“ဈေးက တက်တဲ့အပြင် ကုန်ပစ္စည်း ပြတ်လပ်တဲ့ အထိ ဖြစ်သွားတယ်။ တံတားတွေ သုံးလို့ မရတော့ ကုန်တွေကို ဖြူးဘက်ကနေ အသိမိတ်ဆွေက တဆင့် မှာ မှာပြီး ဒီဘက်အထိ ပြန်သယ်ဖို့ ကူးတို့လှေတွေကို အသုံးပြုနေရတဲ့ အခြေအနေပါ” ညောင်လေးပင်ခရိုင်ရှိ ဒေသခံစစ်ရှောင်ကူညီသူ

ညောင်လေးပင်ခရိုင်ရှိ ဒေသခံစစ်ရှောင်ကူညီသူ တစ်ဦးနှင့် အမေးအဖြေ

ကေအဲန်ယူတပ်မဟာ (၃) ထိန်းချုပ် နယ်မြေ ဖြစ်သည့် ညောင်လေးပင်ခရိုင် နတ်သံကွင်းတွင် ပြီးခဲ့သည့် ဇွန်လ ၆ ရက် က စပြီး စစ်ကောင်စီနှင့် ကရင်အမျိုးသား လွတ်မြောက်ရေးတပ်မတော်-KNLA ပူးပေါင်း တပ်ဖွဲ့များကြား တိုက်ပွဲ ဖြစ်ပွားခဲ့သည်။

တိုက်ပွဲများ အတွင်း စစ်ရေးလှုပ်ရှားမှု အတွက် အရေးပါသော တံတား ၃ စင်း ကျိုးပျက်ခဲ့သည်။ ထို့နောက် စစ်ကောင်စီက နတ်သံကွင်းမြို့အတွင်း လေကြောင်းအသုံးပြု၍ ပစ်ခတ် တိုက်ခိုက်မှုများ လုပ်ဆောင်ခဲ့သဖြင့် ဒေသခံများဘေးလွတ်ရာသို့ ထွက်ပြေးတိမ်းရှောင်နေရသည်။

နယ်မြေ မတည်ငြိမ်မှုများ အကြား ဒေသတွင်း အခြေအနေနှင့် စစ်ဘေးရှောင်များ၏ အခက်အခဲများအား သိရှိနိုင်ရန် ဒေသခံ စစ်ဘေးရှောင်များကို ကူညီနေသူတစ်ဦးအား ဆက်သွယ်မေးမြန်းခဲ့ပါသည်။

မေး။ ။ တံတား ၃ စင်း ပျက်စီးတဲ့အထဲမှာ ကုန်စည်ပို့ဆောင်မှုနဲ့ သွားလာရေးအတွက် အားထားရတဲ့ နတ်သံကွင်း-ကျောက်ကြီး တံတားလည်းပါတယ်လို့ သိရတယ်။ အဲဒီအတွက် ဒေသတွင်း သွားလာရေးနဲ့ ကုန်ဈေးနှုန်းအခြေအနေ ဘယ်လိုရှိနေပါလဲ။

ဖြေ။ ။ ကုန်ဈေးနှုန်းတွေ နှစ်ဆနီပါး တက်ကုန်ပါတယ်။ အဓိက ဆန်ပေါ့၊ မုန်း-ကျောက်ကြီးကို ဆွဲနေတဲ့ ကားလမ်းမကြီးမှာ ဆန်တစ်အိတ် ဈေးတက်တာ မသိသာပေမယ့် တောင်ခြေနားမှာ ဆိုရင် အရင် ၅ သောင်း ဝန်းကျင်ကနေ အခု ရှစ်သောင်းဝန်းကျင် ဖြစ်သွားပြီ။ ဈေးက တက်တဲ့အပြင် ကုန်ပစ္စည်း ပြတ်လပ်တဲ့ အထိ ဖြစ်သွားတယ်။ တံတားတွေ သုံးလို့ မရတော့ ကုန်တွေကို ဖြူးဘက်ကနေ အသိမိတ်ဆွေက တဆင့် မှာ မှာပြီး ဒီဘက်အထိ ပြန်သယ်ဖို့ ကူးတို့လှေတွေကို အသုံးပြုနေရတဲ့ အခြေအနေပါ။

