သျှမ်းပြည်၊ သိန္နီမြို့နယ်တွင် အမျိုးသမီးများကိုပါ တပ်သားသစ်အဖြစ်စုဆောင်းရန် ကိုးကန့်တပ် MNDAA က တပ်သားသစ်စုဆောင်းရာတွင် အမျိုးသမီးများကိုလည်း ခေါ်ဆောင်ရန် စာရင်းကောက်ယူနေကြောင်း ဒေသခံတို့ထံမှ သိရှိရသည်။
သိန္နီမြို့နယ်မှ ကိုးကန့်တပ် MNDAA တပ်ဆုတ်ခွာမည်ဟု သတင်းထွက်ပေါ်နေသည့်ကြားက ဇွန်လ ၁၅ ရက်တွင် MNDAA ကနေ ဒေသခံများကိုအစည်းအဝေးခေါ်ယူပြီး မြို့တွင်းလုံခြုံရေးအတွက် တပ်သားသစ်အဖြစ် စစ်မှုထမ်းစုဆောင်းပေးရန် ပြောဆိုလာသည်ဟု သိန္နီမြို့ဒေသခံများက ပြောသည်။
အသက် ၁၈ နှစ်အထက်အမျိုးသားများကို မြို့တွင်းလုံခြုံရေးအတွက် ရဲတပ်သားအဖြစ်ခေါ်ယူမည်ဖြစ်ပြီး အမျိုးသမီးများကိုမှု ရုံးပိုင်းဆိုင်ရာအဖွဲ့ဝင်များအဖြစ် ခေါ်ယူမည်ဖြစ်ကြောင်း သိန္နီမြို့ဒေသခံတစ်ဦးက ပြောပါသည်။
“ကျေးရွာအုပ်စုအလိုက် သွားရမယ်လို့ပြောတယ်။ ဘယ်နေ့ဘယ်ချိန် သွားရမယ်တော့ မပြောသေးဘူး။ ကျမတို့အုပ်စုကတော့ ၆ ယောက်ပါတယ်။ အမျိုးသားရော အမျိုးသမီးပါသွားရမယ်လို့ ပြောတယ်” ဟု အဆိုပါဒေသခံက ပြောသည်။
သိန္နီမြို့နယ်ရှိ ရပ်ကွက်နှင့် ကျေးရွာအုပ်စုအားလုံး ကိုးကန့်တပ် MNDAA ၏ မြို့တွင်းလုံခြုံရေးတပ်ဖွဲ့အတွက် တပ်သားသစ်အဖြစ် စုဆောင်းမည်ဖြစ်ကြောင်း ဒေသခံတို့ပြောဆိုမှုအရ သိရသည်။
အလားတူ သိန္နီမြိုပေါ်ရှိ ရပ်ကွက်တွင်လည်း ရပ်ကွက်တစ်ခုလျှင် တပ်သားသစ်အဖြစ် ၂ ဦး စစ်မှုထမ်း စုဆောင်းပေးရမည်ဟု ကိုးကန့်တပ် MNDAA က ပြောဆိုထားကြောင်း သိန္နီမြို့ဒေသခံ အမျိုးသမီးတစ်ဦး ပြောသည်။
“တခြားရပ်ကွက်တော့ မသိဘူး။ ကျမတို့ ရပ်ကွက်တော့ လူ ၂ ယောက်တောင်းတယ်။ အစည်းအဝေးလုပ်တာ ၂ ခါရှိပြီ အခုထိမပြီးသေးဘူး၊ နောက်တကြိမ် လုပ်ဦးမယ်တဲ့။ လူ ၂ ယောက်ရှာခိုင်းတာ ရှာလို့မရရင် သူတို့ကိုယ်တိုင် ဝင်ဖမ်းယူမယ်ပြောတယ်” ဟု ၎င်းကပြောသည်။
သို့သော် ဒေသခံအများစုမှာ ကိုးကန့်တပ် MNDAA ၏ တပ်သားသစ်အဖြစ် မည်သူမျှ တာဝန်မထမ်းချင်ကြကြောင်း သိရသည်။
“ဘယ်သူမှတော့ သွားမလုပ်ချင်ကြဘူး၊ သေရမှာကြောက်တယ်။ ပြီးခဲ့တဲ့ အရင်တခေါက်တုန်းကလည်း သွားပြီးပြီလေ။ အဲ့တုန်းက ကျမတို့ရွာက ၃ ယောက်ပို့ပြီးပြီ။ အခုလည်း ထပ်လာတောင်းတော့ သွားမယ့်လူတွေက မရှိတော့ဘူး။ ထွက်ပြေးကုန်ပြီ” ဟု သိန္နီမြို့ဒေသခံတစ်ဦးက ထပ်လောင်းပြောသည်။
ပြီးခဲ့သည့် ဇွန်လဆန်းပိုင်းတွင်လည်း လားရှိုးမြို့နယ်နှင့် သီပေါမြို့နယ်များတွင် ရှမ်းပြည်တိုးတက်ရေးပါတီ SSPP နှင့် ကိုးကန့်တပ်ဖွဲ့ MNDD တို့ တိုက်ပွဲဖြစ်ပွားခဲ့သောကြောင့် တပ်သားသစ် စုဆောင်းခံရလျှင် ရှေ့တန်းထွက် စစ်တိုက်ရမည်ကို စိုးရိမ်နေကြောင်း ဒေသခံများက ပြောဆိုသည်။
သိန္နီမြို့ကို “၁၀၂၇ စစ်ဆင်ရေး” ပထမပိုင်းစတင်ခဲ့ချိန် ၂၀၂၃ စက်တင်ဘာကုန်ကတည်းက ကိုးကန့်တပ်ဖွဲ့ MNDAA က ချင်းရွှေဟော်မြို့နည်းတူ ပထမဆုံး ထိန်းချုပ်နိုင်ခဲ့သည့်မြို့ဖြစ်ပြီး မြို့ပေါ်ရပ်ကွက်များကို မူလ (၄) ရပ်ကွက်မှ (၆) ရပ်ကွက်အဖြစ် ပြောင်းလဲသတ်မှတ်ပြီး အုပ်ချုပ်ရေးယန္တရား လည်ပတ်လျက်ရှိသည်။
ထို့ပြင် မြို့သိမ်းတိုက်ပွဲအတွင်း ဗုံးဖောက်ခွဲခံရပြီး ပျက်ဆီးသွားသည့် သိန္နီမြို့ဝင်တံတားကို ကွန်ကရစ်တံတားအဖြစ် မေလ ၂၉ ရက်နေ့တွင် ပြန်လည်ပြင်ဆင်ပြီးစီးခဲ့ပြီး ကုန်တင်ကားကြီးများပါ ဖြတ်သန်းသွားလာနိုင်ပြီဖြစ်ကြောင်း သိရသည်။
အလားတူ သိန္နီမြို့ အထက (၂) စာသင်ကျောင်းကို လားရှိုးမြို့ ပြည်သူ့ဆေးရုံမှ သယ်ယူလာသည့် ဆေးဘက်ဆိုင်ရာပစ္စည်းများဖြင့် MNDAA က ယာယီဆေးရုံဖွင့်လှစ်ထားခဲ့ရာ လက်ရှိတွင် သိန္နီပြည်သူ့ဆေးရုံကို ပြန်လည်ပြင်ဆင်ပြီး ဆေးကုသမှု တိုးချဲ့နိုင်ရန် လုပ်ဆောင်နေကြောင်း ဒေသခံများက ပြောဆိုကြသည်။
သျှမ်းသံတော်ဆင့် ပေးပို့သည်။
