ရခိုင်ပြည်နယ်စပ်မြို့ မောင်တောမြို့နယ်တွင် စစ်ဘေးတိမ်းရှောင်နေကြရသည့် မြို့ခံများအား မြို့တွင်းသို့ ပြန်လည်ဝင်ရောက်နေထိုင်ရန် အာရက္ခတပ်တော် (AA) က ခွင့်ပြုထားသော်လည်း စစ်ကောင်စီ၏ လေကြောင်းအန္တရာယ်ကို စိုးရိမ်သဖြင့် တွန့်ဆုတ်နေကြကြောင်း သိရသည်။
၂၀၂၅ ခုနှစ် ဇန်နဝါရီလ ၁ ရက်နေ့ကစပြီး မောင်တောမြို့ခံများအား မြို့တွင်းပြန်လည်နေထိုင်ခွင့်ပြုထားခြင်း ဖြစ်သည်။
သို့သော် စစ်ကောင်စီသည် ရခိုင်က မြို့ရွာများကို လေကြောင်းတိုက်ခိုက်မှုများ ဆက်တိုက် လုပ်နေသည့်အတွက် နေရပ်ပြန်ရန် စိုးရိမ်မှု ရှိနေကြသည်ဟု ဒေသခံများက ပြောကြသည်။
“နေရပ်ကတော့ ပြန်ခွင့်ပြုထားပြီ။ ULA ဘက်က အိမ်ထောင်စုနဲ့ လူဦးရေကို သေချာစိစစ်ပြီး ခွင့်ပြုတာ။ တချို့လည်း နေရပ်ပြန်ကြတာတွေ ရှိတယ်။ တချို့ကလည်း မပြန်ကြသေးဘဲ အခြေအနေကို စောင့်ကြည့်နေတာရှိတယ်။ အဓိကတော့ စစ်ကောင်စီက အရပ်သားတွေကိုပစ်မှတ်ထားပြီး လေကြောင်း တိုက်ခိုက်နေတာကြောင့် စောင့်ကြည့်နေတဲ့ သဘောပေါ့။ လုံခြုံစိတ်ချရရင်တော့ အိမ်ပြန်မှာ” ဟု မောင်တောမြို့က စစ်ဘေးရှောင်နေသည့် အမျိုးသားတစ်ဦးက ပြောသည်။
လက်ရှိတွင် မြို့ခံတချို့ ဝင်ရောက်နေထိုင်မှု ရှိနေကြပြီး ပိုင်ရှင်များ မရောက်ရှိကြသည့် နေအိမ်များကို ULA က လုံခြုံစွာ ပိတ်ထားသည်ဟု မောင်တောဒေသခံများထံမှ သိရသည်။
မောင်တောတွင် စစ်ကောင်စီ (ပူးပေါင်းမွတ်ဆလင်) များနှင့် အာရက္ခတပ်တော်တို့အကြား မြို့တွင်းတိုက်ပွဲ ပြင်းထန်လာသည့်အတွက် ၂၀၂၄ ဩဂုတ်လတွင် သောင်းနှင့်ချီသော မြို့ခံများကို အာရက္ခတပ်တော် (AA) က ကယ်ထုတ်ခဲ့ပြီး လုံခြုံသည့်နေရာများတွင် စစ်ရှောင်စခန်းများဖွင့်လှစ်ပြီး နေရာချပေးခဲ့သည်။
မောင်တောမြို့ထဲတွင် တိုက်ပွဲပြင်းထန်ခဲ့သဖြင့် မြေမြှုပ်မိုင်းနှင့် စစ်ကျန်လက်နက် အန္တရာယ်များကိုလည်း စိုးရိမ်မှုရှိနေကြသည်ဟု မောင်တော ၃ မိုင်ရပ်ကွက်မှ စစ်ဘေးရှောင်နေသူ အမျိုးသားတစ်ဦးက ပြောသည်။
“နေရပ်ပြန်ဖို့ကြတော့ လေကြောင်းအန္တရာယ်ကတော့ စိုးရိမ်မှုရှိတာပေါ့။ နောက် ကျနော်တို့ရဲ့ရပ်ကွက်က နခခ (၅) နဲ့ အနီးဆုံးမှာဆိုတော့ မြေမြှုပ်မိုင်းနဲ့ စစ်ကျန်လက်နက်တွေ အများကြီး ရှိနိုင်တယ်။ ဒါကြောင့် နေရပ်ပြန် ရင်လည်း မိုင်းအန္တရာယ်ကိုလည်း စိုးရိမ်ကြရတယ်။ ဒီရက်ပိုင်း နေရပ်ပြန်ရပေမယ့် အခြေအနေကတော့ စောင့် ကြည့်ရမယ့် သဘောရှိတယ်” ဟု ၃ မိုင်ရပ်ကွက်က စစ်ဘေးရှောင်အမျိုးသားက ပြောသည်။
လက်ရှိ မောင်တောမြို့အတွင်း အာရက္ခတပ်တော် (AA) က မြို့တွင်း မိုင်းရှင်းလင်းမှုနှင့် သောက်သုံးရေကိစ္စများကို ကနဦး စီစဉ်ဆောင်ရွက်မှုများ ရှိနေသည်ဟု ULA နှင့် နီးစပ်သူများထံက သိရသည်။
မောင်တောမြို့နယ်တစ်ခုလုံးကို အာရက္ခတပ်တော်က ၂၀၂၄ ဒီဇင်ဘာလ ၈ ရက်မှစ၍ အပြီးသတ် သိမ်းပိုက်ထားနိုင်ခြင်းဖြစ်သည်။
အောင်ထိန် (DMG) ပေးပို့သည်။
