ဘူးသီးတောင်မြို့မှ ထွက်ခွာလာသည့် ခရီးသည်တင် ရွှေပြည်တန်အမြန်ရေယာဉ်နှင့် စစ်ကောင်စီစစ်ရေယာဉ်တစ်စီးတို့ မတော်တဆတိုက်မိရာမှ ခရီးသည် ၃ ဦး အနည်းငယ်စီ ထိခိုက်ဒဏ်ရာရရှိသွားခဲ့သည်ဟု သတင်းရရှိသည်။
ဒီဇင်ဘာလ ၁၂ ရက်၊ နံနက် ၇ နာရီကျော်ခန့်က ဘူးသီးတောင်မြို့မှ ထွက်ခွာလာသည့် ရွှေပြည်တန်အမြန် ရေယာဉ်သည် ရွက်ညိုးတောင်ကျေးရွာအနီးတွင် စစ်ရေယာဉ်နှင့် ပွတ်တိုက်မိခဲ့ကြောင်း၊ နှင်းများဖုံလွှမ်းနေသဖြင့် တစ်စီးကိုတစ်စီး မမြင်ရသဖြင့် ပွတ်တိုက်မိခြင်းဖြစ်ကြောင်း ရွှေပြည်တန်ပေါ်တွင်ပါလာသည့် ခရီးသည်တစ်ဦးက ပြောသည်။
“တိုက်မိတာက နှင်းတွေထူထပ်နေတဲ့ အတွက် မမြင်ရလို့ တိုက်မိတာ။ ဘူးသီးတောင်မြို့ကနေ မေယုမြစ်အတိုင်း ရွှေပြည်တန်က မနက် ၇ နာရီကျော်ခန့်က ထွက်လာတာ။ နာရီဝက် မကြာဘူးတိုက်မိတာ။ ဒီရေကကျနေတော့ နှစ်စင်းစလုံးက အပြိုင်ဆင်းကြရာမှာ ပွတ်တိုက်တာပါ။ ငြိသွားတာပေါ့။ မျက်နာချင်းဆိုင် တိုက်တာမဟုတ်ဘူး” ၎င်းကပြောသည်။
ထိခိုက်ဒဏ်ရာရသူ သုံးဦးတွင် ပင်စင်သွားထုတ်သည့် အသက် (၇၀) ကျော်အရွယ် အဘွားတစ်ဦးပါဝင်ပြီး ကျန်နှစ်ဦးမှာ အမျိုးသားတစ်ဦးနှင့် အမျိုးသမီးတို့ဖြစ်ကြောင်း သိရသည်။
တစ်ခြား ရွှေပြည်တန်ပေါ်ပါလာသူတစ်ဦးက “ ပင်စင်သွားယူတဲ့ အဒေါ်ကတော့ နည်းနည်း ထိမိသွားပါတယ်။ ဒါပေမယ့် အခြားနှစ်ယောက်လောက်တော့ မပြင်းဘူး။ နောက်နှစ်ယောက်က နည်းနည်း ပိုထိသွားပါတယ်။ ဒုန်းခနဲဆိုပြီးအသံ တစ်ခုကြား လိုက်ရပါတယ်။ နောက်မှ စစ်ရေယာဉ် နေဗီနဲ့ ပွတ်တိုက်တာလို့ သိရပါတယ်။ အမြန်ရေယာဉ်လည်း ဘူးသီးတောင်ကို ပြန်လှည့်လာပြီး လူနာတွေကိုတော့ ဘူးသီးတောင် ဆေးရုံကိုပို့လိုက်ကြပါတယ်။ ပီးမှ ရွှေပြည်တန်ကတော့ စစ်တွေကို ခရီးဆက်သွားခဲ့ပါတယ်။ နှင်းကတအားများ မမြင်ရတော့ မတော်တဆ တိုက်မိတာဖြစ်ပါတယ်” ဟု ပြောသည်။
ယင်းခရီးသည်သုံးဦးစလုံးကို ဒဏ်ရာရပြီးချက်ချင်း ဘူးသီးတောင်မြို့ဆေးရုံသို့ ပို့ဆောင်ခဲ့ပြီး ဆေးကုသမှုခံယူခဲ့ကြောင်း သိရသည်။
ခိုင်လူလှ (ရိုးမမြေ) – ပေးပို့သည်။