တွေ့နေရပါတယ်” ဟု ပြောသည်။
CDM ဗိုလ်ကြီးဇင်ယော်ကလည်း အကြမ်းဖက်စစ်တပ်အနေဖြင့် ပုဏ္ဏားကျွန်းမြို့နယ်သို့ ထိုးစစ်ရန် အခြေအနေမရှိသေးကြောင်း၊ ထိုးစစ်ဆင်မည့်လုပ်ရပ်မှာလည်း ယောင်ပြလုပ်ဆောင်ခြင်းသာဖြစ်ကြောင်း များမကြာမီက စစ်ရေးသုံးသပ်ချက်တစ်ခုတွင် ဖော်ပြထားသည်။
၎င်းပြင် အကြမ်းဖက်မြန်မာစစ်တပ်မှ လူအင်အား၊ လက်နက်အင်အားများကို စစ်တွေ၌ ဖြည့်တင်းရာတွင်လည်း လူခြေတိတ်ချိန်တွင် ညအချိန်မှ ပြုလုပ်လေ့ရှိသည်ဟု သိရသည်။
“သူတို့လူအင်အား၊ လက်နက်အင်အားတွေကို နေ့ခင်းဘက်ကုန်းပေါ်ကို မတင်ဘူး။ စစ်တွေနားရောက်နေလည်း မြစ်လယ်မှာ နေဗီကိုရပ်ပြီး ညမှတင်တယ်။ လူတင်လူချလုပ်ရင် ညအချိန် စစ်ကားတွေသွားတာကိုကြည့်ပြီး သိရပါတယ်။ ဒီ ၂၁ ရက်နေ့ညက ကမ်းနားလမ်းမှာ စစ်ကားတွေအများကြီးသွားတာတွေ့ရတယ်။ ကားပေါ်မှာ စစ်သားတွေတော်တော်မျာတင်သွားတယ်” ဟု စစ်တွေဒေသခံတစ်ဦးက ပြောသည်။
အလားတူ ဇူလိုင် ၂၁ ရက်နှင့် ၂၂ ရက်နေ့များတွင် ကျောက်ဖြူ တောင်မော်ဦးရေတပ်ကို ပို့ဆောင်ရေးစစ်ရေယာဉ်များဖြင့် လူအင်အား ၂၀၀ ခန့်ကို ဖြည့်တင်းပြီးနောက် အပြန်တွင် ဒဏ်ရာရစစ်သည်များကို ရန်ကုန်သို့ ပြန်လည်ခေါ်ဆောင်သွားသည်ဟု စစ်ရေးရင်းမြစ်များက နိရဉ္စရာကို ပြောသည်။
ကျောက်ဖြူမြို့နယ် တောင်မောင်ဦးရေတပ်မှ အာဏာသိမ်းမြန်မာစစ်တပ်မှ ထိုးစစ်ပြုလုပ်ရာတွင်လည်း စစ်တပ်က အကျအဆုံးများသဖြင့် အောင်မြင်မှုမရဘဲ တိုက်ပွဲရပ်နားနေပြီးနောက် တောင်မော်ဦးရေတပ်နှင့် ကျောက်ဖြူ နောက်တန်းတပ်ရင်းများတွင် လက်နက်အင်အား၊ လူအင်အားထပ်ဖြည့်နေကြောင်း ကျောက်ဖြူဒေသခံ စစ်ရေးရင်းမြစ်တစ်ဦးက နိရဉ္စရာကိုပြောသည်။
“ဒီရက်ပိုင်းတိုက်ပွဲက ရပ်နေတယ်။ ဒါပေမဲ့ တောင်မော်ဦးဖက်မှာတော့ ရေကြောင်းကနေ လူသစ်ထပ်တင်တယ်။ ပြီးတော့ ကျောက်ဖြူမြို့ဆေးရုံ၊ ခလရ ၃၄၊ တောင်မော်ဦးက ဒဏ်ရာရတဲ့သူတွေ နေဗီနဲ့ ရန်ကုန်ကို ပြန်ယူတယ်” ဟု ပြောသည်။
နိရဉ္စရာ