ကချင်ပြည်နယ် မသန်စွမ်းသူများ၏ ရပိုင်ခွင့်ဆိုင်ရာ ဥပဒေ မူကြမ်း ရေးဆွဲနိုင်ရန် မြန်မာနိုင်ငံ မသန်းစွမ်းသူများအသင်းချုပ် နှင့် ကချင်ပြည်နယ် မသန်စွမ်းများအသင်းအဖွဲ့မှ ဒုတိယအကြိမ် တွေ့ဆုံဆွေးနွေးပွဲကို စက်တင်လာ ၂၅ ယနေ့ မြစ်ကြီးနားမြို့ မျက်မမြင်ကျောင်းတွင် ပြုလုပ်ခဲ့သည်။
မူကြမ်း ရေးဆွဲလာရခြင်း မှာ မသန်စွမ်းသူများအနေဖြင့် မိမိအခွင့်အရေးကိုနားမလည်ခြင်း၊ နိုင်ငံသားအခွင့်အရေးကို အပြည့်အဝမရရှိခြင်း၊ သွားလာရေး အခက်အခဲများကြုံတွေ့နေရခြင်း၊ တန်းတူအခွင့်အရေးနှင့် ပညာသင်ယူခွင့်များ ဆုံးရှုံးနေခြင်း စသောအခက်အခဲများကို ကြံုတွေ့နေရသောကြောင့် ရေးဆွဲ ဖြစ်ခြင်း ဖြစ်သည်ဟု ပြောပါသည်။
အစိုးရမှ တရားဝင်အတည်ပြုထားသော မသန်စွမ်းသူများ၏ နည်းဥပဒေသည် ကောင်းမွန်စွာ ရေးဆွဲထားသော်လည်း လက်တွေ့ ကောင်းမွန်နိုင်ရန် အလွန်ခက်ခဲနေကြောင်း ထပ်မံ ဖြည့်စွက်လိုသော ရည်ရွယ်ချက်ဖြင့် ကြိုးစားနေခြင်း ဖြစ်သည်ဟု မြန်မာနိုင်ငံ မသန်စွမ်းသူများအသင်း ဥက္ကဌ ဦး အောင်ကိုမြင့်က ကချင်သတင်းဌာန KNG ကို ပြောပါသည်။
အဆိုပါ မသန်စွမ်းသူများ၏ ဖွဲ့စည်းပုံ မူကြမ်းကို အတည်ပြုအောင်လုပ်ဆောင်နိုင်မှသာ လူသားအချင်းချင်း ခွဲခြားဆက်ဆံမှုများ လျှော့ပါးလာပြီး မသန်းစွမ်းသူများကို ဂရုစိုက်မှု၊ ကာကွယ်စောင့်ရှောက်မှုများ ပြုလုပ်လာမည်ဖြစ်သည်ဟု ၎င်းက ဆက်ပြောသည်။
ပထမအကြိမ်ဆွေးနွေးပွဲကို ၂၀၁၈ ဧပြီလ ၁၀ရက်နေ့တွင် ကျင်းပခဲ့ကြောင်း သိရပါသည်။