ကရင်အမျိုးသားအစည်းအရုံး၊ KNU တပ်မဟာ (၃) ထိန်းချုပ်နယ်မြေ၊ ညောင်လေးပင်ခရိုင်၊ ကျောက်ကြီးမြို့နယ်၊ ကျောင်းကုန်းကျေးရွာအတွင်းသို့ စစ်ကောင်စီက ဒရုန်းဗုံးနှင့် လက်နက်ကြီးများ ပစ်ခတ်တိုက်ခိုက်ခဲ့တာကြောင့် လသားအရွယ်ကလေးငယ် ၁ ဦးနှင့် အသက်မပြည့်သေးသည့် ကလေးငယ် ၁ ဦး၊ စုစုပေါင်းကလေး ၂ ဦး ထိခိုက်ဒဏ်ရာရရှိခဲ့သည်။
နိုဝင်ဘာ ၁၃ ရက်နေ့ နံနက် ၁၀ နာရီဝန်းကျင်က ကျောင်းကုန်းကျေးရွာအနီးတဝိုက် တိုက်ပွဲမဖြစ်ဘဲ စစ်ကောင်စီတပ်က ရွာအတွင်း လက်နက်ကြီးနှင့် ဒရုန်းဗုံးများ ကြဲချတိုက်ခိုက်ခဲ့ခြင်းဖြစ်ပြီး နေအိမ်ပေါ်သို့ ကျရောက်ပေါက်ကွဲခဲ့ရာမှ နေအိမ်အတွင်းရှိနေသည့် ကလေးငယ် (၂) ဦး ထိခိုက်ဒဏ်ရာများ ရရှိခဲ့သည်ဟု ဒေသခံအမျိုးသမီးက ဆိုသည်။
“ကလေးမိဘတွေက အိမ်အပြင်မှာမို့လို့ မထိဘူး။ ကလေးအကြီးလေး တစ်ယောက်ကိုက ပုခက်ထဲက လသားကလေးကို ကြည့်ခိုင်းထားတာထင်တယ်။ အဲ့မှာ အိမ်ပေါ်ကို တည့်တည့်ကျတာ။ ကလေးတွေကိုတော့ ဆေးရုံပို့လိုက်ပြီ။ အကြီးလေးတစ်ယောက်က ဒဏ်ရာနည်းနည်းများတယ်” ဟု အဆိုပါဒေသခံအမျိုးသမီးက ပြောသည်။
ယင်းအပြင် စစ်ကောင်စီတပ်က ထိုနေ့ မွန်းလွဲပိုင်းအထိ ကျောင်းကုန်းကျေးရွာသို့ ပစ်ခတ်တိုက်ခိုက်မှု လုပ်ဆောင်နေသဖြင့် ကျောင်းကုန်းရွာသားအချို့ နေရပ်စွန့်ခွာတိမ်းရှောင်နေရကြောင်းလည်း ဒေသခံများက ပြောသည်။
ကျောက်ကြီးမြို့နယ်တွင် အောက်တိုဘာလကုန်မှ နိုဝင်ဘာလအတွင်း စစ်ကောင်စီစစ်ကြောင်းကို တော်လှန်ရေးပူးပေါင်းတပ်ဖွဲ့က ကြားဖြတ်တိုက်ခိုက်မှုများ ဖြစ်ပွားခဲ့ရာ စစ်ကောင်စီဘက်က အထိနာသဖြင့် ယခုလို ပြည်သူလူထုနေထိုင်သည့် ကျေးရွာဘက်သို့ ရည်ရွယ်ချက်ရှိရှိ ပစ်ခတ်တိုက်ခိုက်နေခြင်းဖြစ်မည်ဟု ဒေသခံများက သုံးသပ်ပြောဆိုကြသည်။
ယခုနိုဝင်ဘာလအတွင်း စစ်ကောင်စီတပ်က ပြည်သူနေထိုင်ရာကျေးရွာများသို့ ပစ်ခတ်နေမှုမှာ ကျောက်ကြီးမြို့နယ်သာမက မုန်းမြို့နယ်နှင့် ရွှေကျင်မြို့နယ်တို့တွင်လည်း ဖြစ်ပွားလျက်ရှိပြီး ယင်းကြောင့် ပြည်သူ ၂ ဦးထိခိုက်ဒဏ်ရာရရှိခြင်းအပြင် စာသင်ကျောင်းနှင့် နေအိမ်ပျက်စီးခြင်းတို့ပါရှိခဲ့ကြောင်း KNU -ဗဟို၏ နိုဝင်ဘာလ ၁၂ ရက်နေ့ ထုတ်ပြန်ချက်တွင် ဖော်ပြထားသည်။
KIC ပေးပို့သည်။
