တနင်္သာရီတိုင်းဒေသကြီး၊ လောင်းလုံးမြို့နယ်၊ ပညစ်ကျေးရွာကို မတ် ၁၀ ရက်နေ့ မနက်ပိုင်းမှာ စစ်ကောင်စီတပ်က ဝင်ရောက်မီးရှို့နေတာကြောင့် ရွာလုံးကျွတ် ထွက်ပြေးနေရတယ်လို့ ဒေသခံတွေက သံလွင်တိုင်းမ်ကို ပြောပါတယ်။
တပ်အင်အား ၆၀ ကျော်ပါတဲ့ စစ်ကောင်စီစစ်ကြောင်းဟာ ဒီနေ့ မနက် ၇ နာရီလောက်မှာ လောင်းလုံးမြို့နယ် ကရင်ကြီးကျေးရွာကနေ ပညစ်ကျေးရွာထဲ ဝင်ရောက်လာပြီးနောက် ဒေသခံနေအိမ်တွေကို အကြောင်းမဲ့မီးရှို့ ဖျက်ဆီးခဲ့တာပါ။
စစ်ကောင်စီတပ် မီးရှို့ထားတာကြောင့် ကနဦးမှာ ဒေသခံ နေအိမ် ၃ လုံးထက်မနည်း မီးလောင်ပျက်စီးထားပြီး မီးလောင်မှုတွေ ဆက်လက်ဖြစ်ပွားနေတယ်လို့ သိရပါတယ်။
ပညစ်ကျေးရွာကို မီးရှို့ထားတဲ့ စစ်ကောင်စီတပ် ကျေးရွာထဲမှာဆက်ရှိနေတာကြောင့် ဒေသခံ ၇၀၀ ကျော်ဟာ ဘေးလွတ်ရာ တောတောင်နဲ့နီးစပ်ရာ ကျေးရွာတွေကို ထွက်ပြေးနေရတယ်လို့ ဆိုပါတယ်။
ပြီးခဲ့တဲ့ မတ် ၈ ရက်နေ့ကလည်း စစ်ကောင်စီ စစ်ကြောင်းဟာ ကရင်ကြီးကျေးရွာကို မီးရှို့ဖျက်ဆီးခဲ့တာကြောင့် နေအိမ် ၅ လုံးထက်မနည်း မီးလောင်ပျက်စီးထားပါတယ်။
လောင်းလုံးမြို့နယ်ထဲကို စစ်ကြောင်းလာတဲ့ စစ်ကောင်စီတပ်ဟာ ရွာစဉ်လှည့်ပြီး မီးပတ်ရှို့နေတဲ့အတွက် ကရင်ကြီး၊ သဘော့ဆိပ်၊ ကမ်းပနီ၊ ကျောက်ဆင်အပါအဝင် ကျေးရွာ ၇ ရွာလောက်က ဒေသခံ ထောင်နဲ့ချီ ထွက်ပြေးနေရတယ်လို့ သိရပါတယ်။
သံလွင်တိုင်းမ်-ပေးပို့သည်။