စစ်ကောင်စီ၏ အင်အားသုံးအကြမ်းဖက်မှုများကြောင့် ယခု ၂၀၂၃ ခုနှစ်၊ စက်တင်ဘာလ တစ်လတာအတွင်း အသက် ၁၈ နှစ်အောက် ကလေးသူငယ်များ ထိခိုက်သေဆုံးခဲ့ရသည့် ဖြစ်စဥ်ပေါင်း ၂၃ ခု အထိ ရှိကြောင်း နယူးမြန်မာဖောင်ဒေးရှင်း- NMF ၏ Human Rights Program/လူ့အခွင့်အရေးအစီအစဥ်က ထုတ်ပြန်သည်။
New Myanmar Foundation-NMF ၏ ထုတ်ပြန်ချက်တွင် ကလေးသူငယ်များ ထိခိုက်သေဆုံးမှု ဖြစ်စဥ်များ အနက် စစ်ကိုင်းတိုင်း၊ ပဲခူးတိုင်းနှင့် ကရင်ပြည်နယ်တို့တွင် စစ်ကောင်စီက စာသင်ကျောင်းနှင့် လူနေအိမ်များ ပေါ်သို့ လက်နက်ကြီးနှင့် လေကြောင်းတိုက်ခိုက်ခဲ့မှုကြောင့် ထိခိုက်သေဆုံးခဲ့ရသည့် ကလေးသူငယ်ဦးရေမှာ ပိုမိုများပြားကြောင်း ဖော်ပြထားသည်။
ယင်းတို့ထဲတွင် စစ်ကိုင်းတိုင်း၊ ဝန်းသိုမြို့နယ်မှ အသက် (၁၀) နှစ်အရွယ် ကျောင်းသား ၁ ဦးနှင့် ကရင်ပြည်နယ် ဖာပွန်မြို့နယ်ရှိ ထီးဝေါ်ထကျေးရွာ စာသင်ကျောင်းမှ ကျောင်းသား ၄ ဦးတို့သည် စစ်ကောင်စီ၏ လေကြောင်းနှင့် လက်နက်ကြီး ပစ်ခတ်မှုကြောင့် အသက်သေဆုံးခဲ့ရကြောင်း NMF ၏ ထုတ်ပြန်ချက်တွင် ဖော်ပြထားသည်။
အထက်ပါမြို့နယ်များနှင့် ပဲခူးတိုင်း၊ ရွှေကျင်မြို့နယ်မှ အသက် ၆ လသားအရွယ်နှင့် ၈ နှစ်အရွယ် ကလေးငယ် ၂ ဦး အပါအဝင် လူစုစုပေါင်း ၃၁ ဦး တို့သည် ထိခိုက်ဒဏ်ရာရမှု ဖြစ်ပွားခဲ့ကြောင်း ထုတ်ပြန်ချက်တွင် ဖော်ပြထားချက်အရ သိရသည်။
ပဲခူးတိုင်း၊ ညောင်လေးပင်ခရိုင်မှ ဒေသခံအမျိုးသမီးတစ်ဦးက “ကျမတို့ဘက်မှာက လက်နက်ကြီးနဲ့ လေယာဥ်ကြောင့်ရော မိုင်းတွေထောင်ထားလို့ရော ကလေးတွေ ထိခိုက်သေဆုံးတာ၊ စစ်တပ်က ပစ်ရင်လည်း ရမ်းသမ်းပစ်တာဆိုတော့ အိမ်မှာနေရင်းသေတာက ပိုများတယ်။ မိုင်းတွေဆိုလည်း သူတို့ပြန်ဆုတ်တဲ့ လမ်းတွေမှာ ထောင်ထားခဲ့တော့ စစ်ရှောင်ကလေးတွေက ဆန်တို့ဘာတို့ယူဖို့ အိမ်ပြန်ရင်း နင်းမိပြီး ထိတာမျိုးပေါ့” ဟု ပြောဆိုသည်။
