ကရင်နီ (ကယား) ပြည်၊ လွိုင်ကော်မြို့တွင် ဖောက်ထွင်းခိုးယူသူများကြောင့် နေရပ်ပြန်စစ်ဘေးရှောင်များသည် ပြန်လည်ထူထောင်ရေးတွင် အခက်အခဲများဖြင့် ရင်ဆိုင်ကြုံနေကြရသည်ဟု ခေတ္တပြန်ရောက်နေသူမြို့ခံများက ပြောသည်။
ရပ်ကွက်တိုင်းနီးပါး၌ ဖောက်ထွင်းခိုးယူခံနေကြရပြီး အချို့ရပ်ကွက်များတွင် အိမ်အခွံသက်သက်သာ ကျန်ရှိ ခဲ့သည်ဟု စစ်ရှောင်များက ပြောသည်။
စစ်ရှောင်တစ်ဦးက “ပစ္စည်းခိုးကြတယ်ဆိုတာထက် ပစ္စည်းယူကြတယ် ပြောရမှာပေါ့နော်။ ၃ ဘက်လုံးပဲ ပြည်သူတွေလည်း ယူတယ်။ တော်လှန်ရေးဘက်ကကောင်တွေ တချို့လည်း ယူကြတာရှိတယ်။ စစ်တပ်ကလည်း ယူတယ်။ ဒါကတော့ အပွင့်လင်းဆုံး အမှန်ကန်ဆုံး ပြောတာပါဗျာ” ဟု ပြောသည်။
လက်နက်ကိုင်အဖွဲ့အစည်းများတွင် စည်းမျဉ်းစည်းကမ်းများ ချမှတ်ထားသော်လည်း လိုက်နာမှုမရှိကြဟု အဆိုပါ စစ်ရှောင်က ဆက်ပြောသည်။
“KNDF အနေနဲ့လည်း စည်းကမ်းတွေအများကြီး ထိန်းချုပ်ထားတာရှိတယ်၊ အဖွဲ့တိုင်း လိုလိုပေါ့နော်။ စစ်တပ်မှာ လည်း သူ့ဟာနဲ့သူ ထိန်းချုပ်ထားတာလည်း ရှိကောင်းရှိလိမ့်မယ်ဗျာ။ ဒါပေမဲ့ စစ်တပ်ကတော့ ကျနော့် အထင်တော့ သူတို့ကိုပဲ မကောင်းပြောနေတာတော့ မဟုတ်ဘူးဗျ။ ဒီကောင်တွေကိုက မကောင်းတာ ဖြစ်နေ တာကိုးနော်။ သူတို့လူကြီးတွေ ကိုယ်တိုင်ကိုက ခိုးခိုင်းတဲ့ဟာတွေ၊ သူတို့လူကြီးတွေ ကိုယ်တိုင်ခိုးပြီးတော့မှ ပေါ်တင် ရောင်းချတဲ့ဟာတွေ အဲ့ဒါတွေက ရှိတယ်ဗျာ” ၎င်းက ဆိုသည်။
ခိုးရာပါပစ္စည်း အများစုကို ဒီးမော့ဆိုမြို့နယ်၊ ချယ်ရီကုန်းရပ်ကွက်တွင် ရောင်းချနေကြပြီး ကား၊ ဆိုင်ကယ်များကို ဒေသကွပ်ကဲမှု စစ်ဌာနချုပ်ရုံး (ဒကစ) တွင် ဝယ်ယူနိုင်သည်ဟု စစ်ကောင်စီတပ်ဖွဲ့ဝင်များက ရပ်ကွက်အချို့၌ ကြေညာထားသည်ဟု ဆိုသည်။
ထို့အပြင် ရှမ်းပိုင်းရပ်ကွက်တွင်လည်း စစ်ကောင်စီတပ်က သူခိုးများ ဖောက်ထွင်းနေချိန်များတွင် စစ်ကောင်စီ တပ်များက ကင်းလှည့်ပေးနေသည်ဟု ရပ်ကွက်တွင်း ကျန်ရှိနေသူများက ပြောသည်။
ရှေ့တန်းသတင်းအရင်းအမြစ်တစ်ဦးက “ဘယ်အဖွဲ့ ဘယ်အဖွဲ့လဲဆိုတာ ကျနော် မပြောချင်ဘူးပေါ့နော်။ ဘာလို့လဲဆို အဖွဲ့တိုင်းလိုလိုမှာက လူကအမျိုးမျိုးရှိကြတယ်ပေါ့၊ အဲ့ဒီလူတွေထဲမှာ ဆိုလို့ရှိရင် လက်ဆော့ တတ်တဲ့ လူဆိုတာ ပါစမြဲပဲလေ၊ လူကအများကြီးကိုး၊ KNDF ဆိုလည်း လူထောင်ပေါင်းများစွာရှိတယ်။ အဲ့ လူထောင်ပေါင်းများစွာတော့ အကုန်လုံးကောင်းနေတာ မဟုတ်ဘူးလေနော်၊ အဲ့တော့ အဲ့ကြားထဲမှာ တကယ် မယူကြဘူးလားဆိုတော့ ယူကြတာတွေလည်း ရှိတယ်ဗျ တော်လှန်ရေးတပ်ဖွဲ့က၊ ဒါပေမဲ့ စစ်တပ်စိုးမိုးနယ်မြေ မှာလည်း စစ်တပ်က ခိုးကြတာဗျာ၊ အဲ့လိုမျိုးရှိတယ်ဗျာ။ စစ်တပ်ကကျတော့ ယူပြီးရောင်းစားတဲ့အဆင့် ရှိတယ်။ အဲ့လိုမျိုးပေါ့” ဟု ပြောသည်။
ကရင်နီပြည်နယ်တွင် ကရင်နီပြည် ရဲတပ်ဖွဲ့ (KSP) မှ သူခိုးများအား ဖမ်းဆီးအရေးယူမှုများ ရှိသော်လည်း ရဲအင်အားထက် သူခိုးအင်အားများနေသဖြင့် မနှိမ်နှင်းနိုင်ဘဲ ဖြစ်နေသည်ဟု ဆိုသည်။
လွိုင်ကော်မြို့တွင် မေလနောက်ဆုံးအပတ်မှ စတင်၍ နေရပ်ပြန်လာသူ အနည်းငယ် ရှိကြသော်လည်း တချို့မှာ လိုအပ်သည့်ပစ္စည်းများ ပြန်ယူပြီးနောက် ပြန်လည်ထွက်ခွါသွားကြသည်ဖြစ်ရာ လတ်တလောတွင် စစ်ကောင်စီတပ်၊ စစ်မှုထမ်းဟောင်း မိသားစုဝင်၊ Non-CDM မိသားစုဝင်များနှင့် ပြည်သူ အနည်းငယ်သာ ကျန်ရှိတော့သည်ဟု နေရပ်ပြန်စစ်ဘေးရှောင်များက ပြောသည်။
NMG ပေးပို့သည်။