တနင်္သာရီတိုင်း၊ တနင်္သာရီမြို့နယ် တုံးပျောကြီးကျေးရွာရှိ စစ်ကောင်စီ စစ်ဆေးရေးဂိတ် ဝင်ရောက်တိုက်ခိုက် ခံရတာကြောင့် စစ်ကောင်စီတပ်သား ၂ ဦး သေဆုံးခဲ့သည်ဟု မြိတ်ခရိုင် ပြည်သူ့ကာကွယ်ရေးပူးပေါင်း စစ်ကြောင်း ၂ ထံက သိရသည်။
ပြီးခဲ့သည့် ဧပြီ ၃၀ ရက်နေ့ မနက် ၅ နာရီခွဲခန့်က အင်အား ၃၀ ဝန်းကျင်နှင့် တုံးပျောကြီးကျေးရွာတွင် အထိုင်ချ တပ်စွဲထားသော စစ်ကောင်စီနှင့် ပျူစောထီး ပူးပေါင်းစစ်ဆေးရေးဂိတ်ကို ပြည်သူ့ကာကွယ်ရေးပူးပေါင်းအဖွဲ့က ဝင်ရောက်တိုက်ခိုက်ခဲ့ခြင်း ဖြစ်သည်ဟု ဆိုသည်။
ယင်းသို့တိုက်ခိုက်မှုကြောင့် အချိန်မိနစ် ၂၀ နီးပါးအကြာ နှစ်ဖက်တိုက်ပွဲ ဖြစ်ပွားခဲ့ပြီး စစ်ကောင်စီတပ်သား ၂ ဦး သေဆုံးခဲ့သလို ၂ ဦး ထိခိုက်ဒဏ်ရာရရှိခဲ့သည်ဟု မြိတ်ခရိုင်ပြည်သူ့ကာကွယ်ရေး ပူးပေါင်းစစ်ကြောင်း ၂ ပြန်ကြားရေးတာဝန်ခံက ပြောပါသည်။
နှစ်ဖက်တိုက်ပွဲအတွင်း တုံးပျောကြီး စာသင်ကျောင်းအတွင်းမှနေ၍ စစ်ကောင်စီတပ်က လက်နက်ကြီး၊ လက်နက်ငယ်များနှင့် အဆက်မပြတ် ပြန်လည်ပစ်ခတ်ကြောင့် ပြည်သူ့ကာကွယ်ရေး ပူးပေါင်းစစ်ကြောင်း ၂ ဘက်က ရဲဘော် ၁ ဦး ထိခိုက်ဒဏ်ရာရရှိခဲ့ကြောင်း အဆိုပါတာဝန်ခံက ပြောဆိုသည်။
လက်ရှိ၌ တနင်္သာရီမြို့နယ်တွင် ပြည်သူ့ကာကွယ်ရေးအဖွဲ့၏ မိုင်းဆွဲတိုက်ခိုက်မှု၊ ကြားဖြတ်တိုက်ခိုက်မှုနှင့် အလစ်ငိုက် ဝင်ရောက်တိုက်ခိုက်မှုတို့ကြောင့် စစ်ကောင်စီတပ်နှင့် ပြည်သူ့ကာကွယ်ရေးအဖွဲ့ကြား နှစ်ဖက်စစ်ရေး တင်းမာနေလျက်ရှိသည်။
မြိတ်ခရိုင် ပြည်သူ့ကာကွယ်ရေးပူးပေါင်းစစ်ကြောင်း ၂ တွင် တနင်္သာရီမြို့နယ် ပကဖ ရိုးမအဖွဲ့၊ တောဗုံးကြီးအဖွဲ့၊ တိုင်းပကဖ လုံခြုံရေးအဖွဲ့၊ ကျွန်းစု ပကဖ၊ မြိတ်ခရိုင် တပ်ရင်း ၂ တပ်ခွဲ (၂)၊ ပုလော ပကဖ၊ Dragon Squad ဒရုန်းတပ်ဖွဲ့တို့နှင့် ဖွဲ့စည်းထားခြင်း ဖြစ်သည်။
ပြီးခဲ့သည့် ဧပြီ ၂၇ ရက်နေ့ကလည်း တနင်္သာရီမြို့နယ် ရေဖြူကျေးရွာ ကမ္ဘောဇဆီအုန်းကုမ္မဏီ ရှင်းလင်းဆောင်ကုန်း၌ တပ်စွဲထားသော စစ်ကောင်စီတပ်အား ဝင်ရောက်တိုက်ခိုက်ခဲ့ရာ စစ်ကောင်စီတပ်သား ၄ ဦး သေဆုံးခဲ့သည်ဟု တေယ်လှန်ရေးအင်အားစုများ၏ ထုတ်ပြန်ချက်အရ သိရသည်။
သံလွင်တိုင်းမ် ပေးပို့သည်။
