ကလေးမြို့တွင် စစ်မှုထမ်းဥပဒေကြောင့် လူငယ် ၂၀၀ နီးပါး ဖမ်းဆီးခံရ

0
71
ပုံစာ - ကလေးမြို့တွင်းတစ်နေရာ။

စစ်ကိုင်းတိုင်း၊ ကလေးမြို့တွင် စစ်ကောင်စီ၏ စစ်မူထမ်းဥပဒေကြောင့် လူငယ် ၂၀၀ နီးပါး ဖမ်းဆီးခံရသည်ဟု ကလေးမြို့လူထုတိုက်ပွဲ ဦးဆောင်ကော်မတီက ဖေဖော်ဝါရီလ ၆ ရက်နေ့တွင် ထုတ်ပြန်သည်။

စစ်ကောင်စီသည် ဆိုင်ဘာလုံခြုံရေးဥပဒေကို ပြဌာန်းလိုက်ပြီးနောက် သူတို့ထိန်းချုပ်သည့်ဒေသများတွင် ခိုင်လုံသည့် အကြောင်းပြချက်မရှိဘဲ လူငယ်များအားလိုက်လံဖမ်းဆီးရာ၌ ကလေးမြို့တွင်လည်း မြို့ပြလူနေ ရပ်ကွက်များသာမက ဘာသာရေးအဆောက်အအုံ ပရဝုဏ်များအထိပါ လိုက်လံဖမ်းဆီးနေသည်ဟု ကလေးမြို့လူထုတိုက်ပွဲဦးဆောင်ကော်မတီက ဆိုသည်။

ပြီးခဲ့သည့်ရက်ပိုင်းကလည်း ကလေးမြို့အနီး ဘုံတောကျေးရွာတွင် နေထိုင်သူအမျိုးသမီးတစ်ဦး စစ်ကောင်စီ၏ ဖမ်းဆီးမှုခံခဲ့ရပြီး၊ စစ်မှုထမ်းအပတ်စဉ် ၉ အတွက် ပို့ဆောင်ရန် စီစဉ်ခဲ့ကြသော်လည်း ဗိုက်ခွဲဒဏ်ရာကြောင့် ကျပ်ငွေဆယ့်ငါးသိန်း ပေးဆောင်ခိုင်းကာ ပြန်လွတ်ပေးခဲ့သည်ဟု အဆိုပါအမျိုးသမီးနှင့် နီးစပ်သူတစ်ဦးက ပြောသည်။

“သူကတော့ လူငယ်ပိုင်းပဲ ရှိသေးတယ်။ မြို့ထဲသွားတုန်းမှာ စစ်မှုထမ်းဖို့အတွက် ဆွဲခံရတာ အစာအိမ်မကောင်းလို့ ဗိုက်ခွဲထားတာ။ ဗိုက်ခွဲထားတဲ့ဒဏ်ရာရှိလို့ သုံးလို့မရဘူးလို့ပြောပြီ ဆယ့်ငါးသိန်းနဲ့ ပြန်ရွေး ခိုင်းတာ အခုတော့ ပြန်လွတ်လာပြီ။ အခုတလော ဖမ်းဆီးခံရတာက များတယ်၊ သိတာတွေရော၊ မသိတာတွေရောဆိုတော့ ဆွဲမှာကိုပဲ ကြောက်နေရတာ” ဟု ၎င်းကပြောသည်။

ကလေးဒေသအတွင်း စစ်ကောင်စီ၏ စစ်မှုထမ်းဥပဒေကြောင့် ဖမ်းဆီးခံရမှုမှာ စစ်မူထမ်းအပတ်စဉ် (၆) တွင် လူငယ် (၄၅) ဦး၊ အပတ်စဉ် (၇) တွင် (၅၀) ဦး၊ အပတ်စဉ် (၈) တွင် (၃၀) ဦးနှင့် ၂၀၂၅ ခုနှစ် ဇန်နဝါရီလနှင့် ဖေဖော်ဝါရီလအတွင်း အပတ်စဉ် (၉) တွင် (၆၀) ဦး စုစုပေါင်း (၁၈၅) ဦးအထိ ဖမ်းဆီးခံရသည်ဟု ဖော်ပြထားသည်။