ကရင်အမျိုးသားအစည်းအရုံး- KNU တပ်မဟာ (၃) ထိန်းချုပ်သည့် အဆိုပါညောင်လေးပင်ခရိုင်အတွင်းတွင် ယခု ၂၀၂၃ ခုနှစ် ကာလတလျှောက် စစ်ကောင်စီမှ လက်နက်ကြီးနှင့် လေကြောင်းတိုက်ခိုက်မှု အများအပြား ရှိနေသောကြောင့် စာသင်ကျောင်းများ ပိတ်လိုက်ဖွင့်လိုက် အခြေအနေရှိနေပြီး ကျောင်းနေအရွယ်ကလေးများ ပညာရေး နှောင့်နှေးနေကြကြောင်း မြေပြင်အရင်းအမြစ်များထံမှ သိရသည်။
ထို့ကြောင့် နိုင်ငံတကာလူသားချင်းစာနာမှု ဥပဒေကို ချိုးဖောက်နေသော စစ်ကောင်စီနှင့် လက်အောက်ခံ အဖွဲ့များ၏ တာဝန်ယူ၊ တာဝန်ခံမှု အလျင်အမြန် ပေါ်ပေါက်စေရန်နှင့် ထိရောက်သော နည်းလမ်းများဖြင့် ပိတ်ဆို့ အရေးယူမှုလုပ်ရန် ကုလသမဂ္ဂအပါအဝင် နိုင်ငံတကာအဖွဲ့အစည်းများသို့ NMF က တိုက်တွန်း ထားသည်။
၂၀၀၈ ခုနှစ်မှ စတင်တည်ထောင်ခဲ့သော NMF သည် ထိုင်းနိုင်ငံ၊ မဲဆောက်မြို့၌ အခြေစိုက်၍ လူသားချင်း စာနာရေးအကူအညီများ အပါအဝင် စစ်အာဏာသိမ်းကာလအတွင်း ထိုင်းနိုင်ငံသို့ ထွက်ပြေးခိုလှုံလာသော မြန်မာနိုင်ငံသားများအတွက် ရိက္ခာထောက်ပံ့ခြင်းနှင့် အလုပ်အကိုင်အခွင့်အလမ်းအတွက် ပံ့ပိုးပေးခြင်း အစီအစဥ်များကို လုပ်ဆောင်ပေးနေသော အဖွဲ့အစည်းတစ်ခု ဖြစ်သည်။
KNU ထိန်းချုပ်နယ်မြေများ အတွင်းတွင်လည်း စစ်အာဏာသိမ်းကာလအတွင်း စစ်ကောင်စီ၏ လေကြောင်းနှင့် လက်နက်ကြီး အသုံးပြု တိုက်ခိုက်ခဲ့မှုကြောင့် သေဆုံးခဲ့သည့် ကလေးငယ် ၂၅ ဦး ထက်မနည်း ရှိနေပြီး ၁၉ ဦး ထက်မနည်း ထိခိုက်ဒဏ်ရာ ရရှိခဲ့သည်ဟု ကရင်လူ့အခွင့်အရေးအဖွဲ့-KHRG က ပြောဆိုထားသည်။
အလားတူ ပြီးခဲ့သည့် ၂၀၂၂ ခုနှစ်အတွင်း မြန်မာနိုင်ငံတဝှမ်း ကလေးသူငယ် ထိခိုက်သေဆုံးမှု ဖြစ်စဥ်ပေါင်း ၅၀၀ ကျော် ဖြစ်ပွားခဲ့ရာ အမှုပေါင်း တစ်ဝက်ကျော်သည် စစ်ကောင်စီက ကျုးလွန်ခဲ့ခြင်းဖြစ်ကြောင်း ဇွန်လအတွင်း ထုတ်ပြန်သည့် ကုလသမဂ္ဂအတွင်းရေးမှူးချုပ်၏ ၂၀၂၂ ခုနှစ် အတွက် ကလေးသူငယ်များနှင့် လက်နက်ကိုင် ပဋိပက္ခဆိုင်ရာ အစီရင်ခံစာတွင် ဖော်ပြထားချက်အရ သိရသည်။
ကေအိုင်စီ ပေးပို့သည်။
