မွန်ပြည်နယ်၊ ကျိုက်မရောဒေသအတွင်း နေရပ်ပြန်လာသည့် စစ်ဘေးရှောင်များသည် ၎င်းတို့၏နေအိမ်များ၌ အသုံးအဆောင်များပစ္စည်းနှင့် ပရိဘောဂများ ဖောက်ထွင်းခိုးယူခံထားရသည်ဟု စစ်ဘေးရှောင်ဒေသခံများက ၎င်းတို့၏ လူမှုကွန်ရက်စာမျက်နှာတွင် ဓါတ်ပုံနှင့်တကွ ဖော်ပြရေးသားထားကြသည်။
ဓမ္မသ၊ ကော့စွယ်၊ ကော့သပ်၊ တရနာ၊ သံကလောင်၊ ကျွန်းကုန်းပိုင်းရွာ အပါအဝင် ကော့ဘိန်း၊ ကော့ပေါက်၊ ကော့ပလိုင်ရွာတို့တွင် တန်ဖိုးကြီး ဆိုင်ကယ်အပြင်၊ မီးခံသေတ္တာ၊ နေအိမ်အသုံးအဆောင်ပစ္စည်းနှင့် ပရိဘောဂတို့ကို စစ်ကောင်စီတပ်သားတို့က ကားဖြင့်သယ်ဆောင်သွားသည်ဟု နေရပ်ပြန်လာသည့် ကျိုက်မရောဒေသခံတစ်ဦးက ပြောဆိုသည်။
“စတီးချိုင့်တွေ အိမ်သုံးပစ္စည်းတွေ မီးစက်တွေရော၊ မီးခံသေတ္တာဆိုလည်း ဖောက်ထား၊ အိမ်တံခါးကို သေနတ်နဲ့ ပစ်ပြီး ဖျက်ဆီးထားတာ၊ သူတို့ဇနီးပါ ခေါ်သွားပြီး သွားယူတယ်။ တစ်ရက်တစ်ရက် ကားဆယ်စီးစာ မကဘူး သယ်နေတာ။ ပိတ်ထားတဲ့အိမ်ကို ဖောက်ပြီး ဆိုင်ကယ်တွေ ယူထုတ်တယ်” ဟု အဆိုပါဒေသခံက ပြောသည်။
စစ်မျက်နှာပြင် ဖြစ်ခဲ့သည့် ဓမ္မသတ်နှင့် တရာနာ ရွာတို့တွင် နေအိမ်အများဆုံး ဖောက်ထွင်းခံထားရပြီး စစ်ကောင်စီတပ်သားတို့က ကားဖြင့်သယ်ယူသွားသည်ကို ဒေသခံတို့ကိုယ်တိုင် မြင်တွေ့ကြရသော်လည်း မပြောဆိုရဲကြကြောင်း ၎င်းက ဆက်ပြောသည်။
စစ်ကောင်စီတပ်သားတို့က ၎င်းတို့ယူဆောင်သွားသည့် တန်ဖိုးကြီးအသုံးအဆောင်ပစ္စည်းများနှင့် ဆိုင်ကယ်များကို မော်လမြိုင်မြို့ ရခိုင်ကုန်ဈေးနှင့် ဘားအံမြို့ ဇာသပြင်ဘက်တွင်လည်း ပြန်လည်ရောင်းချနေသည်ကို တွေ့ရှိရသည်ဟု စစ်ဘေးရှောင်အရေး ကူညီပေးသူတစ်ဦးက ပြောဆိုသည်။
“ရခိုင်ကုန်ဈေးဘက်မှာ စတီးချိုင့်တွေကို ပြန်ရောင်းနေတယ်။ ဇာသပြင်ဘက်တွေဆိုလည်း စစ်မိသားစုဝင်တွေဆီ ဈေးပေါပေါနဲ့ ရောင်းချနေတယ်။ ဒီကနေ ရလာတာ မနည်းမနောပဲလေ” ဟု ၎င်းက ဆိုသည်။
ပြီးခဲ့သည့် ရက်ပိုင်းကလည်း ကော့ပလိုင်ရွာတွင် စစ်ဘေးရှောင်ဒေသခံများက ကျေးရွာဘုန်းကြီးကျောင်းတွင် သိမ်းဆည်းထားသည့် ဆိုင်ကယ်များကို စစ်ကောင်စီတပ်သားတို့က ၁၃ စီးနီးပါး ကားဖြင့် သယ်ယူသွားကြောင်း ကော့ပလိုင်ရွာခံတို့က ပြောဆိုသည်။
လက်ရှိ၌ ဓမ္မသကျေးရွာ အနီးဝန်းကျင်ရှိ ကျေးရွာများသည် တည်ငြိမ်အေးချမ်းနေပြီ ဖြစ်သည့်အတွက် စစ်ရှောင် ပြည်သူများ နေရပ်ပြန်နိုင်ပြီဖြစ်ကြောင်း စစ်ကောင်စီလက်အောက်ခံ မြို့နယ်စီမံအုပ်ချုပ်ရေးအဖွဲ့တို့က ပြီးခဲ့သည့် ဧပြီလ ၂၈ ရက်နေ့တွင် ထုတ်ပြန်ကြေငြာခဲ့သည်။
သို့သော်လည်း ရွာနှင့် လမ်းကြိုလမ်းကြားနေရာတို့တွင် နေရာယူထားသည့် စစ်ကောင်စီတပ်များ ထွက်ခွာသွားခြင်း မရှိသေးသည့်အတွက် ဒေသခံအားလုံး နေရပ်မပြန်ရဲသေးကြောင်း ၎င်းတို့က ပြောဆိုကြသည်။
IMNA ပေးပို့သည်။