ယခုစာရင်းသည် မြေပြင်အချက်အလက်နှင့် အနီးစပ်ဆုံးကောက်ယူထားခြင်းဖြစ်ပြီး ယခုထက်လည်း ပိုများနိုင်သည်ဟု ဆိုသည်။

လက်ရှိတွင် စစ်ကောင်စီ၏ စစ်မူထမ်းသင်တန်း အပတ်စဉ် (၉) အထိ ရောက်ရှိလာပြီးဖြစ်ကာ ကျေးရွာနှင့် မြို့ပေါ် ရပ်ကွက်များတွင် စစ်မူထမ်းရန် အသက်ပြည့်မီသည့် အမျိုးသားများသာမက အမျိုးသမီးများကိုပါ ဖမ်းဆီး စုဆောင်းမှုများ ပြုလုပ်လာသည်ဟု သိရသည်။

ကလေးမြို့ပေါ်တွင် စစ်ကောင်စီသည် ဇန်နဝါရီလနှင့် ဖေဖော်ဝါရီလအတွင်း မြို့ပေါ်ရပ်ကွက်နှင့် လမ်းမပေါ် တို့တွင် ရှောင်တခင်စစ်ဆေးဖမ်းဆီးမှုပိုမိုပြုလုပ်လာသည့်အပြင် ဖမ်းဆီးခံရသူများသည်လည်း ပြန်လည် ရွေးယူရန်အတွက် ခက်ခဲလာသည်ဟု ကလေးမြို့လူထုတိုက်ပွဲဦးဆောင်ကော်မတီ တာဝန်ရှိသူတဦးက ပြောသည်။

“ဖမ်းဆီးမှုဖြစ်စဉ်တွေကတော့ ခပ်စိပ်စိပ်တွေ့ရတယ် မြို့ပြရပ်ကွက်တွေမှာ။ အခုနောက်ပိုင်းမှာ လုံးဝ ရွေးလို့လည်းမရတော့ဘူး။ ဘယ်လိုပဲဖြစ်ဖြစ် စကစဘက် ဖမ်းဆီးလိုက်ပြီဆိုရင် မရတော့ဘူး။ စစ်မှုထမ်း ဖမ်းဆီးမှု နဲ့အတူ မြို့ပြနေလူထုတရပ်လုံးက ကြောက်လန့်ထိတ်လန့်ကြတယ်။ အထူးသဖြင့် သားရှင်၊သမီးရှင်တွေအနေနဲ့ တော်တော်လေးတော့ စိတ်ဒုက္ခရောက်ကြတယ်။ တချို့ လူငယ်ပိုင်းတွေဆိုရင် စိတ်ကျန်းမာရေး ထိခိုက်တယ် ဆိုတဲ့အထိတောင်ဖြစ်တယ်လို့ ကြားရတယ်” ဟု ၎င်းက ပြောသည်။

ကလေးမြို့တွင် စစ်ကောင်စီက လူငယ်ဖမ်းဆီးမှု ပိုမိုပြုလုပ်သည့်အတွက် ဒေသခံလူငယ်များအနေဖြင့် ညအချိန်မတော် နေအိမ်ပြင်ပသွားလာခြင်းနှင့် မလိုအပ်ပဲ ပျော်ပွဲ ရွှင်ပွဲ အပါအဝင် ခရီးသွားလာခြင်းများ တတ်နိုင်သရွေ့ရှောင်ကြဉ်ရန်၊ စစ်ကောင်စီ၏ လှုပ်ရှားသွားလာမှုများ မျက်ခြေမပြတ် အကဲခတ်ကာ ကြိုတင် ရှောင်ရှားကြရန် ကလေးမြို့လူထုတိုက်ပွဲ ဦးဆောင်ကော်မတီက အသိပေးထားသည်။

KMG ပေးပို့သည်။

LEAVE A REPLY

Please enter your comment!
Please enter your name here