ရခိုင်ပြည်၊ အမ်းမြို့နယ်အတွင်းက စစ်ဘေးရှောင်များသည် ငှက်ဖျားရောဂါဖြစ်ပွားမှု မြင့်တက်နေပြီး သေဆုံးသူများလည်း ရှိလာသဖြင့် အရေးပေါ် ကျန်းမာရေးစောင့်ရှောက်မှု အကူအညီလိုအပ်နေကြောင်း ဒေသခံများက ပြောဆိုသည်။
စစ်ကောင်စီနှင့် အာရက္ခတပ်တော်တို့ တိုက်ပွဲများကြောင့် အမ်းမြို့နယ်အတွင်း စစ်ဘေးရှောင်ဦးရေ ၂၀၀၀ ခန့်ရှိပြီး ယခုနှစ်ဇွန်လအတွင်း ငှက်ဖျားရောဂါကြောင့် ကလေးများအပါဝင် သေဆုံးသူ ၁၅ ဦးထက်မနည်း ရှိလာသည်ဟု အမ်းဒေသခံအမျိုးသားတစ်ဦးက ပြောသည်။
“ငှက်ဖျားဖြစ်တာက တော်တော်များလာတယ်။ သေတဲ့သူတွေလည်း တဖြည်းဖြည်းတိုးလာတယ်။ ဆေးဝါးအခက်အခဲတွေ တခြားအခက်အခဲတွေကြောင့် မိုးများတဲ့ကာလရောက်ရင် ပိုဆိုးလာမယ့် အခြေအနေမှာရှိတယ်” ဟု အဆိုပါအမ်းဒေသခံက ပြောသည်။
ရခိုင်ရိုးမတောင်ခြေနှင့် နီးကပ်စွာတည်ရှိနေသည့် အမ်းမြို့နယ်တွင် စစ်ဘေးရှောင်များမှာ အမိုးအကာမလုံခြုံခြင်း၊ ခြင်ထောင်မရှိခြင်း၊ မိုးဦးကာလတွင် ခြင်ပေါက်ဖွားနှုန်း မြင့်တက်ခြင်းတို့ကြောင့် ငှက်ဖျားဖြစ်ပွားမှုမှာလည်း မြင့်တက်လာနေသည်။
ယင်းသို့ ငှက်ဖျားရောဂါဖြစ်ပွားမှု မြင့်တက်နေသော်လည်း အမ်းမြို့နယ်အတွင်းမှ စစ်ဘေးရှောင်များမှာ ကျန်းမာရေး လက်လှမ်းမှီရန် အခက်အခဲရှိကြောင်း သိရသည်။
“နေထိုင်မကောင်းဖြစ်ရင်လည်း ဆေးရုံဆေးခန်းက အလှမ်းဝေးနေတဲ့အပြင် ဖျားတာနာတာအတွက်ကိုတောင် ဆေးဝယ်ဖို့ မတတ်နိုင်တဲ့သူတွေရှိတယ်။ တောထဲမှာ ခိုလှုံနေတဲ့သူတွေဆိုရင်လည်း သွားရလာရအဆင်မပြေဘူး။ ငှက်ဖျားဖြစ်နေကြတဲ့ စစ်ရှောင်တွေအတွက်လည်း ဆေးကုသမှုခံယူဖို့ လက်လှမ်းမမှီတဲ့ အခြေအနေမှာရှိတယ်” ဟု နောက်ထပ် အမ်းဒေသခံအမျိုးသားတစ်ဦးက ထပ်မံပြောဆိုသည်။
အာရက္ခတပ်တော်သည် အမ်းမြို့နယ်တစ်ခုလုံးကို ၂၀၂၄ ခုနှစ်၊ ဒီဇင်ဘာ ၂၀ ရက်တွင် အပြီးသတ်သိမ်းပိုက်ခဲ့သော်လည်း လုံခြုံရေးအခြေအနေများကြောင့် အမ်းမြို့အတွင်း ဝင်ရောက်နေခွင့်ကို တားမြစ်ထားသည်။
တောတောင်ခြုံနွယ်များကြားတွင် နေထိုင်နေကြရသည့် အမ်းမြို့နယ်အတွင်းက စစ်ဘေးရှောင်များမှာ စားဝတ်နေရေး အခက်အခဲအပြင် ကျန်းမားရေးပြဿနာများကို ရင်ဆိုင်လာရသဖြင့် အာရက္ခပြည်သူ့အစိုးရအနေဖြင့် ကျန်းမာရေးစောင့်ရှောက်မှုများကို အမြန်ဆုံးပေးနိုင်ရေးကို စစ်ဘေးရှောင်များက မျှော်လင့်နေကြသည်။
အောင်ထိန် (DMG) ပေးပို့သည်။
