ရခိုင်ပြည်၊ စစ်တွေမြို့တွင် GRADE-9 စွမ်းရည်မြှင့်သင်တန်းလာတက်သည့် ပညာရေးဝန်ထမ်း ၁,၀၀၀ ကျော်မှာ စစ်ကောင်စီက ခရီးသွားလာခွင့်ပိတ်လိုက်တာကြောင့် နေရပ်ပြန်ရန် အခက်ကြုံတွေ့နေကြသည်။
နိုဝင်ဘာ ၁၀ မှ ၁၂ ရက်ထိ ၃ ရက်တာသင်တန်း ပြီးဆုံးပြီး နောက်တစ်နေ့တွင် တိုက်ပွဲများစဖြစ်လာ၍ မြို့အဝင်အထွက်များနှင့် ကုန်လမ်း၊ ရေလမ်းခရီးသွားလာမှုများကို စစ်ကောင်စီက ပိတ်ဆို့လိုက်ခြင်း ဖြစ်သည်။
“သင်တန်းက ညနေ ၃ နာရီလောက်မှ ပြီးတာဆိုတော့ ခရီးဝေးက ဆရာ၊ ဆရာမတွေ မပြန်ဖြစ်ကြဘူး။ အနီးအနားကလူတွေနဲ့ အရေးကြီးကိစ္စရှိသူတွေလောက်ပဲ ပြန်သွားကြတာ။ အခုလို လမ်းပိတ်လိုက်တော့ ကျန်တဲ့သူတွေပြန်လို့မရတော့ဘူး” ဟု မြောက်ဦးမြို့နယ်မှ အလယ်တန်းပြဆရာတစ်ဦးက ပြောသည်။
စစ်တွေမြို့တွင် ပိတ်မိနေကြသည့် ဆရာ၊ ဆရာမ စုစုပေါင်း ၁,၀၀၀ ကျော်မှာ မြောက်ဦးမြို့နယ်မှ ၃၀၀ ကျော်၊ ကျောက်တော်မြို့နယ်မှ ၂၀၀ ကျော်၊ ရသေ့တောင်မြို့နယ်မှ ၂၀၀ ကျော်၊ မောင်တောမြို့နယ်မှ ၃၅၀ ကျော်နှင့် ဘူးသီးတောင်မြို့နယ်မှ ၁၀၀ ကျော်အပြင် အခြားမြို့နယ်များမှလည်း ပါဝင်ကြောင်း သိရသည်။
မောင်တောမြို့မှ အလယ်တန်းပြဆရာမဒေါ်နှင်းနွယ်က “ ကျမတို့က ရက်တိုသင်တန်းလာတာဆိုတော့ ပိုက်ဆံလည်း အများကြီးမပါဘူး။ မနေ့ကစလို့ ထမင်းစားစရိတ်တွေလည်း ဈေးတက်သွားတယ်။ ထမင်းတနပ် စားဖို့ ၆၀၀၀ လောက် ကုန်တယ်။ အခုက ဘယ်နေ့ဘယ်အချိန်ထိနေရမှာလည်း မသိဘူး” ဟု ပြောသည်။
စစ်ကောင်စီက လမ်းခရီးသွားလာခွင့် မပိတ်ဆို့မီ နိုဝင်ဘာလ ၁၃ ရက်နေ့ နံနက်ပိုင်းက စစ်တွေမြို့မှ ထွက်ခွာခဲ့ကြသော မြေပုံ၊ မင်းပြားမြို့နယ်မှ ဆရာ၊ ဆရာမ ၆၀ ကျော်မှာလည်း ဆက်သွား၍မရသဖြင့် မြောက်ဦးမြို့ပေါ်ရှိ ရတနာ့မာန်အောင်ဓမ္မာရိပ်သာ၌ ယာယီခိုလှုံနေရကြောင်း သိရသည်။
“ကျနော်တို့က မနက်အစောကြီးကားနဲ့ လိုက်လာကြတာ မြောက်ဦးမှာပိတ်မိသွားပါတယ်။ မြို့အထွက်ဂိတ်က လုံးဝသွားလို့မရတော့ ဒီနေ့လည်း မပြန်ရသေးဘူး” ဟု ပိတ်မိနေသူထဲတွင်ပါဝင်သည့် မြေပုံမြို့နယ်မှ အလယ်တန်းပြဆရာတစ်ဦးက ပြောသည်။
ယခုကိစ္စနှင့် ပတ်သက်၍ ရခိုင်ပြည်နယ်ပညာရေးမှူး ဦးဘထွီးစိန်းထံ ဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
“ပညာရေးဌာနအနေနဲ့ ဝန်ထမ်းတွေ သွားလာလို့ရအောင် ထောက်ခံချက်နဲ့ဖြစ်စေ၊ တနည်းနည်းနဲ့ သွားလို့ရမယ့် လမ်းကြောင်းကို စီစဉ်ပေးစေချင်ပါတယ်။ ကျမတို့ ကိုယ့်အစီအစဉ်နဲ့ ပြန်သွားရင်လည်း လမ်းမှာတစ်ခုခု ဖြစ်သွားရင် ကိုယ်ပဲခံရမှာ” ဟု မောင်တောမြို့နယ်မှ ဆရာမတစ်ဦးက ပြောသည်။
ရခိုင်တွင် စစ်ကောင်စီတပ်နှင့် ရက္ခိုင့်တပ်တော် (AA) တို့ ကြား ၂၀၂၂ ခုနှစ် နိုဝင်ဘာလ ၂၆ ရက်နေ့တွင် နှစ်ဖက်နားလည်မှုဖြင့် အပစ်ရပ်စဲခဲ့ကြပြီး ယခုနှစ် နိုဝင်ဘာ ၁၃ ရက်တွင် တိုက်ပွဲပြန်လည်ဖြစ်ပွားနေသည်။
အောင်ထိန် (DMG) ပေးပို့သည်။