မတ် ၃ရက် ၂၀၂၀
ကချင်ပြည်နယ်အတွင်း နေရပ်ပြန်စစ်ရှောင်များအတွက် မိုင်းရှင်းလင်းရေးလုပ်ဆောင်ရန်မှာ NCA လက်မှတ်ရေးထိုးပြီးမှသာ နှစ်ဖက်ညှိနှိုင်းလုပ်ဆောင်ရမည်ဟု ကချင်ပြည်နယ် နယ်လုံဝန်ကြီး ပြောဆိုခဲ့သည်။
နေရပြန်စစ်ရှောင်များအတွက် မိုင်းရှင်းရေးလုပ်ဆောင်ပေးရန် အစီစဉ်ရှိမရှိ (၁၈) ကြိမ်မြောက် ကချင်ပြည်နယ်လွှတ်တော်၏ ပဉ္စမနေ့ပုံမှန် အစည်းအဝေး (ဖေဖော်ဝါရီ ၂၈ရက်နေ့)တွင် ရွှေကူမြို့နယ် မဲဆန္ဒနယ်(၁) မှ ပြည်နယ်လွှတ်တော် ကိုယ်စားလှယ် ဦးတင်ယု မေးမြန်းခဲ့ရာ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးနေလင်းထွန်းမှ ယခုလို ပြန်လည်ဖြေကြားခဲ့သည်။
“ မိုင်းရှင်းလင်းတဲ့ခါ မြေပြင်အခြေနေမှာ မိုင်းထောင်ထားတဲ့အနေထားကို နှစ်ဖက်က ည့ှိနှိုင်းပြီးမှ ဆောင်ရွက်လို့ရမယ်။ ဘယ်နေရာမှာမိုင်းထောင်ထားတယ်။ထောင်ထားတဲ့ တပ်မတော်အနေနဲ့ကတော့ မိုင်းထောင်ခြင်းနဲ့ပတ်သက်ပြီးတော့မှ စွန့်လွှတ်မိုင်းထောင်ခဲ့တာမျိုးမရှိပါဘူး။ တပ်မတော်အနေနဲ့ထောင်ခဲ့တာတော့ အားလုံးမှတ်ပုံတင်မိုင်းတွေသာ ထောင်တာဖြစ်တယ်။ ထောင်ထားတဲ့မိုင်းတွေကလည်း စစ်ဆင်ရေးနယ်မြေအရ ပြည်သူလူထု သွားလာနိုင်တဲ့ နယ်မြေမှာ ထောင်ထားခဲ့တာမျိုး မရှိပါဘူး။ လက်ရှိကျနော်ဆွေးနွေးခဲ့တဲ့ မိုင်းတွေကတော့ KIA လက်နက်ကိုင်အဖွဲ့ လူပ်ရှားနေတဲ့နယ်မြေမှာ NCA ထိုးပြီးတော့မှ သူတို့ဘယ်နေရာမှာထောင်ထားလဲ ထောင်ထားသော် နှစ်ဘက်အဖွဲ့အစည်းကနေ ညိ့ှနှိုင်းပြီးတော့မှ တစ်ဆင့်ခြင်းဆောင်ရွက်ရမယ့် အနေအထားမျိုးဖြစ်နေတယ်” ဟုလုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးနေလင်းထွန်း ပြန်လည်ဖြေကြားခဲ့သည်။
ပထမဆုံးနေရပ်ပြန်ဖြစ်သော နမ်ဆန်ယန်ဒေသခံတစ်ဦးသည် ဖေဖော်ဝါရီလ ၁၄ ရက်နေ့ ကျေးရွာနှင့် မိုင်အနည်းငယ်ခန့်အကွာ ငါးဖမ်းရန်သွားစဉ် မိုင်းနင်းမိသဖြင့် ခြေထောက်ဖြတ်လိုက်ရသည်ဟု သိရသည်။
ထို့ကြောင့် စစ်ရှောင်များ မိမိနေရပ်သို့ပြန်လည်နေထိုင်ရာတွင် စစ်ကြွင်း စစ်ကျန်များ၊ မြေမြုပ်မိုင်းအန္တရယ်များ အလွန်စိုးရိမ်နေရသဖြင့် သက်ဆိုင်ရာဌာနမှ တာဝန်ယူဖြေရှင်းပေးရန် အစီစဉ် ရှိမရှိမေးမြန်းခဲ့့ခြင်း ဖြစ်သည်။
သို့သော်လည်း မြေပြင်တွင် မိုင်းတွေ့ရှိလျှင်သော်လည်းကောင်း၊ မို်င်းထောင်ထားသည်ဟု သံသယရှိလျှင်သော်လည်းကောင်း၊ သက်ဆိုင်ရာအာဏာပိုင် အဖွဲ့စည်းများထံသို့ တင်ပြပြီးနောက် မြောက်ပိုင်းတိုင်းစစ်ဌာနချုပ်မှပေါင်းစပ် ညှိနှိုင်းကာ ရှင်းလင်းပေးမည်ဟုသာ ဝန်ကြီးမှ ဖြေဆိုခဲ့သည်။
၂၀၁၉ ခုနှစ်တွင် မိုင်းကွဲဖြစ်စဉ် ၁၈ ကြိမ်ဖြစ်ပွားခဲ့ပြီး သေဆုံးသူ ၈ဦး၊ ဒဏ်ရာရရှိသူ ၂၁ ဦးရှိခဲ့ကြောင်း လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးနေလင်းထွန်း ဖြေကြားချက်မှ သိရသည်။
၂၀၁၁ ခုနှစ် ကချင်ဒေသတစ်ကျော့ပြန်ဖြစ်ပွားလာသော တိုက်ပွဲကြောင့် လက်ရှိ ကချင်ပြည်နယ်အတွင်း စစ်ရှောင် ၁ သိန်းကျော်ရှိနေဆဲဖြစ်သည်။
စစ်ပြေးဒုက္ခသည်ကာလ (၈) နှစ်ပြည့်လာချိန် ၂၀၁၉ ခုနှစ် ဇန်နဝါရီလတွင် ဝိုင်းမော်မြို့နယ် နမ်ဆန်ယန်ဒေသခများကို အစိုးရနှင့်တပ်မတော်မှ နေရပ်ပြန်ပို့ခဲ့သည်။
လက်ရှိတွင် တစ်နိုင်ငံလုံးအပစ်ခတ်ရပ်စဲရေး သဘောတူညီမူစာချုပ်ရေးထိုးထားသည့် တိုင်းရင်းသားလက်နက်ကို်င်အဖွဲ့ ၁၀ဖွဲ့ရှိကာ KIA လက်နက်ကိုင်အဖွဲ့အနေဖြင့် ယခင်သမ္မတဟောင်း ဦးသိန်းစိန်လက်ထက်မှ ယနေ့ချိန်ထိ ညှိနိူူင်းနေဆဲဖြစ်သည်။
ကေအန်ဂျီ – ပေးပို့သည်။