စစ်ကောင်စီက ကရင်နီပြည်အခြေစိုက် လက်နက်ကိုင်တပ်ဖွဲ့ဖြစ်သည့် ကရင်နီလူမျိုးပေါင်းစုံ ပြည်သူ့ လွတ်မြောက်ရေးတပ်ဦး (KNPLF) ဌာနချုပ်ရှိရာ ဟိုစဲ့ကို ဇွန်လ ၁၇ ရက်နေ့က လေယာဉ်ဖြင့် ဗုံးကြဲ တိုက်ခိုက်ခဲ့တာကြောင့် ဘောလုံးကွင်းပျက်စီးခဲ့ပြီး အခြားပျက်စီးမှုတွေ ရှိခဲ့တယ်လို့ သိရသည်။
ဟိုစဲ့ဒေသခံတစ်ဦးက “၁၇ ရက် စနေနေ့ကပေါ့ ၆ လုံး အတွဲလိုက် ကြဲသွားတာပါ။ စစ်ရေးအခြေနေတော့ ပြင်းထန်နေတယ်၊ ထိခိုက်ပျက်စီးမှုတော့ အနည်းငယ် ရှိပါတယ်။ လောလောဆယ်တော့ ပန်တိန်း မှာ အရမ်းပြင်းထန်နေတယ်။ စစ်ကောင်စီဘက်က ရဟတ်ယဉ်တွေ လာရောက်ပစ်ခတ်တယ်၊ လေယာဉ်ဗုံးကို တနေ့ကို ၅ ခါ ထက်မနည်း လာကြဲတယ်။ တစ်ခါကြဲရင် ၆ လုံး၊ အတွဲလိုက်ကို ကြဲတာ။ ကင်းထောက် လေယာဉ်တော့ ရက်တိုင်းကို ဝဲတယ်၊ မလာတဲ့ရက်ကို မရှိဘူး” ပြောသည်။
ဗုံးကြဲတိုက်ခိုက်ခံရတဲ့ ဘောလုံးကွင်းနှင့် KNPLF ဌာနချုပ် သည် မီတာ ၃၀၀ ဝန်းကျင် အကွာအဝေးသာ ရှိကြောင်း သိရသည်။
ယင်းအပြင် ဘောလုံးကွင်းနှင့် ဌာနချုပ်နေရာ အကြား မပေါက်ကွဲသေးသည့် ဗုံးနှစ်လုံး ရှိနေကြောင်း ဟိုစဲ့ဒေသခံများက ပြောသည်။
ဒါ့အပြင် ကရင်နီပြည် မယ်စဲ့မြို့နယ်အတွင်းရှိ ပန်တိန်းကျေးရွာကို စစ်ကောင်စီက ဗုံးကြဲတိုက်ခိုက်မှုကြောင့် လူနေအိမ်တွေ အများအပြား ထိခိုက်ပျက်စီးမှု ရှိနေတယ်လို့ မယ်စဲ့မြို့ ဒေသခံများက ပြောသည်။
ပြီးခဲ့သည့် ဇွန်လ ၁၃ ရက်က မယ်စဲ့မြို့နယ်အတွင်းနှင့် ထိုင်း-ကရင်နီ နယ်စပ်ရှိ စစ်ကောင်စီတပ်စခန်း ၃ ခုနှင့် မယ်စဲ့ရဲစခန်းကို ကရင်နီဒေသခံပူးပေါင်းတပ်ဖွဲ့တို့ ဝင်ရောက်တိုက်ခိုက်ခဲ့ကြောင်းသိရသည်။
အဆိုပါ တိုက်ပွဲအတွင်း စစ်ကောင်စီက လေယာဉ်ဖြင့် ဗုံးကြဲတိုက်ခိုက်ခြင်း၊ လက်နက်ကြီးဖြင့် ပစ်ခတ်မှုကြောင့် မယ်စဲ့မြို့ခံများအပါအဝင် ဖရူဆို၊ ဒီးမော့ဆို၊ ဘောလခဲမြို့ကနေ စစ်ရှောင်လာကြသည့် လူဉီးရေ ၅ ထောင် ကျော်သည် ထိုင်းနိုင်ငံအတွင်းနှင့် နယ်စပ်ကို ထွက်ပြေးတိမ်းရှောင် နေကြရသည်။
မယ်စဲ့မြို့နယ်အတွင်းနှင့် ထိုင်းနယ်စပ်တွင် ဖြစ်ပွားခဲ့သည့် တိုက်ပွဲအခြေအနေများနှင့် ပတ်သက်ပြီး ကရင်နီပူးပေါင်းတပ်ဖွဲ့က တစုံတရာ ထုတ်ပြန်ထားခြင်း မရှိသေးပါ။
လက်ရှိအချိန်အထိ မယ်စဲ့မြို့နယ်အတွင်း စစ်ရေးတင်းမာနေဆဲ အခြေအနေဖြစ်တာကြောင့် တိုက်ပွဲဆက်လက် ဖြစ်ပွားနိုင်တယ်လို့ ကရင်နီတပ်မတော် (KA) စစ်ရေးတာဝန်ရှိသူများက ပြောဆိုထားသည်။
ကန္တာရဝတီတိုင်း(မ်)-ပေးပို့သည်။
