မကွေးတိုင်းတွင် စစ်ကောင်စီက အင်ဂျင်တပ်လေထီးဖြစ်သည့် Paramotor များကို တွင်တွင်ကျယ်ကျယ် အသုံးပြု၍ ဗုံးကြဲချတိုက်ခိုက်မှု ပြုလုပ်လာကြောင်း ဒေသခံများက ပြောဆိုသည်။
လူစီးနင်းလိုက်ပါနိုင်သော အင်ဂျင်တပ်လေထီးParamotor များကို ပြည်သူများနေထိုင်ရာနှင့် တိုက်ပွဲ ဖြစ်ရာနေရာများတွင် စစ်ကောင်စီဘက်က ပိုမိုအသုံးပြုလာနေသည်ဟု ဒေသခံတို့က ဆိုသည်။
ဒေသခံတစ်ဦးက “ည (ဖေဖော်ဝါရီ ၁ ရက်နေ့) က Paramotor နဲ့ မီးလောင်ဗုံး ၃ လုံး နေအိမ်တွေကို ချသွားတယ်။ နေအိမ်တစ်လုံး မီးလောင်သွားတယ်။ ဒီနေ့လည်း သုံးနေတယ်” ဟု ပြောသည်။
ပြီးခဲ့သည့်ဖေဖော်ဝါရီ ၁ ရက်နေ့ နံနက် ၃ နာရီဝန်းကျင်တွင် ပွင့်ဖြူမြို့နယ် ရေရင်ရွာရှိ လူနေအိမ်များပေါ်ကို Paramotor ဖြင့် သုံးကြိမ် ဗုံးကြဲချတိုက်ခိုက်သွားသည်ဟု ရွာသားများက ပြောသည်။
ယင်းနေ့တစ်ရက်တည်းမှာပင် ဆိပ်ဖြူမြောက်ဘက်ပိုင်းတနေရာကိုလည်း Paramotor များ အသုံးပြုပြီး လေကြောင်းမှ ဗုံးကြဲချတိုက်ခိုက်မှုများ ပြုလုပ်သွားသည်ဟု သိရသည်။
ဖေဖော်ဝါရီ ၁ ရက်နေ့ နံနက် ၈ နာရီဝန်းကျင်မှစတင်ကာ ကောင်းကင်တွင် Paramotor များကို မကွေးနှင့် မင်းဘူးမြို့မှ ပြည်သူများကပင် မြင်တွေ့နေရကြောင်း ပြောဆိုကြသည်။
စစ်ကောင်စီက မြေပြန့်ဒေသတွင်သာ Paramotor များကို တွင်တွင်ကျယ်ကျယ် အသုံးပြုနေခြင်းဖြစ်ပြီး ပွိုင့် ၅ ဖြင့် ပစ်ချပါက ရနိုင်ကြောင်း ကာကွယ်ရေးအဖွဲ့ဝင်တစ်ဦးက ထင်မြင်ချက်ပေး ပြောဆိုသည်။
စစ်ကောင်စီက ဖေဖော်ဝါရီလ ၁ ရက် နေ့လယ် ၁၁ နာရီခွဲဝန်းကျင်အထိ Paramotor များကို မကွေးလေတပ်ကနေ အနောက်မြောက်အရပ်ဆီ စေလွှတ်ပျံသန်းခဲ့ကြောင်း ဒေသခံများက ပြောသည်။
သံလွင်တိုင်းမ် ပေးပို့သည်။
