ဧရာဝတီတိုင်း၊ အင်္ဂပူမြို့နယ်က ကျေးရွာနှစ်ခုတွင် တပ်စွဲထားသည့် စစ်ကောင်စီတပ်စခန်းများကို အာရက္ခတပ်တော်နှင့် ပူးပေါင်းတပ်များ သိမ်းပိုက်လိုက်ကြောင်း သိရသည်။
ပုသိမ်-မုံရွာကားလမ်းရှိ ဘဲ့ပြားကုန်းနှင့် စာစီကုန်းကျေးရွာတို့တွင် တပ်စွဲထားသည့် စစ်ကောင်စီတပ်စခန်းများကို ဇွန် ၂၉ ရက်တွင် သိမ်းပိုက်ခဲ့ခြင်းဖြစ်ကြောင်း ဒေသခံများက ပြောသည်။
“ ဒီဖက်မှာ နှစ်ဖက်တိုက်ပွဲတွေ ပြီးခဲ့တဲ့ ဧပြီလကတည်းက ဖြစ်နေကြတာ။ စစ်ကောင်စီက အဲဒီကျေးရွာတွေမှာ အခြေစိုက် လှုပ်ရှားနေကြတာကြာပြီ။ ဒီစခန်းတွေကို ဇွန် ၂၉ ညနေပိုင်းမှာ သိမ်းပိုက်လိုက်တာ လက်နက်ခဲယမ်း အများအပြားလည်း သိမ်းဆည်းရထားတယ်” ဟု မြေပြင်အခြေနေကိုသိရှိသူ လေးမျက်နှာဒေသခံ အမျိုးသားတစ်ဦးက DMG ကို ပြောသည်။
အင်္ဂပူမြို့နယ်အတွင်း တိုက်ပွဲများကြောင့် ပြီးခဲ့သည့် ဧပြီလမှစတင်ကာ ကျေးရွာ ၁၀ ကျော်မှ ဒေသခံ ထောင်နှင့်ချီမှာ ဘေးလွတ်ရာသို့ ထွက်ပြေးတိမ်းရှောင်လျက်ရှိကြသည်။
အဆိုပါ ကျေးရွာများကို မေလနှင့် ဇွန်လအတွင်းက စစ်ကောင်စီ၏ ကွင်းကောက်အခြေစိုက် တန်းမြင့်လေ့ကျင့်ရေး သင်တန်းကျောင်း (တကက – ၅) မှ စက်တပ်လေထီးများဖြင့် ဗုံးကြဲတိုက်ခိုက်မှုများရှိခဲ့သည်။
လက်ရှိတွင် ဧရာဝတီတိုင်းအတွင်းက ရေကြည်မြို့နယ်ရှိ စစ်ကောင်စီ၏ မြောက်စမ်းကျေးရွာအခြေစိုက် အမတ – ၃၄၄ တပ်ရင်းနှင့် ပုသိမ် – မုံရွာကားလမ်း လေးမျက်နှာမြို့နယ်ရှိ သဲနုကုန်း၊ ကျားကိုက်ကွင်းကျေးရွာ အနီးဝန်းကျင်တွင်လည်း တိုက်ပွဲများဖြစ်ပွားနေကြောင်း ဒေသခံများက ပြောသည်။
လေးမျက်နှာဒေသခံ နောက်ထပ်အမျိုးသားတစ်ဦးက “ အဓိက နှစ်ဖက်လုံး ပုသိမ်-မုံရွာလမ်းပိုင်းကို စိုးမိုးနိုင်ဖို့ ကြိုးပမ်းနေကြတာ။ တော်လှန်ရေးအင်အားစုတွေ ထိန်းချုပ်ထားတဲ့ ရွာတွေရှိသလို စစ်ကောင်စီထိန်းချုပ်ထားတဲ့ ရွာတွေလည်း ရှိတယ်။ သဲနုကုန်းတို့၊ ပန်းတောကြီးတို့ဖက်မှာလည်း စစ်ကောင်စီ စစ်ကြောင်းထိုးလို့ တိုက်ပွဲတွေရှိတယ်။ အမတ ၃၄၄ ဖက်ကလည်း အခုလက်နက်ကြီးသံတွေ ကြားရတယ်” ဟု ပြောသည်။
အာရက္ခတပ်တော်နှင့် ပူးပေါင်းတပ်များက လေးမျက်နှာမြို့နယ်ရှိ သဲနုကုန်းရဲစခန်းကို ပြီးခဲ့သည့် ဇွန် ၁၆ ရက်က သိမ်းပိုက်ခဲ့ကြသည်။
အာရက္ခတပ်တော်နှင့် ပူးပေါင်းတပ်များသည် ဧရာဝတီစစ်မျက်နှာပြင်တွင် ၂၀၂၅ နှစ်ဆန်းပိုင်းကစတင်ကာ တိုက်ပွဲများ ဖော်ဆောင်နေခြင်းဖြစ်သည်။
လက်ရှိတွင် ဧရာဝတီတိုင်းအတွင်းက အင်္ဂပူ၊ လေးမျက်နှာ၊ ရေကြည်၊ သာပေါင်း၊ ပုသိမ်မြို့နယ်တို့မှာ တိုက်ပွဲများရှိနေပြီး စစ်ကောင်စီ၏ တပ်စခန်း ၉ ခုထက်မနည်းကိုလည်း AA နှင့် ပူးပေါင်းတပ်များက သိမ်းပိုက်ထားသည်။
DMG
