စစ်အုပ်ချုပ်ရေး ကြေညာထားတဲ့ တနင်္သာရီတိုင်းဒေသကြီး၊ ပုလောမြို့နယ်၊ ဝက်တိုးကျေးရွာထဲကို တိုက်ပွဲမရှိဘဲ စစ်ကောင်စီတပ် လက်နက်ကြီး ပစ်ခတ်မှုကြောင့် ကလေးငယ် ၃ ဦးအပါအဝင် ၇ ဦး ဒဏ်ရာရရှိခဲ့တယ်လို့ ဒေသခံတွေက သံလွင်တိုင်းမ်ကို ပြောပါတယ်။
ပုလောကုန်းမှာ တပ်စွဲထားတဲ့ စစ်ကောင်စီတပ်ဟာ ပြီးခဲ့တဲ့ ဧပြီ ၅ ရက်နေ့ မနက် ၉ နာရီခွဲအချိန်လောက်မှာ ဝက်တိုးကျေးရွာထဲကို လက်နက်ကြီး ၄ ထက်မနည်း ပစ်ခတ်ခဲ့တာပါ။
စစ်ကောင်စီတပ်က ပစ်ခတ်လိုက်တဲ့ လက်နက်ကြီးကျည်ဟာ ဝက်တိုးကျေးရွာ စာသင်ကျောင်းအနီးရှိ နေအိမ်တွေအပေါ် ကျရောက်ပေါက်ကွဲခဲ့တာ ဖြစ်ပါတယ်။
စစ်ကောင်စီတပ် လက်နက်ကြီးကျည်ကြောင့် အသက် ၂ နှစ်အရွယ် မောင်ကောင်းပြည့်ဝ၊ အသက် ၄ နှစ်အရွယ် မဝိုင်းပုံချစ်၊ အသက် ၈ နှစ်အရွယ် မောင်တိုးတက်အောင်နဲ့ မိသားစုဝင် ၇ ဦးစလုံး ကျည်ထိမှန် ဒဏ်ရာရရှိခဲ့ပါတယ်။
ကျည်ထိမှန်ဒဏ်ရာရရှိခဲ့တဲ့ ဒေသခံတွေကို နီးစပ်ရာ ဆေးရုံသို့ ပို့ဆောင်ထားပြီး အဲဒီထဲက ကလေးငယ်တစ်ဦးနဲ့ အမျိုးသမီးတစ်ဦးဟာ အသက်အန္တရာယ်စိုးရိမ်ရတဲ့ အခြေအနေမှာ ရှိနေတယ်လို့ ဒေသခံတစ်ဦးက ပြောပါတယ်။
ကျေးရွာထဲ လက်နက်ကြီးပစ်ခတ်နေတဲ့ စစ်ကောင်စီတပ်ဟာ ဒီနေ့ ဧပြီ ၆ ရက်နေ့ မနက်ပိုင်းကလည်း ဝက်တိုးကျေးရွာထဲ လက်နက်ကြီး ပစ်ခတ်တာတွေ ထပ်မံလုပ်ဆောင်ခဲ့တဲ့အတွက် ဒေသခံတချို့ ထွက်ပြေးတိမ်းရှောင် တာတွေ ရှိနေတယ်လို့ သိရပါတယ်။
ပုလောမြို့နယ်မှာ စစ်အုပ်ချုပ်ရေးကြေညာပြီးနောက် စစ်ကောင်စီတပ်နဲ့ တော်လှန်ရေးအင်အားစုတို့ကြား တိုက်ပွဲတွေ ခပ်စိတ်စိတ်ဖြစ်လာသလို စစ်ကောင်စီဘက်က လက်နက်ကြီးပစ်လို့ အရပ်သားထိခိုက်သေ ဆုံးတာတွေလည်း ရှိနေပါတယ်။
သံလွင်တိုင်းမ် – ပေးပို့သည်။