တအာင်းအမျိုးသားလွတ်မြောက်ရေးတပ်ဦး

0
1619

တအာင်းအမျိုးသားလွတ်မြောက်ရေးတပ်ဦး (PSLF/TNLA)

စတင်ဖွဲ့စည်းသည့် နေ့စွဲ – ၁၉၆၃ ၊ ၁၉၇၆ ၊ ဇန်နဝါရီ ၁၉၉၂ ၊ ဇန်နဝါရီ ၂၀ဝ၉

ရုံးချုပ် – ရွေ့လျား

လှုပ်ရှားရာ နယ်မြေ – ရှမ်းပြည်နယ်မြောက်ပိုင်း နောင်ချို၊ ကျောက်မဲ၊ သီပေါ၊ ကွတ်ခိုင်၊ နမ္မတူ၊ မန်တုံ၊ နမ့်စန်၊ နမ့်ခမ်း၊ မူဆယ်၊ မိုးမိတ်နှင့် မန္တလေးတိုင်း မိုးကုတ်

အင်အား – ၆၀ဝ၀ အထက်

ဥက္ကဋ္ဌ – တာအိုက်ဘုန်း

ဒု-ဥက္ကဋ္ဌ – တာဂျော့ကြာ

အထွေထွေအတွင်းရေးမှူး – ဗိုလ်မှူးချုပ်တာဘုန်းကျော်

၁၉၆၃ ခုနှစ်တွင် ပလောင်အမျိုးသားတပ်ဖွဲ့ ၊ ၁၉၇၆ ခုနှစ်တွင် ပလောင်ပြည်နယ်လွတ်မြောက် ရေးတပ်ဖွဲ့(PSLA)၊ ၁၉၉၂ ခုနှစ် ဇန်နဝါရီလတွင် ပလောင်ပြည်နယ်လွတ်မြောက်ရေးတပ်ဦး(PSLF) စသဖြင့် ဖြစ်တည်လာခဲ့သည့် PSLF သည် ၂၀ဝ၉ခုနှစ် ဇန်နဝါရီလတွင်တော့ တအာင်းပလောင် ဒေသကို လက်တွေ့ကာကွယ်နိုင်ရန်အတွက်ဟုဆိုကာ တအာင်းအမျိုးသားလွတ်မြောက်ရေးတပ်မတော် (TNLA) ကို ဖွဲ့စည်းခဲ့သည်။ ၁၉၉၁ ခုနှစ်၊ ဧပြီလတွင် တပ်မတော်အစိုးရနှင့် PSLA အကြား အပစ်ရပ်လက်မှတ်ရေးထိုးခဲ့ပြီးနောက် PSLA အဖွဲ့တွင်း သဘောထားကွဲလွဲမှုများက PSLF ကို ဖြစ် ပေါ်စေခဲ့ပြီး ယခုအခါ PSLF/TNLA အနေဖြင့် ဒီမိုကရေစီ၊ လူ့အခွင့်အရေးနှင့် ကိုယ်ပိုင်ပြဋ္ဌာန်းခွင့်ကို အာမခံသည့် ဖက်ဒရယ်ပြည်ထောင်စုတည်ဆောက်နိုင်ရေးဟူသော နိုင်ငံရေးဦးတည်ချက်များ ချမှတ်ဆောင်ရွက်လျက်ရှိပါသည်။

KIO/KIA ပါဝင်သည့် မြောက်ပိုင်းမဟာမိတ် လေးဖွဲ့၊ MNDAA – ULA/AA ပါဝင်သည့် ညီနောင် မဟာမိတ် သုံးဖွဲ့နှင့်အတူ စစ်ရေး၊ နိုင်ငံရေးအရ ပူးပေါင်းဆောင်ရွက်မှုများရှိနေပြီး UWSA ဦးဆောင် သည့် FPNCC တွင်လည်း အဖွဲ့ဝင်အနေဖြင့် ပူးပေါင်းပါဝင်လျက် ရှိနေပါသည်။ အပစ် အခတ်ရပ်စဲရေးအတွက် အစိုးရအဖွဲ့ ကိုယ်စားလှယ်များနှင့် တွေ့ဆုံဆွေးနွေးမှုများ ရှိနေသော်လည်း တပ်မတော်နှင့် တိုက်ပွဲများ ပြင်းထန်စွာ ဖြစ်ပွားနေဆဲ ဖြစ်ပါသည်။ ထို့ပြင် ရှမ်းပြည်နယ် မြောက် ပိုင်းဒေသများအတွင်း ရှမ်းပြည်ပြန်လည်ထူထောင်ရေးကောင်စီ (RCSS/SSA) နှင့်လည်း ထိတွေ့ တိုက်ပွဲဖြစ်ပွားမှုများ ရှိနေပါသည်။

