ချင်းပြည်နယ်အစိုးရအဖွဲ့မှ ဝန်ကြီးဦးစိုးထက် စီးနင်းလိုက်ပါလာသည့် စက်လှေအား စက်တင်ဘာလ ၉ ရက် မွန်းလွဲ ၁ နာရီခန့်တွင် အေအေအဖွဲ့က လက်နက်များဖြင့် အနည်းဆုံး ၁၁ ချက်ခန့်ပစ်ခတ်ခဲ့ကြောင်း ခူမီချင်းမျိုးနွယ်စုများရေးရာ ပေါင်းစပ်ညှိနှိုင်းရေးကောင်စီ(KACC)က သတင်းထုတ်ပြန်ထားသည်။
ဦးစိုးထက်မှာ ရွေးကောက်ပွဲမဲဆွယ်ကာလအတွက် ပလက်ဝမြို့တွင်ရောက်ရှိနေခြင်းဖြစ်ပြီး စက်လှေသည် ကုလားတန်မြစ်အနောက်ဘက်ကမ်းရှိ ပလက်ဝမြို့ဆိပ်ကမ်းမှထွက်ခွာပြီး မြစ်အရှေ့ဘက်ကမ်းသို့ကူးလာစဉ် ပစ်ခတ်ခံရခြင်းဖြစ်ကာ ပစ်ခတ်မှုကြောင့် လူအထိအခိုက်မရှိခဲ့ကြောင်း ယင်းထုတ်ပြန်ချက်မှသိရသည်။
စည်ပင်သာယာရေး၊ လျှပ်စစ်နှင့်စက်မှုလက်မှုဝန်ကြီးဦးစိုးထက်က “ဒီနေ့နေလည်ပိုင်းက ကျွန်တော်အပါအဝင် ပြည်နယ်အဆင့်အကြီးကဲတွေက ပလက်ဝ မြို့နယ်မှာရှိတဲ့ ကျေးရွာတွေကို စက်လှေနဲ့သွားတော့ လမ်းမှာ အပစ်ခံရတာ။ စက်လှေမှာပါတာကတော့ လူ(၁၀) ကျော်ပါတယ်။ ဒဏ်ရာရတာတော့မရှိဘူး။ ပစ်တာကတော့ AA 80ဖွဲ့က ပစ်တာပါ။ အခုတော့ ပလက်ဝကို ရောက်ပါပြီ” ဟု DMG သို့ ပြောသည်။
စက်တင်ဘာ ၉ရက် နေ့လည် ၁ နာရီကျော်တွင် ပလက်ဝဒေသအတွင်း တပ်မတော်နှင့် ရက္ခိုင့်တပ်တော် AA တို့ နာရီခွဲ အကြာ တိုက်ပွဲဖြစ်ပွားမူများရှိခဲ့ကြောင်း ဝန်ကြီးဦးစိုးထက်က ဆက်ပြောသည်။
ရက္ခိုင့်တပ်တော်(AA)အား ဆက်သွယ်မေးမြန်းမှုကို ဥပဒေအရတားမြစ်ထားသဖြင့် ယခုဖြစ်စဉ်နှင့်ပတ်သက်ပြီး AA ၏ တုန့်ပြန်ချက်ကို မရရှိနိုင်ပေ။
လာမည့် နိုဝင်ဘာလ (၈)ရက်နေ့တွင်ကျင်းပပြုလုပ်မည့် ရွေးကောက်ပွဲအတွက် မဲဆွယ်စည်းရုံးမည့် ပလက်ဝ မြို့နယ်မှ လွှတ်တော်ကိုယ်စားလှယ်လောင်းများ၏ လုံခြုံရေးအပါအဝင် ပလက်ဝမြို့နယ်အတွင်း ရွေးကောက်ပွဲ အောင်မြင်စွာကျင်းပပြုလုပ်နိုင်ေရးအတွက် များစွာစိုးရိမ်မကင်းဖြစ်ရကြောင်း KACC မှ ထုတ်ပြန်ထားသည်။
ခိုင်ရိုးလ (DMG) – ပေးပို့သည်။