၂၈ မတ် ၂၀၂၀
ရခိုင်ပြည်နယ်၊ မင်းပြားမြို့နယ်၊ စိတ္တရကျေးရွာအနီးတွင် မတ်လ (၂၆) ရက်နေ့၊ နံနက်ပိုင်းက တပ်မတော်နှင့် ရက္ခိုင့်တပ်တော် (AA)တို့ တိုက်ပွဲဖြစ်ပွားမှုကြောင့် အနီးအနားရှိ ကျေးရွာ(၅)ရွာမှ ဒေသခံများ ထွက်ပြေးတိမ်းရှောင်နေရသည်ဟု ဒေသခံများထံက သိရသည်။
မနေ့ နံနက် (၈)နာရီခွဲခန့်က မင်းပြားမြို့နယ်ရှိ စိတ္တရကျေးရွာ၊ တောင်ပုတ်ကေကျေးရွာ၊ လက်ခုပ်ကျေးရွာ၊ မြင်းတင်မကျေးရွာနှင့် ဖုန်သာချောင်းကျေးရွာအနီးတွင် တိုက်ပွဲဖြစ်ပွားခဲ့သောကြောင့် ဒေသခံများမှာ ကြောက်လန့်၍ ထွက်ပြေးကြခြင်းဖြစ်သည်ဟု စိတ္တရကျေးရွာမှ အမည်မဖော်လိုသည့် ဒေသခံတစ်ဦးက ပြောသည်။
“ကျနော်တို့တွေအနေနဲ့ စိုးရိမ်ရတာကတော့ အခုဆိုရင် အနယ်နယ်အရပ်ရပ်မှာရော၊ သတင်းတွေ မှာရောကြားနေရတယ်။ တိုက်ပွဲက တောထဲမှာဖြစ်တယ်။ ရွာထဲဝင်ပြီးတော့ နေအိမ်တွေကို မီးတိုက်တယ်။ နောက်ပြီးတော့ ရွာထဲကလူတွေကို ခေါ်ပြီးတော့စုထားတယ်။ ပြီးတော့ နှိပ်စက်တယ်။ အိမ်တွေကိုဝင်ပြီးတော့ ပစ္စည်းတွေကို ယူသွားတာတွေရှိတယ်။ အဲဒီလိုမျိုးတွေ လုပ်လာမှာကို စိုးရိမ်နေရတယ်” ဟု ဒေသခံတစ်ဦးက ပြောသည်။
သူတို့မှာ မင်းပြားမြို့နယ် ဒုံးသားကျေးရွာနှင့် အသေကန်ကျေးရွာများသို့ ထွက်ပြေးတိမ်းရှောင်နေကြခြင်း ဖြစ်သည်။
မင်းပြားမြို့ုနယ်မှ ပြည်နယ်လွှတ်တော်ကိုယ်စားလှယ် ဦးလှအောင်ညွှန့်က “မနက်က ပစ်ခတ်သံတွေကြားတယ်။ နောက်တော့ တောင်ပုတ်ကေကျေးရွာ အနီးအနားမှာ တိုက်ပွဲဖြစ်တယ်လို့ ပြောတယ်” ဟု ဆိုသည်။
ရခိုင်ပြည်နယ်မြောက်ပိုင်းတွင် တပ်မတော်နှင့် ရက္ခိုင့်တပ်တော်(AA)တို့ တိုက်ပွဲကြောင့် ဒေသခံများမှာ နီးစပ်ရာ စစ်ဘေးရှောင်စခန်းများတွင် ခိုလှုံနေကြပြီး လူဦးရေ တစ်သိန်းနှစ်သောင်းကျော်အထိ ရှိလာပြီး ၎င်းတို့မှာ စားဝတ်နေရေး အခက်အခဲ ဖြစ်ပေါ်နေကြသည်။
ခိုင်ရိုးလ(DMG) – ရေးသည်။