ကချင်ပြည်နယ် နမ္မတီးမြို့ ကံလှရပ်ကွက် AG ဘုရားကျောင်းဝင်းတွင် ခိုလှုံနေသော Kasung (Hka Nan) စစ်ရှောင်များသည် စခန်းတွင်း မကြာခဏ ရေလွမ်းမိုးခြင်းဒဏ်ကို ဆက်လက် မခံနိုင်သောကြောင့် မြစ်ကြီးနားမြို့ ဘက်သို့ လွန်ခဲ့သောအပတ် ရွှေ့ပြောင်းခဲ့ရသည်။
စစ်ရှောင်မိသားစု (၂၈)စုမှ စုစုပေါင်းလူဦးရေ ၁၄၂ ဦး သည် သြဂုတ် (၂၂)မှစပြီး ပမ္မတီးရပ်ကွက် နယ်မြေ (၅) တွင် မိုးကာတဲများ ထိုးကာ ခက်ခဲစွာ နေထိုင်နေကြပါသည်။
တိုက်ပွဲများဖြစ်ပွား၍ စစ်ရှောင်ရသည်သာမက ရေလွှမ်းမိုးမှုကြောင့် ထပ်မံရွေ့ပြောင်းရသဖြင့် ယခုချိန် စားဝတ်နေရေး၊ ပညာရေးအပြင် အဖက်ဖက်မှ လိုအပ်ချက်များစွာဖြင့် ကြုံနေရကြောင်း ကို ရွှေ့ပြောင်းစစ်ရှောင်တာဝန်ခံ ဦးသောင်းဆွေ က ကချင်သတင်းဌာန KNG ကို ယခုလို ပြောသည်။
“ကျနော်တို့ နမ္မတီး ကံလှမှာ ရေလွှမ်းမိုးတာ ခံရတဲ့အတွက် လုံးလုံးနေလို့ မရတော့ဘူး။ (၆)လ ပိုင်းတုန်းကဆို ရေက ၃-၄ ပေ လူအိပ်တဲ့နေရာအထိ တက်လာတယ်။ အခု (၇)လ၊ (၈)လ ဆို ပိုပြီး နေလို့ မရတော့ဘူး။ နေတဲ့အဆောင်ကရေပြည့်။ နေစရာအခန်းကကျဉ်း။ ဒါကြောင့် ရွှေ့ပြောင်းခဲ့တာပါ။”
စစ်ရှောင်များသည် မိသားစုအလိုက် မည်သည့်အဆောက်အအုံမျှ မရှိသော ခြံလွတ်ထဲတွင် ယာယီ မိုးကာတဲများ ထိုးကာ ခက်ခဲစွာ နေထိုင်နေကြသည်ကို တွေ့ရပါသည်။
ထို့အပြင် မည်သည့် အကူညီမျှ မရရှိသေးသောကြောင့် စားဝတ်နေရေးအတွက် လည်း အရေးတကြီး လိုအပ်နေပါသည်။
ယခုလိုဖြစ်ပျက်နေသော အခက်အခဲပြဿနာများကို အမြန်ဆုံးအဆင်ပြေလာနိုင်ရန် သက်ဆိုင်ရာ အစိုးရ နှင့် အဖွဲ့အစည်းများမှ တာဝန်ယူဆောင်ရွက်ပေးရန် ဒုက္ခသည်များ တောင်းဆိုနေကြပါသည်။
လွန်ခဲ့သော ဧပြီလ (၂၁)ရက်နေ့ Kasung (ကဆုန့်) ကျေးရွာတွင် အစိုးရတပ်နှင့် ကချင် လွတ်လပ်ရေး တပ်မတော် KIA တို့ တိုက်ပွဲများပြင်းထန်စွာဖြစ်လာသောကြောင့် စစ်ရှောင်ရွာသားများ နီးစပ်ရာ ကံလှ AG (Assembly of God) ဘုရားကျောင်းတွင် (၄)လခန့် တိမ်းရှောင်ခဲ့ပြီးနောက် ရေလွမ်းမိုးမှုဒဏ် ခံရသဖြင့် ယခု ထပ်မံ ရွှေ့ပြောင်းရခြင်း ဖြစ်ပါသည်။
ယခု စစ်ရှောင်များတွင် အများစုမှာ လီဆူ နှင့် ရဝမ် ကချင်မျိုးနွယ်စုများ ဖြစ်ကြသည်။