ရှမ်းတောင် ငလျင်ဒဏ်သင့်ပြည်သူများ အကူအညီရရှိမှု နည်းပါး

ပြီးခဲ့သည့် မတ်လ ၂၈ ရက်နေ့က လှုပ်ခတ်ခဲ့သည့် အင်အားပြင်း စစ်ကိုင်းငလျင်ဒဏ်ကြောင့် ထိခိုက်ပျက်စီးမှုများပြားခဲ့သည့် ရှမ်းပြည်တောင်ပိုင်းတွင် ယနေ့အချိန်ထိ အကူအညီရောက်ရှိမှု နည်းပါးနေဆဲဖြစ်သည်ဟု ကူညီကယ်ဆယ်ရေးလုပ်ဆောင်ပေးနေသူများက ပြောသည်။

ငလျင်လှုပ်ခတ်ပြီး နှစ်ပတ်ကျော်ကြာလာသည်အထိ အကူအညီများရောက်ရှိမှုနည်းပါးနေပြီး ကြန့်ကြာရခြင်းမှာ စစ်ကောင်စီ၏ ပိတ်ပင်တားဆီးမှုများကြောင့်ဖြစ်သည်ဟု ပအိုဝ်းလူငယ်အစည်းအရုံး PYO တာဝန်ရှိသူက ပြောသည်။

PYO ဥက္ကဋ္ဌ ခွန်ဦးက “ ပထမတစ်ချက်က နိုင်ငံတကာကအကူအညီတွေရော ပြည်တွင်းထဲကအကူညီတွေရော တော်တော်များများက သွားလာခွင့် အဟန့်အတားတချို့ရှိတယ်။ စစ်ကောင်စီကိုယ်တိုင်ကလည်း အကူအညီပေးတဲ့ တချို့နေရာတွေမှာ သူတို့ခွင့်ပြုချက်ရမှ ဆိုတဲ့ဟာမျိုးတွေကြောင့် နှောင့်နှေးကြန့်ကြာမှုတွေ အဓိက တွေ့နေရတာ” ဟု ပြောသည်။

ထို့ကြောင့် လိုအပ်သည့်နေရာများကို အကူအညီများ အမြန်ဆုံးရောက်ရှိနိုင်ရေး အဆင့်ဆင့်က ပိတ်ပင်တားဆီးမှုများကို လျော့ချဖို့လိုအပ်သည်ဟု ခွန်ဦးက ဆက်ပြောသည်။

“ဒုတိယတစ်ခုက သတင်းအချက်လက်တွေ မြန်မြန်တင်နိုင်မှ မြန်မြန်လုပ်နိုင်မှ သူများသိပြီးမှ မြန်မြန်ဆောင် ရွက်လို့ ရတယ်ပေါ့လေ။ ပြောရမယ်ဆိုရင် ယန္တရားတစ်ခုလုံးလည်း အလုပ်ဖြစ်မနေဘူး။ ကိုယ့်နိုင်ငံ ကိုယ့်ဒေသမှာပေါ့လေ၊ အဲ့လိုမျိုး မြန်မြန်ဆန်ဆန် ထိထိရောက်ရောက်လုပ်ဖို့ကတော့ သေချာတယ်။ အခုကတော့ လူထုကနေလူထုကို လွတ်လွတ်လပ်လပ်ကူဖို့ ဆောင်ရွက်ဖို့ အဓိကလိုအပ်တယ်။ တားဆီးတာ ပိတ်ပင်တာလည်း လျော့ဖို့လည်း လိုတယ်လေနော်” ၎င်းက ဆက်ပြောသည်။

မတ်လ ၂၈ ရက်နေ့က လှုပ်ခတ်ခဲ့သည့် စစ်ကိုင်းငလျင်ကြောင့် အင်းလေးဒေသအတွင်း ပျက်စီးသွားသည့် နေအိမ်များ အမြန်ဆုံး ပြန်လည်ဆောက်လုပ်နိုင်ရေး ကူညီပေးကြဖို့ ဒေသခံများက မျှော်လင့်နေကြသည်။

