ချင်းပြည်နယ်တောင်ပိုင်း၊ ပလက်ဝမြို့နယ်အတွင်းက စစ်ကောင်စီတပ်ဖွဲ့ဝင်များဖြစ်သည့် ရဲဝန်ထမ်းအပါအဝင် စစ်ကောင်စီလက်အောက်ခံ ဝန်ထမ်းများ ပြည်သူ့ရင်ခွင်ထံ အလင်းဝင်ရန် ပလက်ဝ ကိုယ်ပိုင်အုပ်ချုပ်သော ခရိုင်ကောင်စီ၊ ချင်းလဲန်းကာကွယ်ရေးတပ်ဖွဲ့က သတင်းထုတ်ပြန်ထားသည်။
ပလက်ဝမြို့နယ်၊ ပြည်သူ့အုပ်ချုပ်ရေးဥက္ကဌ ဆလိုင်းမျိုးထိုက်က “ ပလက်ဝနယ်ဘက်မှာ အထူးသဖြင့် စကစအတွက် စစ်တိုက်ပေးနေတဲ့ ဒေါက်တိုင်တွေဖြစ်တဲ့ ရဲတွေ၊ စစ်တပ်တွေအပြင် CDM မလုပ်တဲ့ ဝန်ထမ်းတွေလည်းပဲ အခုချိန်မှာ ပြည်သူနဲ့အတူ ရပ်တည်ပြီးမှ ပြည်သူ့ဘက်မှာ အလင်းဝင်ကြပေးဖို့ပါ စကစအတွက် အသေခံပေးတဲ့ ရဲတွေ၊ စစ်သားတွေဟာလည်း ပြည်သူတရပ်ပဲပါ” ဟု ပြောသည်။
အဆိုပါ ထုတ်ပြန်ချက်ထဲတွင် ပြည်သူ့ရင်ခွင်ထံ လက်နက်ချအလင်းဝင်လာသည့် စစ်သားနှင့် ရဲတပ်ဖွဲ့ဝင်များ အနေဖြင့် အသက်အန္တရာယ်လုံခြုံရေးကို အာမခံသည့်အပြင် လူ့ဂုဏ်သိက္ခာနှင့် မည်သည့်ညှဉ်းပန်းနှိပ်စက်မှု၊ ဖမ်းဆီးချုပ်နှောင်ထားခြင်းမရှိပဲ ဘေးကင်းလုံခြုံသည့်နေရာကို ပို့ဆောင်ပေးသွားမည်ဖြစ်ကြောင်း ဖော်ပြထားပါသည်။
၎င်းအပြင် ပြည်သူ့ရင်ခွင်သို့ ခိုလှုံလာချင်သော စစ်ကောင်စီတပ် စစ်သားများ၊ ရဲများအနေဖြင့် ပလက်ဝ ကိုယ်ပိုင်အုပ်ချုပ်သောကောင်စီ၊ ချင်းလဲန်းကာကွယ်ရေးတပ်ဖွဲ (ပလဝ) နှင့် ဆက်သွယ်ဖြစ်စေ၊ မဟာမိတ် တော်လှန်ရေးအဖွဲ့အစည်းများ၏ တပ်ရင်း၊ တပ်ဖွဲ့များနှင့် ဆက်သွယ်ကာ ပြည်သူရင်ခွင်ထံ ခိုလှုံရမည်ဟု အသိပေးဖော်ပြသည်။
ပလက်ဝမြို့နယ်အတွင်းက စစ်ကောင်စီတပ်ဖွဲ့ဝင်များဖြစ်သည့် ရဲဝန်ထမ်းအပါအဝင် စစ်ကောင်စီ လက်အောက်ခံ ဝန်ထမ်းများ CDM ပြုလုပ်သူများရှိသော်လည်း လုံခြုံရေးအခြေနေများကြောင့် အရေအတွက် တိကျစွာ ဖော်ပြခွင့် မရသေးကြောင်း ပလက်ဝမြို့နယ်၊ ပြည်သူ့အုပ်ချုပ်ရေးဥက္ကဌ ဆလိုင်းမျိုးထိုက်က ပြောဆိုသည်။
KMG ပေးပို့သည်။