မေး။ ။ စစ်ကောင်စီက ယခင်လပိုင်းတွေကတည်းက ကျောက်ကြီးဘက်ကို ဆန်သယ်ဆောင်ခွင့် ကန့်သတ်ထားတယ်လို့ သိရတယ်။ ဆိုတော့ စစ်ရှောင်တွေအတွက် စားနပ်ရိက္ခာတွေထောက်ပံ့ဖို့ ဆန်တင်သွင်းတဲ့နေရာမှာ ဘာအခက်အခဲရှိနေလဲ။

ဖြေ။ ။ အဲဒီကန့်သတ်ချက်ကတော့ အခုထိလည်း ဆက်ရှိနေတုန်းပဲ။ စစ်တောင်းမြစ် အရှေ့ဘက်ကမ်းကို ပြည်သူတွေက အိမ်စားဖို့ ဆန်တစ်အိတ်လောက် သယ်ရင်တောင် စစ်တပ်က စစ်ဆေးတယ်။ တချို့ ဆိုရင်လည်း စစ်ဆေးရေးဂိတ်မှာ ဆန်အိတ်ထားခဲ့ ခိုင်းပြီး ကျပ်ငွေ တစ်သောင်း (သို့မဟုတ်) ငါးထောင်နဲ့ ပြန်လာရွေးခိုင်း တာတွေပါ ကြုံရတယ်။

မေး။ ။ စစ်ရှောင်တွေအတွက် စားနပ်ရိက္ခာထောက်ပံ့မှုအပြင် နောက်ထပ်ရော ဘာတွေအခက်အခဲရှိနေလဲ။

ဖြေ။ ။ မိုးတွင်းကာလ ဖြစ်တဲ့အတွက် အမိုးအကာတွေ လိုတာပေါ့။ ပြီးတော့ ဆေးဝါးတွေလည်း လိုအပ်မှုလည်း ရှိပါတယ်။ တချို့ စစ်ရှောင်တွေဆို တိုက်ပွဲဖြစ်လို့ ကိုယ်လွတ်ရုန်းပြီး ထွက်ပြေးနေရတဲ့သူတွေ အများကြီးလည်း ရှိတော့ သူတို့တွေအတွက် အဝတ်အစားတွေနဲ့ စောင်တွေ ခြင်ထောင်တွေလည်း လိုအပ်ပါတယ်။

မေး။ ။ လက်ရှိ နယ်မြေအခြေအနေကိုလည်း ပြောပြပေးပါဦး။

ဖြေ။ ။ ညောင်လေးပင်ခရိုင်ထဲမှာ ပစ်ခတ်မှုတွေကတော့ ဆက်ရှိနေတုန်းပါပဲ။ ဒေသခံ ထိခိုက်ဒဏ်ရာရမှု ရှိမရှိ ကတော့ ကျနော်တို့ဘက်မှာ လိုင်းတွေ တော်တော်လေး မကောင်းတဲ့အတွက် အဆက်အသွယ် ပျက်နေတော့ အတိအကျပြောဖို့က ခဲယဉ်းပါတယ်။

မေး။ ။ လက်ရှိ လက်လှမ်းမီသလောက် စစ်ဘေးရှောင် အရေအတွက်ရော ဘယ်လိုရှိလဲ။

ဖြေ။ ။ ကျနော်တို့ အခြေစိုက်တဲ့ မုန်းမြို့ တစ်ခုတည်းအနေနဲ့ ပြောရရင် စစ်ဘေးရှောင်ဦးရေ နှစ်သောင်း ဝန်းကျင် ရှိပါတယ်။ အဲဒီအထဲမှာ အမျိုးသားထက် အမျိုးသမီး၊ ကလေးသူငယ်နဲ့ သက်ကြီးရွယ်အိုတွေက အများဆုံး တွေ့ရပါတယ်။

ကေအိုင်စီ-ပေးပို့သည်။