စားရေးသောက်ရေး၊ စားနပ်ရိက္ခာထက် နေရေးထိုင်ရေးအတွက် မိုးတွင်းအမီ နေအိမ်များ အမြန်ဆုံး ပြန်လည်ဆောက်လုပ်နိုင်ရေး ကူညီပေးစေချင်သည်ဟု အင်းလေးဒေသခံများက ပြောသည်။

အလားတူ ငလျင်ဒဏ်သင့်ခဲ့သော အင်းလေးဒေသနှင့် အနီးတဝိုက်တွင် စစ်ကောင်စီတပ်ဘက်က စစ်ကြောင်းထိုးနေသည့်အပြင် လေကြောင်းကနေပါ ဗုံးကြဲတိုက်ခိုက်နေသည့်အတွက် လူထုအပေါ် ပိုမိုဒုက္ခရောက်စေသည်ဟု PYO ဥက္ကဋ္ဌက ပြောသည်။

ခွန်ဦးက “ ငလျင်ဒဏ်သင့်နေတဲ့ကာလမှာ တိုင်းရင်းသားတွေဘက်ကရော အင်အားစုတွေ တော်တော်များများက အပစ်ရပ်ထားတယ်။ စစ်ကောင်စီဘက်က အပစ်ရပ်ဖို့ ကြေညာထားသော်လည်းပဲ လက်တွေ့မြေပြင်မှာ စစ်ကြောင်းနဲ့ လေကြောင်းနဲ့ စစ်ထိုးတာတွေလည်း ရှိနေသေးတယ်။ ပြီးတော့မှ ပိတ်ပင်မှုတွေရှိနေသေးတဲ့အတွက်ကြောင့်မို့လို့ ဒါ လူထုအပေါ်မှာ ဒုက္ခအများကြီး ပိုရောက်စေတာမျိုးလို့ တွေ့မိတယ်ပေါ့လေနော်” ဟု ပြောသည်။

ငလျင်ဒဏ်သင့်ဒေသတွင် ပါဝင်သည့် ညောင်ရွှေမြို့၏တောင်ဘက် ၁၀ မိုင်ခန့်တွင်လည်း စစ်ကောင်စီတပ်၊ ပအိုဝ်းပြည်သူ့စစ်အဖွဲ့ PNA တို့နှင့် တော်လှန်ရေးတပ်ဖွဲ့တို့အကြား တိုက်ပွဲများ ဆက်လက် ဖြစ်ပွားနေဆဲဟု ဒေသခံများက ဆိုသည်။

ငလျင်ဒဏ်ကြောင့် အင်းလေးဒေသတွင် ထိခိုက်ပျက်စီးသွားသည့် နေအိမ်ပေါင်း အလုံးရေ ၃၀၀၀ ကျော်ရှိသည်ဟု ကူညီကယ်ဆယ်ရေး ဆောင်ရွက်ပေးနေသူများက ပြောသည်။

ပျက်စီးသွားသည့် နေအိမ်အဆောက်အအုံများကို ဖယ်ရှားရှင်းလင်းမှုများ လုပ်ဆောင်နိုင်ရေးလည်း အကူအညီများ လိုအပ်နေဆဲဖြစ်ပြီး လက်ရှိတွင် ဒေသခံများ ကိုယ်တိုင်ကပင် ကိုယ်ထူကိုယ်ထ လုပ်ဆောင်နေကြရသည်ဟု ဆိုသည်။

ရှမ်းပြည်တောင်ပိုင်းက ညောင်ရွှေ၊ အင်းလေး၊ ပင်လောင်းနှင့် အောင်ပန်းမြို့နယ်တို့၌ ငလျင်ဒဏ်ကြောင့် ထိခိုက်သေဆုံးသူ စုစုပေါင်း ၁၅၁ ဦးရှိခဲ့ပြီး နေအိမ်များလည်း ဆိုးရွားစွာ ပျက်စီးဆုံးရှုံးမှုများ ရှိခဲ့သည်ဟု PYO က ဧပြီလ ၃ ရက်နေ့တွင် ထုတ်ပြန်ထားပါသည်။

NMG ပေးပို့သည်။