ဇွန်လ ၃၀ ရက်နေ့က နှစ်ဖက် အပစ်ရပ်စဲရေးကာလ ကုန်လွန်သွားပြီဖြစ်သဖြင့် တရုတ်စီမံကိန်းများတည်ရှိရာ ရခိုင်မှ ကျောက်ဖြူမြို့အနီးတွင် တိုက်ပွဲများ ပိုမိုပြင်းထန်စွာ ဖြစ်ပွားလာသည်ဟု မြေပြင် စစ်ရေးအခြေအနေများကို လေ့လာစောင့်ကြည့်နေသူ ဒေသခံတစ်ဦးက ပြောသည်။
“ တိုက်ပွဲကမနေ့ကစပြီးပြန်ပြင်းနေတာ။ ဒီနေ့နဲ့ဆို နှစ်ရက်ရှိနေပြီ။ အပစ်အခတ်ရပ်စဲကာလလည်း ကုန်ပြီဆိုတော့။ စစ်ကောင်စီဖက်ကလည်း ထိုးစစ်ဆင်တယ်။ AA ဖက်ကလည်း ဝိုင်းပတ်ပြီး ပြန်လည်ထိုးစစ်ဆင်တိုက်ခိုက်နေတယ်” ဟု ပြောသည်။
စစ်ကောင်စီတပ်သည် အပစ်ရပ်စဲရေးကာလတွင် အာရက္ခတပ်တော်မှ ထိုးစစ်ဆင်တိုက်ခိုက်ခြင်း မပြုလုပ်ဘဲ ခံစစ်အနေအထားဖြင့် နေနေသည်ကို အခွင့်ကောင်းယူကာ ထိုးစစ်ဆင်တိုက်ခိုက်မှုများကို ပြုလုပ်ခဲ့ပြီး လက်ရှိ အေအေက ပြန်လည်ပြီး ဝိုင်းပတ် ထိုးစစ်ဆင်တိုက်ခိုက်ရာတွင် စစ်ကောင်စီဘက်က အထိနာနေသည်ဟု ၎င်းက ပြောကြားသည်။
“လက်ရှိ အကျအဆုံးများနေတာက စစ်သင်တန်းဆင်းတဲ့ ပြည်သူ့စစ်တွေ၊ မွတ်ဆလင် စစ်သင်တန်းဆင်းတွေ။ တချို့ဆို ဖမ်းမိထားတွေလည်းရှိတယ်။ နှစ်ဖက်တပ်ဖွဲ့အနေနဲ့ ဒရုန်းတွေ၊ လက်နက်ကြီးတွေနဲ့ အပြန်အလှန် တိုက်ကြတယ်။ ဖြစ်နေတာက နေရာနှစ်ခုလောက်မှာ ဖြစ်နေတယ်” ဟု ၎င်းကပြောသည်။
ဇူလိုင် ၁ ရက်နေ့ကစပြီး ကျောက်ဖြူမြို့နယ်၊ ဂုံးချွိန်တိုက်နယ်၊ မလကျွန်းဧရိယာရှိ တရုတ်ဓာတ်ငွေ့သန့်စက်စက်ရုံ (OGT) အနီးအနားနှင့်အမှတ် (၃၂) ရဲတပ်ရင်းနှင့် ပြိုင်းစေ့ကေ့ရွာအကြားရှိ နေရာများတွင် တိုက်ပွဲပြင်းထန်နေသည်ဟု ဆိုသည်။
စစ်ကောင်စီတပ်သည် တရုတ် ဒရုန်းနည်းပညာရှင်များ၏ အကူအညီဖြင့် ဒရုန်းဖြင့် ပိုမိုတိုက်ခိုက်ပြီး တိုက်ပွဲနှင့်မသက်ဆိုင်သည့် လူနေကျေးရွာများကိုလည်း ဗုံးကြဲချပစ်ခတ်တိုက်ခိုက်လျက်ရှိသည်ဟု ကျောက်ဖြူ စစ်ရှောင်အမျိုးသမီးတစ်ဦးက နိရဉ္စရာကို ပြောသည်။
“ ကောင်းကင်မှာ ဒရုန်းတွေ ဝဲလာပြီဆိုရင် ထွက်ပြေးရတယ်။ ဒရုန်းနဲ့လိုက်ပစ်လို့ မနေရဲဘူး။ တိုက်ပွဲမရှိရင်လည်း ပစ်တယ်။ ရှိရင်လည်းပစ်တယ်။ တခါတလေ နေဗီတွေကပစ်တယ်” ဟု ပြောသည်။
တိုက်ပွဲအတွင်း တရုတ်ဒရုန်းနည်းပညာရှင်အချို့ ဒဏ်ရာရရှိမှုရှိသလို စစ်မြေပြင်တိုက်ပွဲ အတွေ့အကြုံမရှိသဖြင့် ထွက်ပြေးမှုများရှိနေကြောင်း ဒေသအတွင်းသတင်းများ ထွက်ပေါ်နေသော်လည်း သီးခြားအတည်ပြုနိုင်ခြင်းတော့ မရှိသေးပါ။
စစ်ကောင်စီသည် ကျောက်ဖြူတိုက်ပွဲတွင် တရုတ်အကူအညီကိုရယူကာ ဒရုန်းများဖြင့် ဦးဆောင်တိုက်ခိုက်ပြီး လေကြောင်းနှင့်ရေကြောင်းကို အသုံးပြုပြီး မြေပြင်တိုက်ပွဲကို အားဖြည့်တိုက်ခိုက်နေသည်ဟု သိရသည်။
စစ်ကောင်စီဖက်မှ ရာသီဥတု နေပူလျှင် ဒရုန်းအသုံးများပြီး မိုးရွာလျှင် နေဗီပေါ်မှ လက်နက်ပစ်ကူပေးပြီး (AA) ကိုတိုက်ခိုက်ကြောင်း အဆိုပါအမျိုးသမီးက ပြောကြားသည်။
အာရက္ခတပ်တော်ကလည်း ဒရုန်းများဖြင့် တိုက်ခိုက်သလို လက်နက်ကြီးများဖြင့် ပစ်ခတ်တိုက်ခိုက်ကာ မြေပြင်တွင်လည်း စနိုက်ပါများကိုသုံးကာ ပြောက်ကျားစစ်ဖြင့် အနီးကပ်တိုက်ခိုက်နေသဖြင့် စစ်ကောင်စီဘက်မှ ထိပ်တန်းတပ်မှူးအဆင့်ရှိသူများပါ ထိခိုက်သေဆုံးမှုများရှိနေသည်ဟု သိရသည်။
၂ဝ၂၅ ခုနှစ်၊ ဖေဖော်ဝါရီလမှစတင်ကာ ကျောက်ဖြူမြို့နယ်တွင် အာရက္ခတပ်တော် (AA) နှင့် စစ်ကောင်စီတို့ အပြန်အလှန် တိုက်ပွဲများ ပြင်းထန်စွာဖြစ်လာခဲ့သည့်အတွက် ဒေသခံအများအပြား စစ်ဘေးတိမ်းရှောင်လျက်ရှိရာ မြို့နယ်တစ်ခုလုံးတွင် ပြီးခဲ့သည့် ဇွန်လအထိ စုစုပေါင်း စစ်ဘေးရှောင်ဦးရေ နှစ်သောင်းနှစ်ထောင်ကျော်အထိ ရှိလာနေကြောင်း သိရသည်။
နိရဉ္စရာ
