ပိုင်ကျုံ၊ မော်ကွီးလုစခန်းသိမ်းတိုက်ပွဲကြောင့် ထိုင်းဘက် တိမ်းရှောင်နေရသူ ၂၀၀ ကျော် နေရပ်ပြန်လာ

ထိုင်း-မြန်မာနယ်စပ်၊ ကရင်အမျိုးသားအစည်းအရုံး – KNU ထိန်းချုပ်နယ်မြေ၊ တပ်မဟာ (၇) ဖားအံခရိုင်၊ ပိုင်ကျုံမြို့နယ်ရှိ မော်ကွီးလု စစ်ကောင်စီတပ်စခန်းသိမ်းတိုက်ပွဲကြောင့် ထိုင်းနိုင်ငံဘက်သို့ မေလ ၁၅ ရက်နေ့ကတည်းက ရောက်ရှိတိမ်းရှောင်နေသည့် စစ်ရှောင်များ နေရပ်ပြန်လာကြပြီဖြစ်ကြောင်း သိရသည်။

ထိုင်းသတင်းရင်းမြစ်အဆိုအရ စစ်ကောင်စီ၏ မော်ကွီးလုစခန်းကို ကရင်အမျိုးသားလွတ်မြောက်ရေးတပ်မတော် – KNLA ပူးပေါင်းတပ်ဖွဲ့က တိုက်ခိုက်နေခြင်းကြောင့် သောင်ရင်းမြစ်ကိုဖြတ်၍ ထိုင်းနိုင်ငံ၊ တာ့ခ်ခရိုင်၊ တာ့ဆောင်ယန်းမြို့နယ်၊ မယ်လမြို့နယ်ခွဲအတွင်း ဘုန်းကြီးကျောင်းနေရာနှစ်ခုတွင် စစ်ရှောင်ရောက်ရှိလာသူ ၄၁၄ ဦးရှိသည်ဟု ဆိုသည်။

မေလ ၁၆ ရက်နေ့က KNLA ဘက်မှ အဆိုပါစခန်းကို အပြီးသတ် သိမ်းပိုက်လိုက်နိုင်ပြီးနောက် မေလ ၁၇ ရက် မနက်ပိုင်းတွင် ထိုင်းဘုန်းကြီးကျောင်းတစ်နေရာ၌ စစ်ရှောင်နေသူ ၂၀၀ ကျော်မှာ နေရပ်ပြန်လာကြခြင်းဖြစ်သည်ဟု စစ်ရှောင်များ၏ပြောပြချက်အရ သိရသည်။

နေရပ်ပြန်ရောက်ရှိနေသူ စစ်ရှောင်အမျိုးသမီးတစ်ဦးက “ဘုန်းကြီးကျောင်းမှာက ၂၀၀ ကျော်ပဲ။ ကလေးတွေလည်းအများကြီးပါတယ်။ ကျမတို့ ဒီမနက်ပြန်လာကြတယ်။ တခြားအပြင်မှာ (အသိအိမ်) နေတဲ့သူတွေက မနေ့ကတည်းက သူတို့ပြန်လာတယ်။ ထိုင်းဘက်က အကုန်လုံးစီစဥ်ပေးပါတယ်။ တခြားအဖွဲ့လည်း လာလှူတာရှိတယ်” ပြောသည်။

ထိုင်းအာဏာပိုင်များအပြင် စစ်ရှောင်များအတွက် ကုလသမဂ္ဂဒုက္ခသည်များဆိုင်ရာမဟာမင်းကြီးရုံး – UNHCR, ကလေးသူငယ်များကူညီစောင့်ရှောက်ရေးဆိုင်ရာအသင်း – Save the Children, Shoklo Malaria Research Unit – SMRU အပါအဝင် အခြားအလှူရှင်အဖွဲ့များကလည်း စားသောက်စရာနှင့် ကလေးများအတွက် ကျောင်းသုံးပစ္စည်းများ ထောက်ပံ့လှူဒါန်းခဲ့ကြကြောင်း သိရသည်။

နှစ်လတာအတွင်း ဖားအံခရိုင်၊ ဒေါနတောင်တကြောရှိ စစ်ကောင်စီ၏ နယ်စပ်ခြေကုပ်စခန်းများကို KNLA အပါအဝင် ကရင်အမျိုးသားကာကွယ်ရေးတပ်ဖွဲ့ – KNDO နှင့် ပူးပေါင်းတပ်များက ဆက်တိုက်သိမ်းယူထားနိုင်ခဲ့သည်။

တိုက်ပွဲဖြစ်စဥ်တိုင်း စစ်ကောင်စီ၏ လေကြောင်းရန်ကြောင့် ဒေသခံများမှာ ထိုင်းနိုင်ငံဘက် ထွက်ပြေးစစ်ရှောင်ကြရကြောင်း ထိုင်းသတင်းအရင်းအမြစ်များက ဖော်ပြသည်။

ဧပြီနှင့် မေလအတွင်း စစ်ကောင်စီ၏ မော်ကွီးလုစခန်းအပါအဝင် တာလယ်ဗျူဟာ၊ တခေါ်ဘီခွီး၊ ပူလူတူ၊ ခလယ်ဒေး၊ မော်ဖားသူ စခန်းများကို KNLA ပူးပေါင်းတပ်က သိမ်းယူနိုင်ခဲ့သည်။

ကရင်ပြည်တွင်း နေရပ်စွန့်ခွာ သူများကော်မတီ – CIDKP က စာရင်းထုတ်ပြန်ချက်အရ ထိုစခန်းသိမ်းတိုက်ပွဲများမတိုင်ခင် ပြီးခဲ့သည့် မတ်လအတွင်း ဖားအံခရိုင်တွင် စုစုပေါင်းစစ်ရှောင်ဦးရေ ၃၀,၀၀၀ နီးပါး ရှိလာသည်။

KIC ပေးပို့သည်။