၂၀၁၉-၂၀၂၀ ခုနှစ်များအတွင်း ညီနောင်မဟာမိတ် သုံးဖွဲ့ပူးပေါင်းကာ TNLA အနေဖြင့် တစ်ဖက်သတ် အပစ်ခတ်ရပ်စဲကြောင်း ခုနစ်ကြိမ်တိုင်တိုင် ကြေညာခဲ့သော်တည်း တပ်မတော်၏ ထိုးစစ်ဆင်မှုများကြောင့် တိုက်ပွဲအချို့ ဆက်လက်ဖြစ်ပွားနေဆဲ ဖြစ်ပါသည်။ ၂၀၂၀ ပြည့်နှစ် အထွေထွေ ရွေးကောက်ပွဲရလဒ်များကို အသိအမှတ်ပြုကာ ရွေးကောက်ပွဲအလွန် နိုင်ငံရေးအခင်းအကျင်းတွင် ပြည်တွင်းစစ်ချုပ်ငြိမ်းရေးအတွက် အချက် လေးချက် ပါဝင်သည့် ကြေညာချက်ကို ၂၀၂၀ ပြည့်နှစ် နိုဝင်ဘာ ၁၁ ရက်တွင် ထုတ်ပြန်ခဲ့သည်။ အဆိုပါ အချက် လေးချက်တွင် တိုင်းရင်းသားဒေသများ၊ အထူးသဖြင့် ရခိုင်ပြည်နယ်တွင် တပ်မတော်၏ ထိုးစစ်ဆင်တိုက်ခိုက်မှုများ ရပ်တန့်ရန်ဆိုသည့် အချက်လည်း ပါဝင်နေပါသည်။

စစ်အာဏာသိမ်းကာလအတွင်း စစ်ကောင်စီတပ်များနှင့် တိုက်ပွဲဖြစ်ပွားမှုများ ရှိခဲ့သကဲ့သို့ RCSS/SSA နှင့် တိုက်ပွဲဖြစ်ပွားမှုအချို့ ရှိခဲ့ပါသည်။ စစ်အာဏာသိမ်းမှုကို ကန့်ကွက်ရှုတ်ချကြောင်း ကြေညာထားပြီး နွေဦးတော်လှန်ရေး၏ ဦးတည်ရာဖြစ်သည့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် ပူး‌ပေါင်းပါဝင်သွားမည်ဟု ပြောဆိုမှုများရှိသော်လည်း လက်ရှိအချိန် အထိတော့ NUCC အတွင်း PSLF/TNLA ၏ ပါဝင်မှုကို မမြင်တွေ့ရသေးဟု ဆိုရပါမည်။ ၂၀၂၁ ခုနှစ်၊ ဒီဇင်ဘာလ ၁၅ ရက်က ရှမ်းပြည်နယ် အရှေ့ပိုင်းရှိ NDAA အုပ်ချုပ်သော မိုင်းလားမြို့တွင် မြောက်ပိုင်းမဟာမိတ်အဖွဲ့ဝင်များနှင့် စစ်ကောင်စီ၏ ကိုယ်စားလှယ်များကြား ပြုလုပ်သည့် အလွတ်သဘော တွေ့ဆုံဆွေးနွေးမှုတွင် TNLA အနေဖြင့် တက်ရောက်ခဲ့ပါသည်။

အပစ်အခတ်ရပ်စဲရေးနှင့် ငြိမ်းချမ်းရေးလုပ်ငန်းစဉ်
အပစ်အခတ်ရပ်စဲရေးလက်မှတ်မထိုးထားသည့် တိုင်းရင်သားလက်နှက်ကိုင်အဖွဲ့။

တိုက်ပွဲများ
တပ်မတော်နှင့်တိုက်ပွဲဖြစ်ပွားမှု
၂၀၁၂-၁၇၊
၂၀၁၃-၆၅၊
၂၀၁၄-၁၃၆၊
၂၀၁၅-၂၁၉၊
၂၀၁၆-၃၀၉။

RCSS/SSA နှင့် တိုက်ပွဲဖြစ်ပွားမှု
၂၀၁၉ – ၃၃
၂၀၂၀ – ၁၈
၂၀၂၁ – ၁၀
၂၀၁၅ – ၁၇
၂၀၁၆ – ၁၄၅

ခေါင်းဆောင်များ
ဗိုလ်မှူးချုပ် တာအိုက်ဘုန်း (ဥက္ကဋ္ဌ)
ဗိုလ်မှူးချုပ် တာခူလန်း (ဒုတိယဥက္ကဋ္ဌ)
ဗိုလ်မှူးချုပ် တာဘုန်းကျော် (အတွင်းရေးမှူး)
ပြန်ကြားရေးရုံး – မိုင်အိုက်ကျော်
နိုင်ငံခြားဆက်ဆံရေးရုံး – တာပန်လှ
ဗဟိုကော်မတီ – ၂၃ ဦး
အရံကော်မတီ – ၈ ဦး
တရားဝင်ကိုယ်စားပြုအဖွဲ့ – မရှိ
ဆက်ဆံရေးရုံး – မရှိ

မဟာမိတ်များ
ပြည်ထောင်စု နိုင်ငံရေး ဆွေးနွေးညှိနှိုင်းရေး ကော်မတီ၊ မြောက်ပိုင်းမဟာမိတ်အဖွဲ့ – မြန်မာပြည်။

ဆက်သွယ်ရန်
ဝက်ဆိုဒ်: http://www.pslfnla.org/
အီးမေးလ်: [email protected]

Reference: မြန်မာ့ငြိမ်းချမ်းရေး လုပ်ငန်းစဉ်ကို ပုံဖော်ခြင်း – လမ်းညွှန်အကိုးအကား ၂၀၂၁ – ၂၀၂၂

LEAVE A REPLY

Please enter your comment!
Please enter your name here