အမှတ် (၅၃၉) ခြေမြန်တပ်ရင်း တစ်နေရာအား ကားလမ်းပေါ်မှ မြင်တွေ့ရပုံ။
၆ ဇူလိုင် ၂၀၂၀
တပ်မတော်က ဖမ်းဆီးသွားသည့် ကျောက်တော် ဒေသခံ (၅) ဦးထဲမှ သုံးဦးအား ပြန်လွှတ်ပေးမည်ဟု တပ်မတော်သတင်းမှန်ပြန်ကြားရေးအဖွဲ့မှ ထုတ်ပြန်ထားသော်လည်း ယနေ့ (ဇူလိုင်လ ၃ ရက်) နေ့ နံနက်ပိုင်းအထိ ပြန်လွှတ်လာခြင်းမရှိသေးသည့်အတွက်ကြောင်း မိသားစုဝင်များမှာ စိုးရိမ်နေကြသည်။
ကျောက်တော်မြို့နယ်၊ အပေါက်ဝကျေးရွာမှ ဦးအောင်နိုင်စိုး၊ ဦးဆန်းဝင်းနိုင်နှင့် ဦးမြင့်ဇော်တို့ကို ပြန်လွှတ် ပေးမည်ဟု ဇွန်လ ၂၉ ရက်နေ့တွင် တပ်မတော်က ထုတ်ပြန်ခဲ့သည်။
သို့သော် ၎င်းတို့မှာ ၅ရက်နေ့အထိ ရောက်လာသော်လည်း မည့်သည့်နေရာတွင်ရှိကြောင်း သတင်းအစအန တစ်စုံတရာမရရှိသေးသဖြင့် စိုးရိမ်နေကြခြင်းဖြစ်သည်။
ဖမ်းဆီးခံထားရသူ ဦးအောင်နိုင်စိုး၏ ညီဖြစ်သူ ကိုမင်းမင်းထွန်းက “ပြန်လွတ်လာမယ့်နေ့ကို စောင့်နေတာ၊ အခုအချိန်ထိ ပြန်မရောက်လာသေးတော့ ဘာများဖြစ်နေလို့လဲ ဆိုပြီးတော့ စိုးရိမ်မိတယ်။ သူတို့(တပ်မတော်)လွှတ်ပေးဖို့ေြပာထားတဲ့ ကျနော့် အကိုအပါအဝင် တခြား (၂) ယောက်ကိုပါ အမြန်ဆုံးပြန်လွှတ်ပေးဖို့ တောင်းဆိုချင်ပါတယ်” ဟု ေျပာသည်။
အပေါက်ဝဒေသခံ(၅)ဦးသည် ဇွန်လ ၂၇ ရက်နေ့က မိမိတို့ကျေးရွာမှ ပုဏ္ဏားကျွန်းမြို့သို့ မိသားစုနာရေး ကိစ္စကြောင့် ကားဖြင့်သွားစဉ် ကန်စောက်တောင် အနီးရှိ အမှတ်(၅၃၉) တပ်ရင်း၌ ဖမ်းဆီးခံခဲ့ရခြင်းဖြစ်ကြောင်း မိသားစုဝင်များထံမှ သိရသည်။
ယင်းနောက် ဖမ်းဆီးခံရသူများထဲမှ ဦးဘိုကျော်သန်းအား ၎င်း၏လက်ကိုင်ဖုန်းထဲ၌ ဖောက်ခွဲရေးမိုင်းပြုလုပ် သည့်ဓာတ်ပုံများ၊ ကိုယ်တိုင်ကိုင်ဆောင်ထားသည့် ဓာတ်ပုံများ၊ အပေါက်ဝကျေးရွာအနီး၌ ထောင်ထားသည့် မိုင်းနေရာပြ GPS မြေပုံညွှန်း Screenshot ဓာတ်ပုံများ၊ အသက်(၃၅)နှစ်အရွယ်လူတစ်ဦးအား လက်ထိပ်ခတ် ဖမ်းဆီးထားသည့်ပုံများတွေ့ရှိခဲ့၍ အကြမ်းဖက်မှုဥပဒေဖြင့် တရားစွဲဆိုသွားမည်ဖြစ်ကြောင်း တပ်မတော်မှ ထုတ်ပြန်ထားသည်။
ထို့ပြင် ယာဉ်မောင်းဖြစ်သူ ဦးထွန်းအေးမောင်အားလည်း လိုင်စင်မဲ့ယာဉ်လက်ဝယ်ထားရှိမှု၊ လိုင်စင်အတု ပြုလုပ်မှု ပို့ကုန်သွင်းကုန်အက်ဥပဒေအရလည်းကောင်း အမှုဖွင့်အရေးယူသွားမည်ဟုလည်း ထုတ်ပြန် ထားသည်။
အဆိုပါဒေသခံ (၃) ဦး အား တပ်မတော်မှ ပြန်လွှတ်ပေးခြင်းမရှိသေးသည့် ကိစ္စနှင့်ပတ်သက်၍ တပ်မတော် သတင်းမှန်ပြန်ကြားရေးအဖွဲ့မှ ဗိုလ်မှူးချုပ်ဇော်မင်းထွန်းနှင့် ဗိုလ်ချုပ်ထွန်းထွန်းညီ တို့အားDMGက ဆက်သွယ်ခဲ့ရာ ဖုန်းလက်ခံဖြေကြားခြင်းမရှိခဲ့ပေ။
DMG – ပေးပို့သည်။