တရုတ်ကွန်မြူနစ်ပါတီသည် မြန်မာနိုင်ငံမှ နိုင်ငံရေးပါတီ ၄ ခုအား တရုတ်နိုင်ငံသို့ လာရောက်လည်ပတ်ရန်ဟုဆိုကာ သီးသန့်ဖိတ်ကြားခဲ့ပါသည်။ အဆိုပါ နိုင်ငံရေးပါတီများမှာ စစ်ကောင်စီမှ မှတ်ပုံတင်ခွင့်ပြုထားသော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ ပြည်သူ့ပါတီ၊ ရခိုင့်ဦးဆောင်ပါတီနှင့် ရှမ်းတိုင်းရင်းသားများ ဒီမိုကရက်တစ်ပါတီ (ကျားဖြူ) တို့ဖြစ်ပြီး ဇူလိုင် ၂၀ ရက်မှ ၂၇ ရက်ထိ ဖိတ်ကြားခံထားရခြင်းဖြစ်ပါသည်။ 1
အဆိုပါ နိုင်ငံရေးပါတီများကို ဖိတ်ခေါ်ခြင်းသည် သမ္မတဟောင်း ဦးသိန်းစိန်နှင့် ဒုတိယစစ်ခေါင်းဆောင် စိုးဝင်းတို့၏ တရုတ်ခရီးစဉ်များအပြီးတွင် ပေါ်ပေါက်လာခြင်းဖြစ်ပါသည်။
တရုတ်နိုင်ငံခြားရေးဝန်ကြီး ဝမ်ယိက သမ္မတဟောင်း ဦးသိန်းစိန်အား စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်အား အာဏာစွန့်ဖို့စည်းရုံးပေးရန် ပြောကြားခဲ့သည်ဟု စင်ကာပူအခြေစိုက် သတင်းဌာနဖြစ်သော Channel News Asia က ဇူလိုင်လ ၁၀ ရက်တွင် ဖော်ပြခဲ့ပါသည်။ ၎င်းတို့တွေ့ဆုံမှုတွင် စစ်ခေါင်းဆောင် မင်းအောင်လှိုင်အနေဖြင့် ၎င်းယူထားသည့် အာဏာကိုလွှဲပြောင်းပြီး ရွေးကောက်ပွဲအတွက် လမ်းခင်းပေးမည့် ကြားဖြတ်အစိုးရတစ်ခု ဖွဲ့စည်းရန် ဦးသိန်းစိန်အနေဖြင့် စည်းရုံးပေးဖို့ ပြောကြားခဲ့သည်ဟု ဖော်ပြထားပါသည်။ ဦးသိန်းစိန်သည် ဇွန်လကုန်ပိုင်းက တရုတ်နိုင်ငံ၏ ဖိတ်ကြားမှုဖြင့် ပေကျင်းမြို့သို့ သွားရောက်ခဲ့ပြီး တရုတ်နိုင်ငံခြားရေးဝန်ကြီးနှင့် သီးသန့်တွေ့ဆုံခဲ့ခြင်းဖြစ်ပါသည်။ 2
ဇူလိုင် ၆ ရက်တွင် စစ်ကောင်စီတပ် ဒုတိယဗိုလ်ချုပ်မှူးကြီး စိုးဝင်းသည် တရုတ်နိုင်ငံသို့ ၃ ရက်ကြာ သွားရောက်ခဲ့ပါသည်။ ယင်းခရီးစဉ်နှင့်ပတ်သက်ပြီး စစ်ကောင်စီထိန်းချုပ်မှု လက်အောက်မှ လွတ်လာနေပြီဖြစ်သော ခေတ်သစ်ပိုးလမ်းမ (BRI) စီမံကိန်းများအပါအဝင် တရုတ်ရင်းနှီးမြှုပ်နှံမှုလုပ်ငန်းများ အာမခံမှုရှိရန် အားလုံးပါဝင်သော ဆွေးနွေးပွဲတစ်ခုအား တရုတ်နိုင်ငံမှ ဖိအားပေးဆောင်ရွက်နေသောကြောင့် စစ်ခေါင်းဆောင်များ၏ တရုတ်ခရီးစဉ်များ ပေါ်ပေါက်လာသည်ဟု တိုင်းရင်းသားခေါင်းဆောင်တချို့နှင့် နိုင်ငံရေးအသိုင်းအဝန်းမှ သုံးသပ်ခဲ့ကြပါသည်။ 3
ဥရောပသမဂ္ဂ (EU) အပါအဝင် ကမ္ဘာ့နိုင်ငံပေါင်း ၃၇ နိုင်ငံမှ မြန်မာစစ်ကောင်စီတပ်အား အပြည်ပြည်ဆိုင်ရာ လူသားချင်း စာနာထောက်ထားမှုဆိုင်ရာ ဥပဒေနှင့် လူ့အခွင့်အရေး ဥပဒေများကို လေးစားလိုက်နာပြီး အရပ်သားပြည်သူများကို ကာကွယ်စောင့်ရှောက်ရန်နှင့် သက်ဆိုင်ရာအဖွဲ့များအားလုံး အကြမ်းဖက်မှုများ လျော့ချကြရန် ဇူလိုင် ၁၅ ရက်က တိုက်တွန်းတောင်းဆိုထားကြပါသည်။ 4
ကုလသမဂ္ဂဖွံ့ဖြိုးမှုအစီအစဉ် (UNDP) ၏ နောက်ဆုံးထွက်ရှိခဲ့သည့် “ဆင်းရဲမွဲတေမှုနှင့် မြန်မာအိမ်ထောင်စုစီးပွားရေး – ပျောက်ဆုံးနေသော လူလတ်တန်းစားတခု” အစီရင်ခံစာအရ မြန်မာနိုင်ငံ၏ လူဦးရေထက်ဝက်နီးပါးသည် ဆင်းရဲမွဲတေနေပြီး ကယားပြည်နယ်တွင် အဆိုးရွားဆုံးကြုံနေရကြောင်း ဖော်ပြခဲ့ပါသည်။ ၎င်းပမာဏသည် ၂၀၁၇ ခုနှစ်က လူဦးရေ ၂၄ ဒသမ ၈ ရာခိုင်နှုန်းနှင့် နှိုင်းယှဉ်မည်ဆိုပါက ၆ နှစ်အတွင်း နှစ်ဆအထိ တိုးလာခြင်းဖြစ်ကြောင်း ဖော်ပြထားပါသည်။ 5
1 မြန်မာ့နိုင်ငံရေးပါတီတွေနဲ့ ဆက်ဆံရေး တရုတ်တိုးမြှင့်
2 စစ်ခေါင်းဆောင် အာဏာစွန့်ရေး စည်းရုံးပေးဖို့ ဦးသိန်းစိန်ကို တရုတ်တိုက်တွန်း
3 ဒု-စစ်ခေါင်းဆောင်၏ တရုတ်နိုင်ငံခရီးစဉ် တော်လှန်ရေးအပေါ် သက်ရောက်မှုရှိနိုင်မလား
4 လူ့အခွင့်အရေး လေးစားလိုက်နာရန်နှင့် အကြမ်းဖက်မှုများ ရပ်တန့်ရန် စစ်ကောင်စီကို ၃၇ နိုင်ငံ တောင်းဆို
5 မြန်မာ့လူဦးရေထက်ဝက်နီးပါး ဆင်းရဲမွဲတေနေ၊ ကယားပြည်နယ်က အဆိုးရွားဆုံး ကြုံနေရ