စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က NUG၊ PDF နှင့် ၎င်းတို့ကိုကူညီနေသည့် EAO အဖွဲ့တချို့ကို ပြတ်သားစွာ အရေးယူမည့်အကြောင်း ပြောဆိုပြီး တစ်ရက်အကြာတွင် စစ်အာဏာရှင်တော်လှန်ရေးဆင်နွှဲနေသည့် လူထုတော်လှန်ရေးမဟာမိတ်အင်အားစု (PRA-Magway) အား ရက္ခိုင့်တပ်တော် (AA) က ချီးကျူးဂုဏ်ပြုကြောင်း ပြောဆိုလိုက်သည်။
မတ်လ ၂၈ မတ်နေ့က ကျရောက်ခဲ့သည့် PRA-Magway တည်ထောင်ခြင်း (၂) နှစ်ပြည့်အခမ်းအနားသို့ ရက္ခိုင့်တပ်တော် AA ၏ Nova (နိုဗာ) စစ်ဒေသမှ ပေးပို့သော ဂုဏ်ပြုသဝဏ်လွှာတွင် “စစ်အာဏာရှင်ကို တော်လှန်နေကြသော အဖွဲ့အစည်းများထဲမှ နိုင်ငံရေးရည်တည်ချက်၊ ရည်မှန်းချက်၊ တော်လှန်ရေး ခံယူချက်များ ခိုင်မာပြီး လူထုထောက်ခံမှုကို ရရှိထားသည့် PRA အဖွဲ့၏ နှစ်နှစ်တာကာလအတွင်း လုပ်ဆောင်ချက်၊ စွမ်းဆောင်ရည် ဦးဆောင်ချက်များကို ချီးကျူးဂုဏ်ပြုသည်” ဟု ဖော်ပြထားသည်။
ယင်းအပြင် PRA ကို ဦးဆောင်သူများအနေဖြင့် နွေဦးတော်လှန်ရေးအတွက် ဆက်လက် အထောက်အကူပြုသော အဖွဲ့အစည်းဖြစ်စေရန် AA က မျှော်လင့်ကြောင်း သဝဏ်လွှာကဆိုသည်။ ယခုကိစ္စနှင့် ပတ်သက်ပြီး AA ပြောခွင့်ရသူ ဦးခိုင်သုခကို DMG က ဆက်သွယ်နေဆဲဖြစ်သည်။
PRA-Magway တော်လှန်ရေးအဖွဲ့သည် စစ်တပ်က အာဏာသိမ်းပြီးနောက် ၂၀၂၁ မတ်လ ၂၈ ရက်နေ့တွင် မကွေးမြို့၌ စတင်ဖွဲ့စည်းခဲ့ပြီး စစ်အာဏာရှင်စနစ် အမြစ်ပြတ်ချေမှုန်းရေးအတွက် မကွေးဒေသတွင် စစ်ကောင်စီကို လက်နက်ကိုင်တော်လှန်နေသည့် အဖွဲ့လည်းဖြစ်သည်။
ယမန်နေ့က PRA-Magway ဌာနချုပ်တွင်ကျင်းပခဲ့သည့် အခမ်းအနားသို့ NUG၊ ULA/AA၊ BPLA အပါအဝင် ဒေသတွင်း မဟာမိတ်တော်လှန်ရေးအဖွဲ့များက ဂုဏ်ပြုသဝဏ်လွှာများ ပေးပို့ခဲ့ကြသည်။
မကွေးတိုင်းသည် ရခိုင်ပြည်၊ အမ်းမြို့နယ်နှင့် နယ်နိမိတ်ချင်းထိစပ်နေပြီး PRA-Magway မှာ AA နှင့် ကောင်းမွန်သောဆက်ဆံရေးအပြင် AA က စစ်ရေးအကူအညီများ ပေးခဲ့သည့် အဖွဲ့တစ်ခုဖြစ်ကြောင်း သိရသည်။
အမ်းမြို့ခံ လူမှုရေး တက်ကြွလှုပ်ရှားသူ ကိုမျိုးလွင်က “PRA ကို ကူညီပေးလိုက်တဲ့ သဘောကို ပြသနေတာ။ AA က စစ်ရေးကိစ္စတွေ ကူညီပေးလိုက်တဲ့အခါမှာ နွေဦးတော်လှန်ရေးက တပ်ဖွဲ့အချို့တွေ AA ရဲ့ နည်းဗျူဟာတွေနဲ့ တတ်မြောက်လာတဲ့အတွက် AA က သူတို့နဲ့ အဆင်ပြေတဲ့ဆက်ဆံရေးရှိတယ်လို့ ပြသနေတာ” ဟု ရှုမြင်သည်။
အခြားသော အာဏာရှင်ဆန့်ကျင်ရေးဆင်နွှဲနေသော တော်လှန်ရေးအင်အားစုများကလည်း နွေဦးတော်လှန်ရေးအတွက် အကူညီပေးမှုများနှင့်စပ်လျဉ်း၍ ULA/AA ထံသို့ သဝဏ်လွှာပေးပို့ခြင်းများကို မကြာခဏတွေ့ရပြီး အာဏာသိမ်းပြီးနောက်ပိုင်း စစ်ကောင်စီက ဖမ်းဆီးရန်ကြိုးစားနေသည့် နိုင်ငံရေးသမားများကိုလည်း AA ဒေသမှာ ခိုလှုံခွင့်ပေးထားမှုများရှိနေကြောင်း သိရသည်။
အောင်ထိန် (DMG) – ပေးပို့သည်။